ئەم هەواڵە بڵاوبكەوە
FaceBook  Twitter  

حەمید قەڵادزەیی

 

 ویستم بێم و..

بارانێک بم

بۆ وەرزی سەوزی تۆ بمرم 

وەک نەرمە با.. لە زەنوێرت

جواناوی شەرمی تۆ بسڕم

ویستم بێم و..

دەستێکم بۆ

هەڵگوشینی هەناری ئەو قەدپاڵە بێ

دەستێکم بۆ

نوسینەوەی ئەشکی شادی

سەیرانی ئەم ئێوارە بێ

ویستم بێم و..

پاییز ئاسا، 

ڕەنگی زەردی خۆم بڕێژم 

گەڵا بەرماڵی نوێژم بێ 

تەرزی جوانی خۆم بنێژم !

ویستم بێم و..

وەک سەر قەتارێکی بەڵەد

مەرزی حەرام ببەزێنم

لەودیوو کێوی گومانەوە

خونچەی لێوان بتەزێنم

ویستم بێم و..

خۆم ڕادەستی قەدەر بکەم 

یان بە یەکجاری بۆت بمرم 

یان لە باغی پڕ لە ڕەنگتا

لە بێڕەنگی خۆما بمرم !

ویستم بێم و..

بڵێم دەبا.. ئەشکی چاوت،

ببێتە جوانترین یادگاری

لەم هەرێمی بێ هەورەدا

بۆ گوڵێکی ڕەنگ پەڕیووی بکە دیاری

ویستم بێم و..

چاوەکانم تەژی بکەم لە تەماشات 

نەکا لەوێ چاوباشقاڵێ

خودا نەکا، فریووم بات !