ئەمە بڵاوبكەوە
FaceBook  Twitter  

خەباتى جەماوەرى مەدەنیانە
لە پێناو چاکسازى راستەقینە

بە مەبەستى تاوتوکردنى بارودۆخى سیاسى ، کۆمیتەى ناوەندى لە 25ى کانونى دووەمى 2020 و لە هەولێرى پایتەختدا کۆبوونەوەى خۆى سازدا .
کۆبونەوەکە بەماوەیەک وەستان بۆ رێزلێنان لە شەهیدانى حزب و گەلى کوردستان دەست پێکرا ، وە تیایدا راپۆرتى سیاسى ئامادەکراو گفتوگۆى کرا .
عێراق لە دواى 25ى تشرینى یەکەمى 2019 ەوە ، پرۆسەى سیاسى لە سایەى خۆپیشاندان و ناڕەزایەتیەکانى گەلى عێراق بە هەموو چین و توێژەکانیەوە و بەتایبەت هەژاران و زەحمەتکێشان بەرەو قۆناغێکى نوێ هەنگاوى ناوە ، کە هەوڵدانە بۆ کۆتایى هێنان بە حکومرانێتى تایفەگەرى و بەش بەشێنە .
ئەم خۆپیشاندانە ئەنجام بوو بۆ شکستە یەک لەدواى یەکەکانى حکومڕانى ، لەدواى رووخانى رژێمى دکتاتۆرى لە 2003 ، و لەسەر دەستى هێزەکانى هاوپەیمانان ، و داگیرکارى وئەو دواى کابینەکانى تر . کە نەیانتوانى عێراقێکى نوێ لەسەربنەماى دەوڵەتى مەدەنى دیموکراسى و مافەکانى هاوڵاتیبوون و ئازادیەکان بنیات بنرێت کە بانگەشەوى بۆ دەکرا لەسەردەمى ئۆپۆزسیۆن بوندا .
لە ئەنجامى بێ هیوا بوون لەو شێوازەى حوکمرانێتى ، دروشمى خۆپیشاندانەکان لە داواکارى بۆ ئازادیە سیاسیەکان و مافە ئابوورى و خزمەتگوزارى و چاکسازییەوە گۆڕا بۆ رووخاندن و کۆتایى هێنان بەو سیستمەى حکومڕانى .
لەسەرەتاى گۆڕانکارى ساڵى 2003 بەدواوە و دەست تێوەردانى دەرەکى و ململانێى نێوان ئەمریکا و ئێران ، و هەوڵدانەکانى هەر لایەکیان بۆ فراوانکردنى پێگەى سیاسیان لە نێو کوتلە و هێزە سیاسیەکانى دیار ، وایکردوە کە عێراق ببێتە گۆڕەپانى ململانێى ئەم دوو جەمسەرە و ، دروستبونى شەڕ لە نێو خاکى عێراقدا ، کە باجەکەى گەلى عێراق دەیدا .
کۆبوونەوە لایەنگرى خۆى بۆ داخوازیە رەواکانى خۆپیشاندەران پیشاندا ، بۆ دامەزراندنەوەى حوکمرانیەتیەک لەسەر بنەماى هاوڵاتیبوون و پەلەکردن لە پەسەندکردنى پاڵێوراوێکى سەربەخۆى پاک و نیشتمانپەروەر کە جێى رەزامەندى خۆپیشاندەران بێت ، تا کاربکات بۆ بەڕێوەبردنى ئەرکەکان بۆ هەڵبژاردنێکى ئازاد و دیموکراسیانەى پێش وەختە لە ژێر چاودێرى نەتەوە یەکگرتووەکان ، یان هەر دەستەیەکى بێلایەندا .. و گۆڕینى یاساى هەڵبژاردن بەشێوەى عێراق ببێتە یەک بازنەى هەڵبژاردن و دیاریکردنى دەستەى باڵاى هەڵبژاردنەکان لە کەسانى پسپۆر و بێلایەن ، نەک بە شێوازى رابردوو ، کە نەیتوانى خۆى رزگار بکات لە بەش بەشێنە و تایفەگەرى .
ئەرکى سەرجەم هێزە سیاسیەکانى عێراقە کە کاربکەن بۆ رێککەوتنى سیاسى بۆ تێپەڕاندنى ئەم دۆخە ئاڵۆزە و دارشتنى سیاسەتێکى هاوسەنگ لەگەڵ دەوڵەتان و دونیا و هەرێمایەتى لەسەر بنەماى بەرژەوەندیە هاوبەشەکان و دورخستنەوەى ووڵات لە ململانێى و شەڕى بەوەکاڵەت .
لەبەشێکى ترى کۆبوونەوەکەدا ، تایبەت بوو بەگفتوگۆ لەسەر بارودۆخى نوێى هەرێم ، لەبەر رۆشنایى گۆرانکارى نوێیەکانى عێراق و ناوچەکە ، کە جۆرێک لە سۆز و دۆستایەتى نوێ بۆ هەرێم دروستبووە ، و وادەخوازێ کە بەگیانێکى بەرپرسیارانەى نیشتمانیانە ، کار بۆ پاراستنى هەرێم بکرێت بۆ بە دوورگرتنى لە شەڕ و ململانێى هێزە ناکۆکەکانى ناوچەکە و راگرتنى هاوسەنگى ، و کارکردن بۆ دروستکردنى پێوەندى دۆستانە لەگەڵ بەغدا لەسەر بنەماى بەرژەوەندییە هاوبەشەکان کە دەستورى عێراق زامنى کردوون . و گرتنە بەرى سیاسەتێکى ژیرانە لەگەڵ دەوڵەتانى هەرێمایەتى کە بناغەکەى بەرژەوەندى هاوبەش بێت و خۆ بە دوورگرتن لە چوونە سەنگەرى لایەک دژ بەلایەکى تر ، کە جگە لەکارەسات و ماڵوێرانى بەرهەمێکى ترى نابێت .
کۆمیتەى ناوەندى وێراى داکۆکى کردن لەسەر بڕیارى رابردووى حزب ، لەبەردەوامى تێکۆشان و بژاردەى ئۆپۆزسیون بوون و کارى هاوبەش لەگەلڵ سەرجەم لایەنە کوردستانیەکاندا و بە تایبەت هێز و کەسایەتى چەپ و دیموکراسى ، لەپێناو گەشەدان بە بزوتنەوە جەماوەرییەکان بۆ ڕاستکردنەوەى ئەرکەکانى حوکمڕانێتى باش و بەدامەزراوەیى کردنى دام و دەزگاکانى حکومەت و پێشکەشکردنى خزمەتگوزارى و چاککردنى بژێوى ژیان و پێکەوە ژیانى ئاشتیانە و فراوانکردنى ئازادییە سیاسیەکانى کردەوە .
کۆبوونەوەکە هەڵویستەى جدى کرد لەمەڕ دوا یاساى پەرلەمانى کوردستان ، و هەوڵەکان بۆ چاکسازى لە مووچە و خانەنشینیدا ، وە ئەگەرچى هەندێک ئەشکالیەت لە چۆنیەتى بڕیار وەرگرتن و دیاریکردنى هەڵوێستى حزب لەسەر ئەم یاسایە و پرۆژەکە هەبوو لەو باوەڕدایە کە یاساکە بەگشتى هەنگاوێکە لەسەر رێگایەکى درێژى چاکسازیدا ، بەتایبەت لەرووى کەمکردنەوەى مووچە زۆرەکانى بەناو پلە باڵاکان و مانەوەى ماف و ئیمتیازاتى بەشێک لە قوربانیانى تێکۆشانى نیشتمانى لە شەهیدان و کەم ئەندام و زیندانیانى سیاسى ، بەڵام بەکۆى یاساکە لە ئاستى چاوەڕوانى ئێمەدا نەبوو ، هاوکات بەهەنگاوێک سەیرکرا لەسەر رێگاى چاکسازیدا .
کۆبوونەوە ئەوەى خستە روو کە کەموکوڕى زۆر لە یاساکەدا هەیە لە نمونەى دیارى نەکردنى کەمترین مووچەى خانەنشینى کە لە (500) هەزار دینار کەمتر نەبێت و دیارى نەکردنى مووچەى پلە باڵاکان پێش بڕیاردان لەسەر رێژەى خانەنشین بوونیان ، و لە کاتى خزمەتدا ، و کۆتایى نە هێنان بە دیاریکردنى ژمارەیەکى بانکى بۆ سەرجەم مووچە خۆران ، بۆ سەرفکردنى مووچە پاشەکەوتکراوەکانیان لایەنى کەم بۆ دانەوەى قەرزە جۆراجۆرەکانى حکومەت لەم قۆناغەدا ، و جێکردنەوەى کارکردن بە یاساى خانەنشینى عێراقى ژمارە (9) .. و تاد .
لەبەر رۆشنایى هەبوونى کەموکورتى زۆرى یاساکە ، بڕیار وەرگیرا بۆ ئەنجامدانى چالاکى جەماوەرى مەدەنیانە لەلایەن رێکخراوەکانى حزبەوە ، بۆ تەواوکردنى هەموو ئەو بەندانەى کە پێویستیان بەچاکسازى هەیە ، و کارکردن بۆ ئەوەى چاکسازى لەسەرجەم بوارەکاندا ببێتە پرۆسەیەکى بەردەوام کە رەچاوى بەرژەوەندییەکانى گەلەکەمان بەگشتى و هەژاران و زەحمەتکێشانى تێدا بکرێت .

 

چالاکی حزبی