ئەم هەواڵە بڵاوبكەوە
FaceBook  Twitter  

ئامادەكردنی : رێگای كوردستان

سەلاح رەشیدی هونەرمەند وەك هونەرمەندێكی ناسراو چەندین ساڵە بەدەنگە خۆشەكەی گۆرانی دەچرێ‌، ئەو لە هەشتاكانداو لەگەڵ شەوكەت رەشیدی برای رۆڵێكی ئێجگار باشیان بینی لە پێشخستنی هونەری كوردی، تەلەفزیۆنی كەركوك مینبەرێك بوو بۆ پەخشكردنی ئەدای ئەو هونەرمەندانەو ئەوانیش زۆر بوێرانە توانیان ئەوەی هونەری كوردی دەیەوێ‌ لەوێدا بیكەن، ئەمجارەیان مامۆستا سەلاح میوانی ئەدەب‌و هونەرەو بەم شێوەیە لەهونەری ئەوساو ئێستا دەدوێ‌.

پێش راپەرین

ساڵانی هەشتاكان بۆ هونەری كوردی زۆر سەخت بوو، چونكە كۆسپ‌و فلتەرەكان هێندە زۆربوون، بەزەحمەت دەتتوانی كارێكی پڕ بەویستی خۆت ئەنجام بدەی، من لەشەستەكان لەگەڵ كۆمەڵێك هونەرمەندی دی لەسلێمانی تیپی سۆلافمان دروستكرد، لەم تیپەدا ئەندام بووم‌و چەندین كارمان ئەنجامدا.

خێزانەكەی ئێمە خێزانی هونەری بوو، باوكم نایژەن بوو شەوكەتی برام بەهۆی كارەكەیەوە گۆرانی بێژو مۆسیقاروئاواز دانەر بوو حەزی لە كەرنەڤاڵ و چالاكییە هونەرییەكان بوو، لەساڵی 1984 لەتەلەفزیۆنی كەركوك كاری دەكردو بەرنامەی ئارەزوومەندانی دانا، وەك ستۆدیۆی ئەستێرانی ئێستا، بەڵام بۆ ئەو زەحمەت بوو، هەرچەندە بەهۆی ئەم بەرنامەوە چەندین هونەرمەند ناسران، شاری كەركوك بووە مینبەرو تەلەفزیۆنەكەش ئاراستەكەی گۆردرا، بۆیە هێندەی نەبرد بەعسیەكان ئەم بەرنامەیان وەستاند، بەڵام خۆی مایەوە.

ساڵی 1986 بوو وەڵامی بۆ ناردمە سلێمانی كەمن‌و ئیبراهیم خەبات چەند ئاوازێك ئامادەكەین‌و ئەو دەتوانێ‌ بۆمان تۆمار بكات.

من (بەهاری عومرم‌و ئەستێرەی شەوان) كاك ئیبراهیم خەیاتیش (ئێمە گیانێكین‌و ئەگەر گەردوون) تۆمارمان كردوو ناوبانگی ئێمە لەم رێگەیەوە بڵاوبۆوە.

دیسانەوە بەعس بەمەی زانی‌و ئیدی هەر بەرهەمێكی دیمان دەبرد رەتدەكرایەوە برایەتی من‌و شەوكەت زۆر بەهێزبوو وەك هاوڕێیەك لەئاستی هونەردا یەكتریمان پێناسە دەكرد، من ئامێری نایم بەكاردەهێناو شەوكەتیش ئاواز دانەرو گۆرانی بێژبوو هانی بەردەوام بوونی دام، چونكە ئەو دەیزانی توانایەك لای من هەیە.

ساڵانی شەست‌و حافتاكان دواتر لە هەشتاكان بۆ من ئەو سەرەتایانە بوون، كە لەسلێمانی‌و هەولێرو بەغدا بەشداری ئاهەنگەكان بكەم بناسرێم ئەوەش ئەو هاندانانە بوو كە شەوكەتی برام لەپشتمەوە وەستابوو.

لەساڵی 1966 لەسلێمانی كۆمەڵەی هونەرە جوانەكان پێكهات لەژێر ناوی كۆمەڵ‌و هونەری وێژەی كوردی كە ئێستا كۆمەڵەی هونەرە جوانەكانی كوردە، ساڵانێك لەوێدا ئەندام بووم‌و چەندین گۆرانیم تۆماركرد.

سەردەمی دوای راپەرین

رۆژگاری سەربەستی هاتەكایەوە خەونی هەموومان هاتنە دی نەمتوانی ئەمندامیەتی لەهیچ گروپێكی هونەری وەگرم، بۆیە نەلەهەولێرو نەلەسلێمانی هیچ كارێكی هونەریان بۆ نەكردم، بەڵام لەساڵی 1993 دا بۆ یادی حزبی شیوعی عێراق سرودێكم لەسەر 31ی ئادار داناو تائێستاش لێدەدرێتەوە، ئەم سرودە بەهاوكاری كاك (سەرباز جەمال) تۆماركرا.

دواتر بۆ رۆژی شەهیدی شیوعی سرودی (من بۆ شەهیدان چی بڵێم چاكە) داناو هەردوو تێكستەكە هی (حەسیب قەرەداغی) بوو، ئاوازەكانیش هی خۆم.

ستایلی نوێ‌

ئەگەر باس لەشێوازو ستایلی نوێ‌ بكەین هەست دەكەین لەپاشەكشەدایە، چونكە تێكست‌و ئاوازەكان لەگەڵ كلیپەكان ناگونجێن، تەنها سەماو سروشتی دەرەوەی هەرێم پیشان دەدرێت، بەگراوندەكان خۆماڵی نین، ئەوانەش خزمەت ناكەن، ئەگەرچی هەندێ‌ گۆرانی بێژی باش هەن، كە تێكستی شاعیرە كلاسیكیەكانیان كردۆتە ئاوازو كەلەپووری نەتەوەییان پاراستووە، ئەوانەش جێگای دەست خۆشین.

بۆیە بەنەوەی نوێ‌ دەڵێم قۆناغەكە هەڵدەگرێ‌، روو لەنوێ‌ خوازی بكەین، بەمەرجێ‌ ستایلی هونەری كوردی پشت گوێ‌ نەخەین، با لەچوار چێوەی كەلەپووری نەتەوەكەمان دەرنەچن، لاسایی توركو عەرەب‌و فارس بەسە، ئاخر كوا سیاچەمانەی گۆرانی شاعیر كە وەسفی ناوچەیەكی شاخاوی دەكات، لەگەڵ ئەم ئاوازە بیانییەدا یەك دەگرنەوە.

من دەمێكەو لەدیدارێكی كوردساتدا لەساڵی 2008 دا گوتوومە با گۆرانی كوردی بگوازینەوە قۆناغێكی نوێ‌ نوێی بكەینەوە، بەڵام بەو مانایەنا لاسایی رۆژئاوا بكەینەوە، هەرچەندە هەندێك هەن توانیان كۆكتێلێك لەم نێوەندەدا دروست بكەن‌و ئێمە و نەوەی نوێش بە ئاوازەكانیان رازی كەن، هەموو ئەوانە جێگەی دەست خۆشین.

دوواكاری هونەریم ئاوازێكە بۆ سیاچەمانەكەی گۆران‌و بەم نزیكانە تۆماری دەكەم، هەوڵمداوە ئاوازو ناوەرۆكی تێكستەكە ئەوە بێت كە كەلەپوری نەتەوەكەم دەیەوێ‌ واتە تایبەتمەندی خۆیم داوەتێ‌.

ئێستاش كۆمەڵێك بەرهەمی نوێم لەژێر دەستایەو هەندێ‌ لەبەرهەمە كۆمەكانیش نوێ دەكەمەوە.