ئەم هەواڵە بڵاوبكەوە
FaceBook  Twitter  

سەرتاپای خەیاڵی من دوورە لەوەرزی بێ مناڵ

دوورە لە دەنگی تفەنگ و

پیا هەڵدان بە قامەتی پڕ لە ڕیای بەهار .

ئەگەرچی باڵدار نیم

بەڵام ؛

ڕابردوم پڕە لە بیرەوەری فڕین

من لەخۆشەویستی خەڵکی کۆڵانەوە فڕیم

فڕیم ولەپشت خۆمەوە زۆرشتم جێ هێشت

لە پێناوی حەوانەی ئەژنۆی هیلاکی پردەکان

لەپێناوی ڕومەتی هەمیشە داخداری ساج

لە پێناوی 

چەپکێ ماچی سەرفرازی ئینسان

تا گەیشتم بە سەر بەرزترین لوتکەی کرماوی شار،

لەوێڕا

هەزار هەزار قومریم لێ دیاربوو

لە تۆفانێکی ڕەش هێلانەیان وێران ببوو

دەگریان و

خۆیان لە خوێنی عادەی داری لیمۆ وەردەدا.

لە لێواری ڕوبارێکی هاریش

هێشتا نیوەی زستان بوو

ماسیەکی پیرم بینی بەسەربەرزی گەرای دادەنا

لە وێوە لێم دیاربوو

پایز خۆی لە شەرمی گیانی ڕووتی دارستان

دڵی دەلەرزی و

لە پیش دەرگای ماڵی هەور

هێدی هێدی گۆرانی گەردەلولێکی بێ باکی لێ بەجێ دەما !

لێم دیاربوو

چرافرۆشێک لە سنووری هەوارێکی پڕ لەجەنازە

بارێک چرای لێ گیرابوو

لە نیوەی هەمان شەو 

لەبەرامبەر ماڵی دولبەرەکەی خەون لە گیرفانی دەڕژاو دەگریا،

سازێکم بینی لە سۆراغی پەنجەی قڕتاوی خاوەنەکەی

مۆرانەی زەرد لە دڵی دابوو

دارتاشێکی تێر 

لەبەرچاوی کچێکی قەیرە

هەزار تەوری لە گیانی سازەکە کوتا .

لە ناوەڕاستی هەورێک لە پێشبینی ئایندەی ئەم شارە

بەلەمێکم بینی ئاڵایەکی ڕەشی هەڵکردبوو

بەرەو وڵاتی مۆم دەپەڕیەوە

بارەکەی سرکەی ترێ 

پیرێژنێکی چاوتەنگ بە دەستێک گومان

بە دەستێک سەوڵی لە دەست گرتبوو،

گومان 

لە خەنەو لە سەحەری ساردی شار

لە بۆنی ماسی سەر عارەبانەو

لە توڕەبوون ونانی نیوەڕۆی کەناسەکان.

گومان لە لێوی بۆگەن وشمشاڵی دەستی سوڵتان

لە فانۆسی ماڵی شاعیرو

لە حەسحەسەکان

لە قازیەکان و 

لە وێنەی تەرازوی ناوەڕاستی هۆڵی دادگا.

گومانی ڕەش

لە تامی بەفرو ڕەنگی سپی

لە ویژدانی سڕبووی ڕوبار

لەزیزبوونی سەهۆڵی تواوەی

سەردیواری زیندان.

گومان لە کریاری پیاڵەو 

لێفەکانمان

لە شانەی گیرفانی پیاوێکی ئیماندار

لە قردێلەی دووڕەنگی پرچی مناڵەکەی

لە پاڕانەوەی نیوە شەوی ژنەکەی !

گومان لە بزمارو دەست وپەنجەی وەستای لانك

لە مەمکێکی خاڵیی

لە بەرائەتی نمەی باران

لە حەوانەوەی پەپولە 

لەسەر گەڵای شلکە گوڵی

حەوشی هەمیشە تازیەباری

ماڵی بێ دەرگای بەهار.

گومان

لە کچێنی دارمیوەکەی دراوسێمان

لە زاوابوونی کۆترە وون بوەکانی ماڵی خۆمان،

گومان لە گۆرانی تەپی خەڵک

لە خۆش باوەڕی رابردویان

لە کڕنوشی کوێرانەی ئیمڕۆ

ئەستێرەی کوژاوەی سبەی ڕۆژیان.

گومان 

لە گەیشتن بە کۆمەڵێک وەڵام و

هەوارێکی بێ 

گومان !

ساڵی ١٩٩٣