هانی دەنگێكە لە رۆژهەڵاتی كوردستانەوە سەری هەڵدا، لەبەرئەوەی تاكە خانمە كوردە لەڕێگەی كۆنسێرتەكان و تێكەڵ بوونی بە تێكست و میلۆدییە كوردییەكان دەركەوت، بە "دەنگی كۆنسێرت" ناسراوە هەرچەندە بەرهەمی كەمە، بەڵام بە یەكێك لە ئەستێرە دیارەكانی كورد دەناسرێتەوە، هەر زوو بووە خاوەن جەماوەرێكی تایبەت بە خۆی،

 * بۆچوونی جەماوەر لە سەر ئەلبوومی دووەمت چۆن بوو؟

_ ئەو كەسانەی كە هاوڕێ و نزیكی منن لە كوردستان كە باسی سێدی دووەمیان بۆ دەكەم ئەسڵەن نازانن سێدی دووەمم هاتۆتە بازاڕ، بەڵام من قەت باوەڕم نەدەكرد ئەلبوومەكەم ئەوەندە سەركەوتوو بێت، من تەنیا وەك تەجروبەیەك ئەلبوومی دووەمم خستە بازاڕ، بە بڕوای ئەو هونەرمەندانەی كە شارەزایان لە موزیكی كلاسیك و تێكست هەیە كارێكی زۆر تازە بوو، گەنجەكانیش بە دڵیان بوو، دەستخۆشییەكی زۆرم بۆ هاتووە، لەبەرئەوە ئەلبوومەكەم زۆر بە سەركەوتوویی دەبینم.

* ئایا دەتەوێت سێدی سێیەمت چۆن بێت و چۆن كاری بۆبكەیت ؟

_ وەك دەزانن ئەلبوومی دووەمم "دایك" هەموو ئاوازەكانی هی خۆم بوون، بەڵام ئەلبوومی دووەمم پرۆژەی پێنج ساڵ لەمەوبەرم بوو، بەداخەوە ئەوكات نەمتوانی بەرهەمی بێنم، وەك دەبینن ئەمساڵ بڵاوكرایەوە بە ناوی "دایك"، بەڵام ئەوەش بزانن پێنج ساڵ لەمەوبەر ئەوكاتەبوو كە تازە 

هاتبوومە ئەوروپا و هیچ زانیارییەكم لە بارەی موزیكی غەریبی یاخود موزیكی مۆدێرن نەبوو، بەڵام ئێستا هەموو رۆژێك لە ئەڵمانیا دەچم بۆ كۆنسێرت، موزیكی وا گوێبیست دەبم مرۆڤ موەكانی راست دەبێتەوە، لە ماوەی ئەو پێنج ساڵە موزیك گەلێكم بیستووە، لەبەرئەوە پرۆژەكانی داهاتووم گۆڕانكاری زۆری تێدا دەبێت، بەڵام حەزدەكەم ئەلبوومی داهاتووم كارێكی "پەپ موزیك" بێت، هەروەها ئەگەر لەگەڵ كاك هەڵكەوت زاهیر كار بكەمەوە بێگومان دەبێت كارەكانمان لەگەڵ ئەلبوومی پێشووتر جیاواز بێت، چونكە ئێستا ئێمە باشتر لە یەكتر تێگەیشتووین، كاك هەڵكەوت ئێستا دەزانێت چ شتێك بۆ دەنگی من باشە و تەبەقەی دەنگی من چۆنە، چ شتێك لەناو خەڵك فراوانتر و خێراتر دەڕوات.

* لەرێگەی بڵاوبوونەوەی هەر دوو ئەلبوومت، هیچ شتێكت قازانجكردووە لەرووی مادییەوە؟

_ تائێستا یەك دۆلارم لە هیچ كام لە ئەلبوومەكانم قازانج نەكردووە، هەندێجار بیردەكەمەوە بۆچی؟ هونەرمەند یەك ساڵ كار دەكات پێویستە لە ماوەی ساڵێكی كاركردنی قازانج بكات، بەڵام لە وڵاتێك كە نە مافی كۆپی رایت هەیە، نە مافی هونەرمەند هەیە، لەوڵاتێك كە هیچ یاسایەك نییە بۆ بەرهەمی هونەرمەندان و ئەمڕۆ ئەلبوومت دەكەوێتە بازاڕ بۆ دوو سەعاتی دی دەتوانی لە ئەنتەرنێت وەریبگری، ئێ باشە من پرسیار دەكەم كە وایە هونەرمەند چۆن دەتوانێ قازانح بكات، لە وڵاتێك كە بە رۆژانە كلیپت لە كەناڵەكان پەخش دەكەن و گۆرانییەكان لە رادیۆكان پەخش دەكەن، بەڵام لە بەرامبەردا هونەرمەند هیچ حەقێكی مادی نییە، قازانج لە كوێوە دروست دەبێت؟ بەڵام من وەك ئەركێك لەسەر شانم، وەك كچێكی كورد تەنیا وەك هەستێكی نەتەوایەتی خەریكی كاری هونەریم، هیوادارم لە داهاتوودا ئەوانە رێكبخرێن و بازاڕی هونەری لە كوردستان دروست بێت.

* تۆ خاوەن دەنگێكی سەر شانۆی، بەڵام بۆچی ماوەی پێنج ساڵە لە كوردستان كۆنسێرتێكی تایبەتت بە "هانی" ئەنجام نەداوە؟

_ هەرجارێك كە دێمەوە كوردستان پێمخۆشە كۆنسێرت بكەم، بەڵام راستی كۆنسێرتەكانی كوردستان بە كوالێتی نابینم، گرنكترین شت بۆ گۆرانیبێژ ئەوەیە كارەكەت فول كوالێتی بێت، بەڵام من ئەو كوالێتییە لە كۆنسێرتەكان و هۆڵەكانی كوردستان نابینم، بیستوومە دەڵێن هۆڵی گەورە بە ستانداردێكی باش دروستكراوە، پێش پێنج ساڵ لەمەوپێش كۆنسێرتێكم لە كوردستان كرد 10 كەس لەسەر شانۆ بوون، تەنیا دەنگی چوار موزیكژەن دەهاتە دەرەوە بۆ جەماوەر، ئەوە حەیا چوون بوو، ئەگەر 10 كەس بزانێت ئەوە هەڵەی تەكنیكییە، بەڵام 10 كەسەكەی تر وادەزانن گۆرانیبێژەكە دەنگی نییە، ئەو شتانە زۆر دەور دەبینێت، لەبەرئەوە من ترساوم لە كوردستان كۆنسێرت بكەم، بەڵام یەك شت لای من پرسیارە وەختێك گۆرانیبێژێكی عەرەب و فارسەكان دێن لە كوردستان كۆنسێرت دەكەن بە ئیمكانیاتێكی زۆرەوە باشترین ستافی ئەوروپی دێننە ناو هۆڵەكان و كاری تەكنیك دەكەن، بەڵام ئەگەر هانی یان هەر هونەرمەندێكی كورد بیەوێت كۆنسێرتێك بكات دەڵێن: وڵاتمان زوڵمی لێكراوە ئیمكانیاتمان نییە، هەر بیر لە قازانج دەكەنەوە، بەراستی ئەگەر وا بڕوا كارەساتە لە كوردستان، ئێمە دوو شاری گەورەمان هەیە وەك هەولێر و سلێمانی كە دوو ملیۆن خەڵك تێیاندا دەژی كەچی بە پێنج مانگ جارێك كۆنسێرتێك ساز ناكرێت، بەڵام لە شارێكی ئەوروپا كە دوو سەد خێزانی تێدا دەژی لە یەك شەو و رۆژدا بە لانیكەم 10 كۆنسێرتی تێدا دەكرێت، بەڵام زۆر بەداخەوە ئەوانەی ئەو كارانە دەكەن لە كوردستان هەمووان خەریكی قازانجن و بەس.

* ئەزموونی ئیشكردنی خۆت لە كوردستان چۆن هەڵدەسەنگێنی؟

_ راستی تائێستا نەمن لە كوردستان گەیشتووم نە كوردستان لە من گەیشتووە، هەموو هاوڕێكانم پێم دەڵێن ئەو هاتن و ڕۆیشتنەت دروست نییە، پێویستە من كە دێمەوە كوردستان شەش تا هەشت مانگ بمێنمەوە تابزانم دەتوانم چی بكەم لە كوردستان و خەڵك چی دەوێت، چ شێك خالییە لە ناو دڵ و هەستی گەنجان، بەڵام كێشەی من ئەوەیە كە دێمەوە ناتوانم لە چوار هەفتە زیاتر بمێنمەوە.

* هەستت بە خۆشەویستی خەڵكی كوردستان كردووە؟

_ تەنیا شتێك كە دەموروژێنێ ئیش بكەم و نەوەستم خۆشەویستی خەڵكی كوردستانی باشوورە، هەرجارێك كە دێمەوە كوردستان شەحن دەبمەوە، ئەوەندە سادەیی و جوانی دەبینم لە ناو خەڵكەكە هەر ئەوەندەیە دڵم خۆش دەكات، ئەگەرنا هیچ شتێك نییە دڵم خۆش بكات لە كوردستان.

 

ئا: حەسەن مەلا

ساڵح یوسف كاكە حەمە ناسراوە بە ( كاردۆ گەرمیانی ) یەكێك لەو هونەرمەندانەی چەندین ساڵەبە تابلۆكانی خزمەتی بە بواری ئەنفال كردووە ، ئێستا مامۆستای پەیمانگای هونەرە جوانەكانە.

هونەرمەند هەمیشە چاو، فرمێسك ، دڵۆپەی خوێن ، زۆرئەبینرێت لەتابلۆكانمدا، ئەمانە مانای ئەنفال وكیمابارانكردن وگریان وچاوەڕوانی وكوشتنی بەكۆمەڵە. جینۆساید، دووبارەبوونەوەی ئەوسێ رەمزە لەتابلۆكانمدا دیارە. لە دیدارێكی تایبەت هونەرمەند تیشك دەخاتە سەر ئەزموونی كاری هونەری خۆی . 

_ بۆ تائێستا خاوەنی مۆزەخانەیەكی نیشتیمانی بۆ هونەری شێوەكاری نین ؟

+ بۆ هونەر مۆزەخانەی نیشتیمانیم نەبینیوە لەكوردستان، بەڵام مۆزەخانەمان هەیە وەكو مۆزەخانەی هونەری ( زامۆ ) لەسلێمانی ؟

_ بۆچی لە تابلۆكانت یان پێشانگاكانت هەمیشە غەمێكی قوڵ و پڕ ئازار دەبینرێت؟ ئەتەوێت چی بڵێی ؟ 

+ لەكارە هونەرییەكانمدا ئازار و غەمی ئەنفال بۆ من سومبلێكی تابلۆكانمە، چونكە ئەنفالەكان ، لەناخمدا وەكو سەوزی بەهار هەموو ساڵێك سەوز ئەبن ، چونكە نەتەوەیەك بە بەرچاوی دونیاوە كۆمەڵكوژ كران ، جیهان لێی بێ‌ دەنگبوو ، بۆیە منیش لە دەرەوەی وڵات بە تابلۆكانم بە جیهان دەڵێم نا بۆ بێ هەڵویستی و بێ‌ دەنگیتان .

_ تۆسەردەمێكە لەغوربەت دەژی ، تاراوگە توانی غەمەكانی ئەنفالت لە بیربەڕێتەوە، بەتایبەتی ئەنفالكراوانی گوندەكەت؟ 

+ هەرچەند ە ( 24 ) ساڵە لەهەندەرانم، هیچ كاتێك ئازارەكانی ئەنفالم لێ نابنەوە، چونكە هەموویان ئەناسم و لەگەڵیان یادگاریم هەیە، چۆن لە بیر دەكرێن ؟ حەزمدەكرد ئێستا لەگەڵم بوونایە .

_ لە گوندەكەت تابلۆیەكی گەورەت كێشا كەهی پێش قۆناغی ئەنفالە ، بیرۆكەی ئەو پڕۆژەیە چۆن دروستبوو؟ ئامانج لەو پڕۆژەیە چییە؟ 

+ وێنەكێشانی گوندی قەشقە بیرۆكەیەك بوو ، بۆئەوەی نەوەی دوای ئەنفال بزانێت گوندی قەشقە پێش ئەنفال چۆن بوو ، هەموو كاتێك ئامادەم لەگەڵا هەموو هونەرمەندێك بەشداربم بۆ یادەوەری ئەنفال و پێشانگاش بكەمەوە . 

_ ئەگەر داوات لێبكرێت، ئامادەی لە داهاتوودا لەگەڵا هونەرمەندانی ئەو سنوورە وەك (فاتیح بابا كەریم ، ئاشتی گەرمیانی ) لە ناحیەی قادر كەرەم خاوەنی پلەیەكی ئەنفالكراوان، كارێكی هونەریی شایستە بەئەو تاوانە ئەنجامبدەن؟

+ من هەمیشە ئامادەم بۆهەر كارێكی هونەریی یان شێوەكاری لەگەڵا هەر هونەرمەندێك بێت ، خۆشحاڵم بتوانم خزمەتێكی وا بۆ ئەو ناوچەیە ئەنجامبدەم، ئەوە خەونمە .

_ ئایا لەهونەری شێوەكاریدا تابلۆمان هەیە لەسەر بنچینەی تایبەتمەندیێتی نەتەوەیی جیابكرێتەوە؟

+ تائێستا كورد نەیتوانیوە قوتابخانەیەكی هونەری دروستكات، وەكو قوتابخانەی هونەری ئەوروپی، یان ئیسلامی و یابانی و یان، هندی و ئێرانی و عەرەبی، بەڵام كورد توانیویەتی تابلۆی كوردی بخاتە پێش بینەری ناوخۆ، چونكە قوتابخانەی هونەری پێویستی بەیاساو رێككخستن هەیە، تابناسرێت لەجیهاندا .

_ تا ئێستا خاوەنی چەند پێشانگای كاری هونەریت؟ 

+ تا ئێستا خاوەنی پێنج پێشانگام لەئەڵمانیا ، پێشانگایەك لەساڵی ( 2015) لەگوندی قەشقە بۆ یادی ئەنفاكراوانی گوندەكەمان كرایەوە، منیش بە تابلۆكانم وەك هونەرمەندێك بە هەندێك لە كارەكانم بەشداریم كرد .

 

 

 

دیمانە / رابەر مەغدید

سارا رەحیمی بەهرەمەند لەبواری جل و بەرگ و مۆدە وڵامی پرسیارەكانی رێگای كوردستانی دایەوە.

-كارەكانت رچەشكێنە، ئەمە خولیایە یان پیشە؟

+سەرەتا خولیا بوو بەڵام ئێستا چونكە بارودۆخ گۆڕانی بەسەردا هاتووە خەریكە دەبێتە پیشە، منیش هەوڵمداوە داهێنان لەنێو ئەم فاشیۆنەدا بكەم و جوانییەكان وەكو خۆیان و بەستایلێكی كوردەواریەوە دەرخەم.

-فاشیون بووەتە پیشە لە هەرێم؟

+بەڵێ‌ هەروەك گوتم لە سەرەتاكانی بە پیشە بوونی دایە.

-لەچ بوارێكی دیدا خۆت دیتۆتەوە؟ مەبەستم بوارەكانی دیداری رۆژنامەوانی یان تیفی؟

+بێژەری و كاری نواندن هەردووكیان لەخۆمدا دەبینمەوە بۆیە سەرقاڵی هەردوو كیانم هەوڵیش دەدەم سەركەوتوو بم تیایاندا.

 

-كلتوور رێگر نییە لەبەردەم كارەكانت؟

+ئەگەر خۆمان وابەستەی كلتوور بكەین ناتوانین داهێنان درووست بكەین بۆیە هەوڵمداوە كلتوور نەكەمە رێگر زیاتر نوێخوازیم هەڵبژاردووە.

-پاڵپشتی خانەوادەكەت چۆن هەڵدەسەنگێنی؟

+هه موویان پشتگیریم لێده كه ن ده سخوشیان لێده كه موو زۆرم خوش ئه وین هەربۆیە هەست بەسەركەتن و بەردەوام بوون دەكەم.

-توانیوتە كاریگەری لەسەر هاورەگەزەكانت جێبهێڵی؟

+زور سوپاسی هه موان دەكەم من به پالپشتی ئەوان سەركەوتوم، هەست دەكەم هاورەگەزەكانیش دەخوازن وەكو من بن بەڵام ئەو كلتوورەی باست كرد بووەتە رێگر، بەڵام لە ئایندەدا دڵنیام ئەوانیش ئەو رێچكەیە دەشكێنن و كارەكانی من و هاوشێوەكانم فراوانتر دەبێت.

شێوەكار (بەشدار نوری) لە دیمانەیەكدا تایبەت بە رێگای كوردستان: تیشكی خستەسەر ئەو كارە هونەرییانەی كە لەماوەی چەند ساڵی رابردوو لەماوەی هونەری شێوەكاریدا ئەنجامیداوە.

رێگای كوردستان: كورتەیەك لە ژیانی تایبەتی خۆت؟

بەشدار نوری: من لە دایكبووی شارۆچكەی ( رەواندوز ) و دانیشتوی شاری هەولێرم، هەروەها لەساڵی 2001 دەرچووی پەیمانگای هونەرە جوانەكانی هەولێر، دوای ئەوە كۆلێژی هونەرە جوانەكانی شاری سلێمانی لە ساڵی 2005 تەواوكرد، ئێستا مامۆستای هونەری لە كۆلێژی هونەرە جوانەكانی شاری هەولێرم، بێجگە لەوەش بەڕێوەبەری سەنتەری هونەری "ئێستا" كە وەكو رێكخراویكی هونەری سەربەخۆ كار دەكەین. بەژداری گەلێك پێشانگای دەرەوە و ناوەوی هەرێم بە دەست هێنانی چەندین خەڵاتی هونەری و رێزلێنان كە هەوڵمداوە بە هەموو توانایەكمەوە خزمەتی ڕۆڵەی كورد بكەم، كاری هونەریم وەك ئەركێك گرتووە كە هەرچی ئازارەكانی ملەتەكەم بگەیەنمە تەواوی دونیا چونكە ئێمەی كورد هیچمان كەمتر نیە لە نەتەواكانی تر بەڵكو زۆر زیاترین.

رێگای كوردستان:  لە ئێستادا بە چییەوە سەرقاڵی؟

بەشدار نوری: لە ئێستا دا سەرقاڵی كۆمەڵێك پڕۆژەی هونەریم كە كاریان لەسەر دەكەم رەنگە لە داهاتوویەكی نزیك ئەنجامیان بدەم هەوڵ دەدەم شێوازێكی نوێ بخەمە بەر چاوی بینەری شێوەكاری كە بە پێكهاتەی میدیا، تەكنەلۆژیا چۆن كاری تازەگەری ئەنجام دەدرێت.

رێگای كوردستان: بەرنامەی داهاتووت چییە؟

بەشدار نوری: بەرنامەی داهاتووم بریتیە لە پێشانگایەكی هاوبەش لەگەڵ كۆمەڵێك هونەرمەند كە لە سەر چەمكی ( سڕینەوە ) كار دەكەین كە بەشێوازی مۆدێرن ئەنجام دەدرێت.

رێگای كوردستان:  لە 10 ساڵی رابردوو هونەری شێوەكاری چۆن دەبینیت لە كوردستان؟

بەشدار نوری: ئەگەر بگەڕێیەنەوە بۆ دواوە، لە دەساڵی رابردوو كۆمەڵێك ئەزموونی باش هاتە كایەوە هەروەها جموجۆڵی هونەری هەبووە، بەڵام ئەوەی گرنگە بوترێت تێگەیشتن لە مانای هونەر و لە ئەستۆگرتنی ناوەندە هونەریەكان لە ئاستی پێویست نەبووە، چونكە كەمتر خزمەتی ئەو بوارە كراوە جیا لە بوارە هونەریەكانی تر، ئەوەش دەگەڕێتەوە بۆ ئەوەی هونەری شێوەكاری زیاتر هونەری تاكیە، ئەو دوایەی كە ئەو كارەساتە بەسەر گەلەكەمان داهات و دروست بوونی قەیران لە دوای قەیران بەجاری هونەر لەم وڵاتە پەكی كەوتووە، ئەوانەی كاری هونەری دەكەن لە ئێستادا بە پەنجەی دەست دەژمێردرێن ، دەبوا لە رۆژگارێكی وەك ئێستادا هونەرمەندان ڕۆڵی بەرچاویان گێڕابا لە گۆڕپانی هونەری چونكە مێژوو هەمیشە دوبارەبوونەوەیە بەڵام بە بەرگێكی تازە .

دیمانە: رابەر مەغدید

 

+لەشولاری جوان جێگەی سەرنجە، تۆ چۆن دەتوانی ئەو سەرنجانەلەنێو نمایشی جلوبەرگدا بۆ خۆت راكێشی؟

-لەشولاری رێك گرنگترینە بۆ ئێمەی مۆدێل لەبەر ئەوەی دەبێت بەجوانترین شێوە دەربكەوین ئەگەر نا ناتوانین بەلەشولاری نارێك نمایش بكەین.

+ئەو ستایلەی بەرێزتان لەلای ئێمە زۆر نوێیە ،هیچ پەیمانگا یان قوتابخانەیەكی تایبەت مەندت تەواو كردووە؟

-نەخێر لەهیچ شوێنێكی تایبەت بە بوارەكەم نەمخوێندوە لەبە رئەوەی لەوڵاتی ئێمە گرنگی بەو بوارە نەدراوەو شوێنێكی وامان نییە.

+كلتوری ئێمە نەبۆتە رێگر لەبەردەمتان؟

-بێگومان بەهۆی كلتورمانەوە رێگریەكان زۆرن ئەوەش بوەتە هۆی ئەوەی نەتوانین وەك مۆدێلانی وڵاتانی دیكە كار بكەین ئەگەر چەند خاوەن تواناو بۆچونی كاركردنی جوان بین.

+كێَن ئەوانەی هاندەرتن بۆ نمایشی جلوبەرگ؟

-ئەوەی هاندەرمە تواناو حەزی خۆمە بۆ بەردەوام بوونم

+پیشەیە یان حەز؟

-لە وڵاتی ئێمە هونەرو وەرزش وفاشیون نەبونەتە پیشە تەنها خزمەتكردنێكە وە تواناو حەزە بۆ ئەو كارە هیوادارم ئێمەش بتوانین وەك پیشە بەكاری بهێنین.

+دەخوازی لە ئایندەدا فاشیون ببێتە دیاردە لە كوردەواریدا؟

-هیوام وایە كە فاشیونش ئیتر ببێتە بەشێكی گرنگ وەك بوارەكانی تر ئێمەش هیچمان لەوڵاتانی تر كەمتر نیە كە خاوەن براندو فاشنی تایبەت بەخۆیانن.