ئەمە بڵاوبكەوە
FaceBook  Twitter  

بژی یەکی ئایار،

رۆژی بەرەنگاربوونەوەی سیستەمی سەرمایەداری و سیمبولی خەباتی نێونەتەوەیی چینی کرێکار!

ئامادەبووانی بەڕێز

سەرەتا بەبۆنەی رۆژی جیهانی کرێکارانەوە، گەرمترین پیرۆزبایی لەخۆمان و له‌ئێوه‌و لە تەواوی کرێکارانی جیهان و کوردستان دەکەین.

ساڵانە لە١ی ئایاردا، چینی کرێکارو سۆسیالیستەکان، لەشوێنە جۆراوجۆرەکانی جیهان، هێزی چینایەتی خۆیان لەپێناوی ئازادی و یەکسانی و خۆشگوزەرانیدا، نمایش دەکەن. ئەم رۆژە رۆژی چینێکی جیهانیە، کە پشتبەستوو بە هێزی کاری ئەو، وە بەبەشداری راستەوخۆی ئه‌و لەبەرهەمهیناندا، ژیان و پێداویستیەکانی زیندوومانەوەی کۆمەڵگا دابین دەبێت، چینێک کە له‌ مێژوودا رۆڵی گەورەی گێڕاوە لە پێشخستنی کۆمەڵگاو بەشی زۆری دەسکەوتەکان بە رەنج و ماندووبوونی ئەو بەدەستهاتوون، که‌چی خۆی له‌ریزی بێ به‌شانه‌.

١ی ئایار، سەرەتا لەپێناو خواستی (٨) کاتژمێر کاری رۆژانە، دەستی پێکرد، سیستەمی سەرمایەداری، لەگەڵ سەرهەڵدانی خۆیدا، کرێکارانی کردە کۆیلەی کار. زۆری ماوەی کارکردن و کەمی هەقدەست و سەختی هەمومەرجی کار، بۆ چەند سەدە ئەم چینەیان لەمەنگەنە دابوو، لەسەدەی ١٩دا، کەمکردنەوەی سەعاتکار بوو بە یەکێک لە داخوازیە سەرەکیەکانی چینی کرێکار، پەرەسەندنی باوەڕی سۆشیالیستی لەناو کرێکارانداو بڵاوبوونەوەی ئامانجی سۆسیالیستی وەک رێگەچارەیەک بۆ کۆتاییهێنان بە چەوسانەوەو ستەمکاری، زەمینەی ئەوەی فەراهەمکرد کە کرێکاران متمانە بە هێزی خۆیان بێنەمەیدان، کە دواتر شۆڕشە مەزنەکانی سەدەی ٢٠ی بەشوێندا هات، بەو پێیە ١ی ئایار، سەرهەڵدانێکی شۆڕشگێڕانە بوو لە به‌رامبه‌ر ستەمکاریەکانی سەرمایەداری و بەرەوپێشبردنی خەبات لەپێناو باشتركردنی هەلومەرجی کارو ژیان و بەدیهێنانی ئازادی و یەکسانی و خۆشگوزەرانی دا، ئەم رۆژە، بوو بە سیمبولی ناڕەزایەتی بەكۆمەڵ و تێکۆشانی بزووتنەوەیەکی شۆڕشگێرانە، کە دژ بە سیستەمی سەرمایەداری هاتە مەیدانی خەباتی سیاسی و بوو بە ئاڵا هەڵگری رزگاری کۆمەڵگا.

ئەمڕۆ لە سایەی دەسەڵاتی سەرمایەداریدا، شەڕو هەژاری و برسێتی و بێکاری، کاره‌ساتی سروشتی حساب بۆنه‌کراو، بەرۆکی بە سەدان ملیۆن ئینسان گرتووە. سەرەڕای پێشکەوتنی گەورەی پیشەسازی و تەکنۆلۆژی و زیادبوونی توانای بەرهەمهێنان، لە زۆر شوێنی جیهان کرێکاران رۆژانە زیاتر لە (٨) کاتژمێر کاردەکەن و ژیان و بژێویان لەئاستێکی نزمدایە، ئەوە لەکاتێکدا سەروەت و سامانی چینی بۆرژوازی بەپێی دوایین ئامارەکان رۆژانە دوو ملیار دۆلار زیاد دەکات. سەرمایەداری لەپێناوی قازانج و بەرژەوەندی کەمایەتیەکی دەوڵەمەندو چاوچنۆک، تەواوی کۆمەڵگای خستۆتە گێژاوی خۆیه‌وه‌ و رۆژانە تراژیدیای دڵتەزێن لە شەڕو برسیەتی و ئاوارەیی و بێکاری و نەداری دەبینین کە هاوکات بەناوی ئاوەدانکردنەوەو فریاگوزاری و مرۆڤدۆستیەوە رێکخراوەکان و دامودەزگاکانیانی بۆ دەخەنە گەڕ، جیهان بەگشتی کراوەتە مەیدانی ململانێی وڵاتانی جۆراوجۆری سەرمایەداری و شانۆی بەیەکداکێشانی بزووتنەوە ژیانکوژەکان، داهات و ئیمکاناتێکی زۆر بەقوڕگی سیاسەت و پیلانگێڕیەکانی بۆرژوازیدا دەکرێت، ئەم سیستەمە ژیان و داهاتووی دانیشتوانی گۆی زەوی و تەنانەت گیانلەبەرو زیندەوەرەکانی تریشی خستۆتە بەردەم هەڕەشەی لەناوچوون و بە بیانووی " شەڕ دژی تیرۆرو ئاشتی جیهانی" چەندین و وڵات و ناوچە دوچاری گەمارۆی ئابووری و وێرانکاری و شەڕی خوێناوی کراوەو شوێنی کارو ژیانی خەڵک بوونەتە مەیدانی جەنگ.

کۆمەڵگای عێراق و کوردستانیش، سەرباری نا ئەمنی و نەداری و برسێتی و بێکاری و که‌می خزمەتگوزاریە سەرەتاییەکان، دەستی خاوەنکارو کۆمپانیاکان و سەرمایەداران بە تەواوی ئاوەڵایە بۆ چەوساندنەوەی لەرادەبەری کرێکاران، حیزبە بۆرژوازیەکان بە زۆری چەک دەستیان بەسەر داهات و دەسەڵات و سامانی گشتیدا گرتووەو کرێکاران و جەماوەری خەڵک لەو داهات و سامانە بێبەشکراوە و لەبڕیاری سیاسی دوورخراوەتەوە، لەماوەی (٢٨) ساڵی دەسەڵاتی هەرێمدا، دەیان یاسا بۆ پاراستنی بەرژەوەندی سەرمایەداران و خاوەن کۆمپانیاکان دەرچوێنراوە یان هەموار کراوە، بەڵام چینی کرێکاری کوردستان لە یاساکارێکی هاوچەرخ بێبەشەو ماف و بەرژەوەندییان بە تەواوی پشتگوێ خراوە.

لە بەرامبەر زوڵم و ستەمی بۆرژوازی کوردیدا، خەڵکی کوردستان بێدەنگ نەبوون و لەڕێگای مانگرتن، خۆپیشاندان و شێوازی دیکەوە ناڕەزایەتیان دەربڕیوەو بەدژی ناعەدالەتی و بێکاری و گەندەڵی و تاڵانکردنی داهات و سامانی گشتی، تێکۆشاون. لەسەر ئاستی جەماوەری متمانەیان لەو دەسەڵاتە سەندۆتەوەو مەحکوم بەرۆیشتنیان کردووە.

ئەم خەبات و ناڕەزایەتییانە پێویستە رێکخراوتر بن، لەهەموو ناوەندەکان و کارگەو فەرمانگەکان کۆبونەوەی گشتی بکرێت و رێکخراوەی سەربەخۆ دروست بکرێن، خواست و مافەکان گەڵاڵە بکرێن و بە یەکگرتوویی بەرگرییان لێبکرێت، لەسەر ئاستی سەراسەریش تۆڕی رێکخراوە جەماوەرییەکان پێکبێت و خەبات و ناڕەزایەتیەکان لەلایەن ئەم تۆڕو رێکخراوە سەربەخۆیانەوە رابەری و رێنوێنی بکرێن، چونکە تاکە رێگای گەیشتن بە مافەکانمان و رێگای پاراستنی شکۆو ماف و بەرژەوەندیەکانمان، تەنها رێکخراوبوون و یەکگرتن و هاوپشتی چینایەتی خۆمانە.

بەڕێزان

١ی ئایاری پار هاوکات بوو لەگەڵ پڕوپاگەندەی هەڵبژاردنی " ئەنجومەنی نوێنەرانی عێراق"، و ئەمساڵیش هاوکاتە لەگەڵ هەوڵی پێکهێنانی کابینەیەکی نوێی حکومەتی هەرێم و ئەو هێزو لایەنانەش کە لەم راستایەدا رکابەری دەکەن، هیچ لایەنگرییەکیان لە ماف و بەرژەوەندی کرێکاران و خەڵکی زەحمەتکێش نیەو تەواوی پرۆسەکە ململانێی نێوان چەند هێزێکی دەسەڵاتخوازە، بۆ مسۆگەر کردنی پشکی خۆیان لە تاڵانی و داهات و دەسەڵات. بۆیە پێویستە كرێكاران‌و خەڵکی زەحمەتکێش، کارمەندان و فەرمانبەرانی کەرتی گشتی و ژنان و لاوان و خوێندکاران و بەگشتی بەشە چەوساوەکانی کۆمەڵگا، پشت بەهێزی خۆیان و ببەستن و ریزی چینایەتی خۆیان رێكخەن لە پێناو گەیشتن بە ژیانێكی شایستە و ئایندەیەك كە ئازادی و یەکسانی فەراهەم دەهێنێت.

له‌کۆتاییدا هاوخه‌می و پشتیوانی خۆمان بۆ زیان لێکه‌وتووان و به‌رکه‌وتووانی لافاوی ئه‌مساڵ به‌ تایبه‌تی له‌ ئێران، نیشان ده‌ده‌ین و بێده‌ربه‌ستی و نابه‌رپرسیارێتی ده‌وڵه‌ت و ده‌سه‌ڵات له‌به‌رامبه‌ر کاره‌ساته‌ سرووشتیه‌کان، سه‌رکۆنه‌ ده‌که‌ین. 

وەرن با یەکی ئایاری ئەمساڵ بکەینە سەرەتای خەباتی رێکخراومان و سەرەتای زاڵ بوون بەسەر پەرشوبڵاویماندا. بەهیوای ئەوەی ئەم ئایارە ببێتە هەوێنی یەکێتی و یەکڕیزی و هاوخەباتی کرێکاران و جێکەوتن و پەرەسەندنی رەوتی سۆسیالیستی لەناو ئەم چینەو خەبات و تێکۆشانیدا.

پیرۆزبێت یەكی ئایار، ڕۆژی خەبات و هاوپشتی نێونەتەوەیی کرێکاری

بژی سۆشیالیزم

کۆمیتەی ١ی ئایار

٢٠١٩

چەپ وكرێكاری