ئەم هەواڵە بڵاوبكەوە
FaceBook  Twitter  

بەختیار سدیق

ڕێككەوتی 23/6/2018 یادی 55 ساڵەی شەهید بوونی 28 تێكۆشەر و ڕۆشنبیر و پارێزەر و چیرۆكنووس و ڕۆژنامەنووس و وەرگێڕ و ئاوازدانەر و پلەداری سەربازی و كرێكار و كەسایەتی كۆمەڵایەتی .. شەوی 22 لەسەر 23ی حوزەیرانی 1963 لەلایەن كودەتاچییەكان و بەعسییەكانەوە لە سێدارە دەدرێن .. بۆ نانەوەی ئاژاوە و چاندنی تۆی دووبەرەكی و تێكدانی گیانی برایەتی و پێكەوە ژیان و ئاشتی لەشاری كەركووك ئەو 28 تێكۆشەرە شیوعییە بە عامود و كۆڵان و شەقامەكانی كەركووك دا هەڵدەواسن..

ئەو كردەوە دڕندانەیە لەمێژووی شاری كەركووك دا گەورەترین تاوان بوو كە بە ناڕەوا و ناحەق ئەنجامدرا دەرحەق بە پۆلێك تیكۆشەری شاری كەركووك.

بەڵگە مێژووییەكان و گەواهیدەرانی ڕۆژی خۆپیشاندانەكە ئەو ڕاستییە پشت ڕاست دەكەنەوە كە ئەم تێكۆشەرانە لە هەوڵی هێوركردنەوەی بارودۆخەكەدابوون و پاشەكشەیان بە خەڵكەكە كردووە و هەوڵیان داوە ئەو فیتنەیەی كە دروست كرابوو ڕێگە لێبگرن..

پیلانەكە هێندە گەورە بوو بەئاسانی كۆنترۆڵ نەدەكرا، بۆیە كارەساتە خوێناوییەكەی كەركووك روِویدا كە نەدەبوو ڕووبدات بەتایبەتی لەكەركووك دا پێكهاتەی شارەكە فرنەتەوەیی و فرەئاین و فرەمەزهەبە.

عەبدولكەریم قاسم نەیتوانی ڕۆڵی باش بگێڕێت و چارەسەری بارودۆخەكە بكات، بەبێ‌ گویدانە واقیعی ڕووداوەكە كەوتە گرتن و زیندانی كردنی كۆمەڵە تێكۆشەرێكی شیوعی. لەم بارەیەوە عەزیز محەمەد دەڵێ‌: ساڵی یەكەمی شۆڕش نێوانمان خۆش بوو لەگەڵ عەبدولكەریم قاسم، بەڵام وردە وردە ئەو پەیوەندییە گۆڕا و ئەو دەترسا لە ڕۆڵی شیوعییەكان بەتایبەتی لەڕووی سیاسەتی ئابوریمان، بۆیە لەڕووداوی كەركووك دا 15 ڕۆژ دوای ئەوە لە كەنیسەی ماریوسف لە 29ی تەموز هێرشی خراپی كردە سەرمان.. تەنانەت ئەو كارەكتەرە ئافرەتەی ئامادە كرابوو ئەكتەرێكی باش بوو بۆ ڕۆڵ بینین و قەناعەت پێكردنی كە لەبەردەم عەبدولكەریم قاسم ویستی خۆی ڕووت بكاتەوە تا بڵێت ئەوە شیوعییەكان ئاوا جەستەیان ئەشكەنجەداوم، بۆیە عەبدولكەریم قاسم ڕێگەی پێنەدا خۆی ڕووت بكاتەوە، بڕوای بە ژنەكە كردبوو بە هەموو ئەو تۆمەتانەی خرابوونە پاڵ حزبی شیوعی..

هاورَێ‌ عەزیز محەمەد ئەوكات ئەندامی مەكتەبی سیاسی و بەرپرسی ڕێكخستنی كوردستان بوو، لەناو ڕووداوەكەدا ژیاوە و ئاگای لەكۆی پرسەكە هەیە.. دەڵێت 14/6/1959 یەكەم یادی سەركەوتنی شۆڕشی 14 تەموز بوو، لە كەركووك توركمانەكان داوایان دەكرد كەژاوەی ڕێوڕۆشتنەكەی ئەوان بەتەنیا بێت، هەرچەند ئەمە ئاساییە و مافی خۆیانە لەكاتی ڕۆشتنی مەراسیمی ئەوان تەقەیان لێكرا و كەس نەیزانی ئەو تەقانە كێ بوون..

عەبدولكەریم قاسم نابەرپرسانە چووە ناو كێشەكە و دادگای عێراقی ئەوكاتە دادگای پیاوە شۆڕشگێڕ و تیكۆشەرەكانیان كرد، دەیان گەواهیدەریان بردە بەردەم دادگا و گەواهی ناڕەوایان لەسەر تێكۆشەرە شیوعییەكان دا، ئەو تێكۆشەرانە لەزیندان مانەوە تا كودەتا شومەكەی 8/2/1963 عەبدولڕەحمان عارف و عەبدولسەلام عارفی برایی و بەعسییە شۆفینییەكان جڵەوی دەسەڵاتیان وەرگرت و عەبدولكەریم قاسم كوژراو ئەو دەسەڵاتە لەسەرانسەری عێراق دا كەوتنە ڕاوەدونان و گرتن و زیندانی كردن و لەسێدارەدانی شیوعییەكان.. هەر لەو ساڵەدا لە 7/3/1963دا سەلام عادل سكرتێری حزب و جەمال حەیدەری و عەبەلی ئەندامانی مەكتەبی سیاسی لە سێدارە دەدرێن..

بەعسییەكان ئەوەیان بەهەل زانی و ڕێككەوتی 23/6/1963 سەرجەم 28 تێكۆشەرە شیوعییەكە لەسێدارە دران، بەو ئامانجەی ژیانی برایەتی و پێكەوەژیانی نێوان نەتەوەكانی كەركووك ئارامی بەخۆیەوە نەبینێت.

  • 1