ئەم هەواڵە بڵاوبكەوە
FaceBook  Twitter  

 

کۆشش بەکر

شەممە ٢٤ ی ئازاری ٢٠١٨ لە هۆڵی ئازادی لە شاری سلێـمانی ،ڕێکخستنی شاری سلێمانی حزبی شیوعی کوردستان، کۆبونەوەیەکی فراوانی دەربارەی پرسە هەنوکەییەکانی کۆمەڵگە و، خراپی گوزەرانی خەڵک و، هەڵکشانی ناکۆکی و ململانێ هەرێمایەتی و جیهانییەکان ئەنجامدا.

لە کۆبونەوەکەدا هاوڕێ حەسەن مەحمود، بەرپرسی ڕێکخستنی شاری سلێمانی حزبی شیوعی ڕایگەیاند ، بۆ ڕوبەڕوبونەوەی تەحەدییەکان بەردەوام جەختمان لە یەکڕیزی نیشتیمانی کردووەتەوە، لە ماوەی ڕابردوشدا هەوڵی لیستی هاوبەشماندا بۆ هەڵبژاردنی عێڕاق، بەڵام لە پێناو بەرژەوەندییەکانی خۆیان لایەنە سیاسییەکان بە دەنگ داواکارییەکەی حزبی شیوعییەوە نەهاتن.

دواتر هاوڕێ فاخر زاهیر، بەرپرسی مەکتەبی شەهیدانی حزب لە سلێمانی ڕایگەیاند، گرنگە هەموان بەشداری لە هەڵبژاردنەکاندا بکەن و هەوڵی گۆڕانکاری ڕیشەیی بدەن، لەو پێناوەشدا پێویستە سەرجەم هاوڕێیان کارتی ئەلکترۆنی دەنگدان نوێبکەنەوە.

هاوڕێ شلێر عەبدولمەجید، ئەندامی مەکتەبی سیاسی حزب و مامۆستای زانکۆ، بەشداری کۆبونەوە فراوانەکەی کرد و ڕایگەیاند، وەک حزبی شیوعی بۆ هەڵبژاردنی پەڕلەمانی عێڕاق لە سنوری بازنەی سلێمانی لیستێکی ئافرەتانمان دروستکردووە ،ئەوەش لە ڕوانگەی حزبی شیوعییەوەیە بە تواناکانی ئافرەتان و، وەک یەکێک لە شێوازەکانی تێکۆشان بۆ دروستکردنی هاوسەنگی لێی دەڕوانین.

لە کۆتایشدا مامۆستا ژیان سەعید قەرەداغی خانمە شاعیر و چالاکوانی ئافرەتان ئاماژەی بۆ ئەوەدا حزبی شیوعی بە درێژایی مێژوو خۆی لە بەڵێنی ناڕاست بە خەڵک پاراستووە و بە پێچەوانەوە بەردەوام و بە کردار هەوڵی بەدەستهێنانی مافاکانی چین و توێژە جیاجیاکانی داوە و هەردەم لە بەرەی خەڵکدا بووە.

 

 

چالاکی حزبی