ئەم هەواڵە بڵاوبكەوە
FaceBook  Twitter  

غەمگین بۆڵی

--------------

شەممەكان:

ئەوەندە لە بوونی مندا ڕووناكی

گڵۆپەكانی ژوورەكەم دەكوژێنمەوە و

ڕووناكیی تۆ 

لە خۆمدا پێدەكەم.

یەكشەممەكان:

دێمە ناو سەزوایی تۆ 

باخچەكەت سەردانی چاوم دەكات

گوڵەكانی سەر كراسەكەت 

لەناو تەڕایی چاوانمدا 

گەش و گەشتر

گەش و گەشبینانە دێمە ناو تۆ و

بەناو گوڵەكانتدا پیاسە دەكەم.

دووشەممەكان:

دێمە ناو قوڵایی قوڵایییەكانی تۆوە 

بەناوتدا خۆم غلۆر دەكەمەوە

خۆم لە ناوتدا دەشۆم

ئەوەندە خۆم لەناوتدا دەشۆم

هەتاكو كەڤی سپی لەسەر مەمكت پێی دەخزێت

هەتاكو ئاوی ڕوون لەسەر جەستەت خلیسك دەبات.

سێشەممەكان:

نەهاتنت دەخەمە تاریكایی پەیڤی ناوت

هەموو سێشەممەكان ناو دەنێم: نەهاتن!

سێشەممەیەك لە ناو دڵمدا خۆرێكی خۆش بوو

سێشەممەیەك لە چاوانمدا بارانێكی بە خوڕ باری

سێشەممەیەك لەناو پێكەنینەكانمدا گریام

تۆ هەر نەهاتی!

لە هەینێوە هەموو سێشەممەكان دەخەوم.

چوارشەممەكان:

چاوم لەناو خرۆكەكانی خوێنت و

لەناو لەپی دەستت و

لەناو دڵی گەرمت و

لەناو گوڵەكانی كراسەكەشتەوە 

دیارە!

بەڵام چاوم

خیانەت لە ڕەنگی كراسەكەت ناكات.

پێنچشەممەكان:

بەشاهێدی خۆری ناو ئەو شیعرە

جارێك گەش گەش

جارێك تەڕ تەڕ

دەڕژێمە تاریكییتەوە.

هەینییەكان:

كە تۆ دەڕۆیتەوە

خەریكە وەك دارتەلێكی بێ كارەبا 

ڕووناكیی خۆرم لێ بكوژێتەوە.

 

  • 1