ئەم هەواڵە بڵاوبكەوە
FaceBook  Twitter  

حەمە عەباس

  

زۆرجار قولابم خستۆتە نێو روباری پڕ لەماسی و

دەستبەتاڵ گەڕاومەتەوە

زۆرجار نامەم بەپوشكاغەز بۆ ئەستێرەكان ناردووە

چوومەتە سەر بڵنداییان

دەست و نیگام هەڵبڕیوە

نە ئەستیرەیەك چەنگاڵێ‌

نە ئەستێرەیەك هەواڵێ‌

 

* * *

 

وەك هەرشتێكیتر

ئاسمانیش ساتمە لە گەردیلەیەك دەكات و

نینۆكی هەڵدەقۆچێ‌

وەك هەرشتێكیتر

ئاسمانیش ژانەسەرێكی سووك دەیگرێ‌

بۆشكاندنی سەرخەوێك

لەسەر ئەم زەمینە ڕادەكشێ‌ و

ئاسمانێكیتر بەخۆیدادەدا

منیش بەسەر لەپی ساتە كریستاڵییەكانی ئەوێدا

گەشتێك بەنێو چراخانی ئەستێرەكاندا دەكەم و

جوانترین ئەستیرە بۆخۆم گلدەدەمەوە

ئەستێرەیەك

لەئەستێرە نەبێ‌ لە هیچ شتێكیتر نەكات

ئەستێرەیەك كەڕۆیی لەگەڵ خۆی بمبات

  • 1