ئەم هەواڵە بڵاوبكەوە
FaceBook  Twitter  

عومه‌ر خدر كاكیل

رۆمانی ته‌مۆخ دووه‌م رۆمانی نوسه‌ر (دیدار مه‌سیفی)یه‌ كه‌ له‌م نزیکانە لە ناوه‌ندی ئاوێر بۆ چاپ و بڵاوكردنه‌وه‌ له‌ به‌رگێكی قه‌شه‌نگدا له‌چاپ درا و بڵاوکرایەوە. تیراژی یەکەم چاپی ئەم رۆمانە (١٠٠٠)دانەیە و بە نرخێکی گونجاو دەفرۆشرێت. 

وەک لە دوا لاپەڕەی رۆمانەکە ئاماژەی پێکراوە، رەشنووسی ئەم رۆمانە بەر لە بیست ساڵ وەک ئەزموونێکی سەرەتایی نوسەر نوسراوە و هەڵگیراوە، بەڵام ساڵی ڕابردوو پێداچوونەوەیەکی تازەی بۆ کراوە و ئامادەکراوە بۆ بڵاوکردنەوە. 

ئەم رۆمانه‌ بە شێوازێکی ئەدەبی و ناڕاستەوخۆ باس له‌ مێژووی به‌سه‌رچووی گه‌لی كورد ده‌كات كه‌ وه‌ک ئێستا پڕبووه‌ لە خوێن ڕشتن و خیانه‌ت و چاڵ بۆ یەکدی هه‌ڵكه‌ندن. نوسه‌ر، زۆر زیره‌كانه‌ له‌ڕێی سومبولی (سمێل بادراوه‌كان) "كه‌ نیشانه‌یه‌ بۆ ئیمپراتۆریه‌تی عوسمانی" و (میری دانشاش) "كه‌نیشانه‌یه‌ بۆ ده‌وڵه‌تی سه‌فه‌وی" ده‌ستێوه‌ردان و هێڕشه‌ دوژمنكاره‌كانیان بۆ سه‌ر میرنشینه‌ كورده‌كان دیاری ده‌كات، كه‌ به‌درێژایی مێژوو غه‌درێكی نامه‌ردانه‌یان له‌ گه‌لی كورد كردوه‌.له‌ به‌رامبه‌ر ئه‌و دوانه‌ش په‌یدابوونی (دوو موزه‌رد‌)ه‌كه‌ش كه‌ سوموبلی كۆلۆنیالیزمی نوێی (به‌ریتانی و فه‌ره‌نسی) یه‌، كه‌ به‌شێوه‌یه‌كی نوێ و جیاواز له‌وانی تر، ده‌ستێوه‌ردانیان كرد بۆ دزینی ئاوی ره‌ش(نه‌فت) و له‌بەریه‌كهه‌ڵوه‌شاندنه‌وه‌ی میرنشینه‌ كوردیه‌كان. 

ئه‌وه‌ی ماوه‌ته‌وه‌ سەبارەت بە رۆمانی تەمۆخ بیڵێین زمانە جودا و جوانەکەیەتی کە بریتییە لە تێكه‌ڵكردنی دیالێكته جیاوازه‌‌كانی زمانی كوردیی.‌ دیارە ئەوەش لە لایەک هەوڵێکی جوان و مایەی پێزانین دەبینرێت و لە لایێکی دیکەش بریتییە لە دانانی بەردێکی دیکە بۆ پتەوکردنی بناغه‌ی زمانی یه‌كگرتوی كوردیی. 

دوا ووتە، خوێنەران هەر کاتێک حەز بکەن دەتوانن ئەم رۆمانە بخوێننەوە و چێژی لێ وەربگرن، بە تایبەت کە باس لەم جۆرە رووداو و ‌بەسەرهاتانە دەکات کە بۆ گەلی کورد هەمیشە دووبارە و دەبارە دەبننەوە.