ئەم هەواڵە بڵاوبكەوە
FaceBook  Twitter  

ئا:رێگای كوردستان

عەبدولوەهاب حەمەد ئەحمەد، نووسەر و دەرهێنەر، ناسراو بە عەبدولوەهاب شوانی، نووسەری چوار پەرتووكی ئەدەبی و فەلسەفی یە، و زیاتر لە حەوت شانۆی پێشكەش بە منداڵانی كوردستان كرد و زیاتر لە (40) شیعری كراوەتە گۆرانی بۆ منداڵان، نووسەر و سیناریستی یەكەم زنجیرە درامای منداڵانە بە ناوی (وانە)" سەرۆكی ڕێكخرای كۆلارەیە بۆ ڕۆشنبیری منداڵان و ماستەری هەیە لە كارگێری گشتی، تا ئێستا دەرهێنەری (4) كورتە فیلمە و دوا كاریشی لە بواری سینەما كورتە فیلمی (فڕین) كە ئیستا بەشدارە لە زۆرێك لە فیستڤاڵە نێوخۆیی و جیهانییەكان.

عەبدولوەهاب شوانی كێیە؟ 

سیدهارتایەكە نیوەی مرۆڤ و نیوەكەی تری لە گەڵا و درەخت، شوانی بەر لەوەی كوڕی ئادەم بێت نەفخێكی ئیلاهیە لەسەر زەوی، بەر لەوەی عەبدولوەهاب بێت مرۆڤە، مرۆڤ بوون لەلای ئەو پرۆسەیەكە تا دوا خاڵی وجوودمان دەبێت پێیەوە پابەندبێن و لە درەختی بەنی ئادەم لقێك بین.

تۆ بە دیوانی (444 شەو) دەستت پێكرد، خوێنەر بە خوێندنەوەی ووشەكانت لەم دیوانە، لە ژیان ساردەبێتەوە و دەستی لە ژیان شل دەبێت بۆچی؟

دیوانی (444 شەو) نووسینەوەی خۆم بوو لە ساڵی (2003)، لە ڕاستیدا (چوارسەد و چل و چوار شەو) پەیكەری منە بە ووشە، كاتێك نووسیمەوە كە من خەونەكانم گەورەترن بوون لە تەمەنم و خەمەكانیشم باڵایان بەرزتر بوو لە خۆم، بۆیە (مەحەمەد خدر مەولود) گوتی: تۆ لەم دیوانە (بیست) ساڵ پێش خۆت كەوتی و ئیدی پێوست ناكات شتێكی تر بنووسی تا تەمەنی (45) ساڵی، نووسینەوەی ئەم دیوانە كارێكی ئاوا ئاسان نەبووە، من بە فرمێسكەكانی خۆم نووسیومەتەوەو بۆیە كە خوێنەر دەیخوێنێتەوە هەست بە تەڕی و گەرمی ووشەكان دەكات و تێ‌ دەگات ئەو شیعرانە كارێكی وا ئاسان نیە تەنها ووشە ریزكردن نییە و پرۆسەی خۆ نووسینەو و ژیان نووسینەوە و خەم دارشتن بووە لە قالبی ووشە، هەر چوارینەیەك لە دیوانی (444 شەو) فرمێسكێكی من بەسەر جەستەیا ڕژاوە، من هیچ زۆر لە خۆكردنێكم نەبووە بۆ نووسینەوەی پێوستم بە خەیاڵ و زۆر لە خۆكردن نەبووە هەرگیز، لە ماوەی یەك مانگ (444 )چوارێنە لە دایك بوو، نووسینەوەی زەحمەت بوو، ئازار بەخەش بوو، لە ڕۆحی خۆم ووشەم هەڵدەكەند و لەسەر كاغەز دەمچنیەوە.

لە سەرجەمی نووسینەكانت خوێنەر خەمێكی قوڵ بەدی دەكات؟

بەڵی نووسەر ئەوە دەنووسێت كە خەیاڵی درووستی دەكەن و زادەی ئەزموونی ژیانیەتی، نووسین نەخشاندنی تابڵۆی ژیانە و چەرمەسەریەكانیەتی بە ووشە، من هەرگیز نەمویستووە شتێك بڵێم خۆمی تیا ڕەنگ نەداوە و خۆمی تیانەبینم، تۆ ئەگەر خەمێك دەبینی ئی ئەوەیە، خەمێك و حەسرەتێك و غوربەتێك هەمیشە ئامادەگی هەبووە لە زاتی مندا، بۆیە لە ووشەكانم ڕەنگیان داوەتەوە، لەگەڵ ئەوەش من هەمیشە خەم و حەسرەتەكانی ژیانم بە ڕەنگێكی جوان كێشاوە، هەناسەیەكم هەڵكیشاوە بۆ بەردەوام بوون و مانەوە.

هۆكاری چییە شوانی" لەم قووڵ بوونەوە لە نێو ئەدەب و فەلسەفەی نووسین هاتە نێو دنیا سادەكەی منداڵان؟

منداڵی بۆ من جیهانێكە كە بە تەنیا تیایدا ژیام و تەنیاش تیایدا یاریم كرد و تەنیاش تیایدا گەورەبووم، كۆچی باوكم و دووری دایكم ئەمانە منداڵیی منیان بە تەنیا هێشتەوە و لە گەورەی منیان كردە دایك و باوك بۆ خۆم و بۆ منداڵانی تر، بووە هۆی ئەوەی كە هەمیشە حەسرەتێك لە وجودمان هەبێت بۆ بینینی دایك و باوك و ووتنی ووشەی باوكە، بۆیە هەوڵمدا كە ئەم بۆشایە پڕ بكەمەوە بۆ ئەو منداڵانەی هاوشێوەی من بوون لە ژیان ئەویش بە تێكستەكانم و بە دراما و فیلم و شانۆ و كارەكانی تری پەیوەندی بە منداڵان، كە خۆشترین كاتەكانی ژیانی منیان نەخشاند ئەو ساتانەی كاركردنم لەگەڵ منداڵان.

  وەزیری تەنیایی" لۆگۆی ناوی تۆیە لە نووسین، تەنیایی ئەوەنە قوڵ چۆتە ژیانت تا ببیە وەزیری تەنیایی؟ 

وەزیری تەنیایی ناونیشتانی دیوانێكمە لە ساڵی (2008) چاپ و بڵاو كرایەوە، لەوكاتەوە بووە ناوی من، لە وەزیری تەنیایی تۆ هەست بەم قوڵاییە لە مندا دەكەی، ئەویش بە هۆی ئەو ڕووچوونەم بە نێو خوێندنەوە و ئەو قۆناغەش لە ژیانی من كە منی زیاتر پەلكێش كرد بە نێو تەنیایی و وای كرد دەست بكەم بە نووسینەوەی تەنیاییەكانی خۆم لە دیوانێك بە نێو وەزیری تەنیایی، لەوێ‌ تۆ ئەوپەری سادەیی و كورت بڕی دەبینی لە نووسیندا، كە بەوپەڕی سادەیەوە داوا لە دایكم دەكەم، (گۆرانی بێژێكم لە بازاڕ بۆ بكڕێ‌)، لەوێ‌ كە دەڵێم:

(خۆت سەركردایەتیم بكە سەرم دیاریت

من ڕۆڵەی تۆم ئەی تەنیایی).

لە وەزیری تەنیایی من تەواو خۆم داوەتە دەست تەنیایی و متمانەی تەواوم پێی هەیە، كە جێم ناهێڵی و لەگەڵ خۆی دەمبا و هەرچی ئەو بەسەرم بێنێ‌ پێی رازیم، 

(بەم جیهانە دووبارەیە بم سوڕێنەوە.

ڕەوانەی هەندەرانم بكە و

لەو بنی دنیا فڕێم بدە

چۆنت پێ خۆشە، وابكە ئەی تەنیایی

من هەر ڕۆڵەی تۆم).

وەك نووسەر و دەرهێنەر" توانیوتە جی پەنجەی خۆت بنەخشێنی لە نێو سینەما و بگەیتە فیستەڤاڵەكانی وڵاتانی ئەمریكا و ئەوروپا و ئاسیا و ئەفریقا ئەوە چۆن بوو؟

تۆ كاتێك هیچ ئامرازێكت نیە بۆ بەتاڵ كردنەوە ئەو هەموو نادادی و ئەم هەموو بێ‌ حورمەتییەی بەرانبەر بە ڕۆحی مرۆڤ دەكرێت، تۆ كاتێك بێ هیوا دەبێت لە مرۆڤ، بێ‌ هیوا دەبێت لە ژیان، بێ‌ هیوا دەبیت لە درێژە دان بە جوانییەكان، بە دوای ئامرازێك دەگەڕێی پەیامی مرۆڤ بوون بڵاوكەیتەوە و ئازارەكان بەیان بكەی و فرمێسكەكان پیشان بدەیت، ئەویش سینەمایە لە ئێستا، ئێمە هیچ شتێكمان نییە بە قەد سینەما هێند بەرز و بە توانا گوزارشت لە ئازارەكانی مرۆڤ بكات و پیشانی بدات، كارەكانم لە نێو سینەما باشترین هەنگاو دەبن بۆ گەیاندنی پەیامە ئینسانیەكانم..