ئەم هەواڵە بڵاوبكەوە
FaceBook  Twitter  

محەمەد كەریم نانەوا

شێتەكان لەژیانییاندا حەزوئارەزوویان تەنها لەجگەرەیە، كەجگەرەیان بوو، واتا هەموو سەروەت وسامان وموڵكی دنیا هی ئەوانە.. ئەوسا (شا) بەسەپان ڕاناگرن، یەك جگەرە بەهەموو گەنجینەی قاروون ناگۆرنەوە. دنیای شێتەكان، دنیای خەندە وپێكەنینە، بەئەقڵیەتی مێچكە مێچكەیی ماستاوچیان پێدەكەنن، بەكڵكە سۆتەیی ومامە حەمەیی هەڵپەرستان پێدەكەنن، شێتەكان، عارد ڕادەخەن، سەربەسەرینی بەرد دەكەن لەجیاتی جاجم ولێفە، عاسمان بەخۆیان دادەدەن، خەم لەنانی سبەینەی ئایندە ناخۆن، خەم لەكۆكردنەوەی سەروەت وسامان ناخۆن، شەوانە بەبێ‌ خەم وخەیاڵ ڕادەكشێن، لەخەو وخەونیاندا ناترسێن، قەت لەهیكەوە ڕاناچڵەكێن زڕخەوبن، خەونی خۆشخۆش دەبینن، لەخەونەكانیشیاندا هەردەم لێو بەخەندە وپێكەنینن، شێتەكان هێندە بەهێزو ورە بەرزوبەتوانان، بەرگەی سەرماوگەرماو برسێتی دەگرن ..زاراوەی.. (دزی..ڕێگری..گەندەڵی..خیانەتكاری..درۆ..ناپاكی..چاوساغی.. گەوادی..گەندەڵی سێكسی..سكرتێرەی نەرم وناسك..قەحپەپەرستی..نەفت خۆری..شیلەمژین..قۆرخكردنی بازاڕ..كاڵای ئیكسپایەر) ئەوانە هیچیان لەكلتوروفەرهەنگی شێتەكاندا هەرگیز بوونی نەبووە ونیە وبەرچاو ناكەون، ئەگەرچی بەزگێگ تێروبەدووان برسین، بەڵام چاوتێرو دەستكراوەو دڵفرەوانن، بۆیە سەربەست وئازادن، ناپاكنین، قەد لە گیانی خۆیان ناترسن پێویستان بە ئۆتۆمبیلی جام ڕەش و،بەربەست وكۆسپی سەرجادەو سەرەكۆڵان گرتن وحیمایەومیمایە نییە، بۆیە ئەوان خۆشەویستن، خۆشەویستی میللەتن، بەهەر كووچە وكۆڵانێكدا ڕابورن ، خەلك لە پێشوازییاندا هەڵدەستنەوە سەرپێیان ، وەكو (مستەرماندێلا) ڕێزیان لێدەگرن، تەمەنایا بۆ دەكەن.