ئەمە بڵاوبكەوە
FaceBook  Twitter  

لە ده‌هه‌مین گۆنگره‌ی ئه‌نجومه‌نی گه‌ل كە لە سوید به‌سترا، هاوڕێ نه‌رمین نه‌جمه‌دین مامۆ وه‌ك نوێنه‌ری حزبی شیوعی كوردستان ووتارێكی خوێندەوە كە ‌ ئه‌مه‌ ده‌قه‌كه‌یه‌تی:

من وەکو نوێنەری پارتی کۆمۆنیستی کوردستان له‌ باشور پیرۆزبایی ده‌هه‌مین گۆنگرەی مەجلیسی گەلتان لێ دەکەم ... هیوادارم سەرکەوتو بن.

ئێمە وەکو پارتی کۆمونستی کوردستان لە هەر هەلومەرجێکدا جەخت لە سەر یەک ڕیزی و تەبایی حزب‌ و لایەنە سیاسیەکانی‌ کوردستان و یەکخستنەوەی نێو ماڵی کوردستانیان دەکەینەوە.

هەموومان دەزانین ململانێ و کێشە و ئاڵۆزیەکانی نێو ریزی حزبە سیاسیەکان چ کاریگەریێکی نێگەتیڤانەی خستۆتە بەردەم گەیشتن بە مافە ڕەواکانی گەلەکەمان لە هەر چوار پارچەی کوردستان .

ئەوەی لەم دوایانە بەرامبەر بە ڕۆژئاڤا رویدا پیلانێکی نێودەوڵەتی بوو هەوڵی لە باربردنی ئەو تاقیکردنەوە شۆڕشگێڕیە بوو کە بە ئیرادە و تێکۆشان و خوێنی شەهیدان هاتۆتە کایەوە ...

داگیرسانی گڵۆپی سەوز بوو بۆ تورکیای داگیرکەر کە هێرشی دڕندانە بکاتە سەر خەڵکی قارەمان و خۆڕاگری کوردستانی ڕۆژئاوا ...

لای هەمووان ڕونە کە تورکیا بەنیازە سیاسەتی پاوان خوازی پەرە پێبدات و لەهەمان کات ئەو ترسەی هەیەتی لەتوانا و ئیرادەی شەڕڤانان و خەڵکی شۆڕشگێڕ بڕەوێنێتەوە...

ئەوەی جێگای سەرسوڕمانە ، بێدەنگی کۆمەڵگای نێودەوڵەتیە لەو کارەساتانە ... خەڵکی کوردستانیش بەهەموو شێوەیەک جینۆساید دەکرێ.

بەڕێزان / دەبێ بزانین هەمیشە ووڵاتە زلهێزەکان بەتایبەت ئه‌مریکا هەرگیز دۆستی گەلان نەبوە و نابێ بەتایبەت لەم کات و ساتە هەستیارەدا کە دۆزی ڕەوای گەلی کوردستان لە مەترسیدایه‌ ...

زەمەنێکی زۆر نیە بینیمان لە که‌رکوک و ناوچە دابڕاوەکانی باشور حکومەتی ئێراق بەهاوکاری ئێران و بە چەکی ئه‌مریکی و بە بەر چاوی دنیاوە بە ڕازی بوونی خودی ئه‌مریکا چ هێرشێکی دڕندانەیان ئەنجام دا و چۆن ئەو شوێنانەیان داگیرکردەوە ، هەروەها سوپای تورکیای فاشی بە چ شێوەیەک و دور لەهەموو بەها مرۆیەکان عەفرینیان داگیرکرد ... ئەمڕۆ ئەم کارەساتانە ئەوەمان فێر دەکەن کە دەبێ پشت بە ئیرادەی گەلەکەمان ببەستین و هاوپەیمانی نێوان هێزە نیشتیمانی و شۆڕشگێڕو پێشکەوتوخوازەکان دروست بکەین ... دەبێ دڵنیابین هەر یەک لەووڵاتانی دراوسێ و ناوچەکە و ووڵاتە زل هێزەکان سه‌لماندیان جێگای پشت پێ بەستن نین .

بەردەوام بێت تێکۆشانی شۆڕشگێڕانەی گەلی کوردستان سەرکەوتو بێت پرسی ڕەوای گەلەکەمان ... لە هەر چوار پارچەی کوردستان .

Image may contain: one or more people and people standing

 

چالاکی حزبی