ئەم هەواڵە بڵاوبكەوە
FaceBook  Twitter  

 

بەكر ئاڵەیی

 

 ماڵمان دەچێتەوە چیا،

لەپێكەنینی هەورەكان نزیك دەبم

لەگەڵ باران ژوان دەبەستم،

هەڵەتی دەم كەل و

بروسكەی خۆر لەبەر دەكەم.

ئێرە جێدەهێڵم.

وا چنینی جنێوەكان ،ئاوێنەی ماڵە بێدارەكان دەشكێنێت.

ڕقی ساردبووەی بێوەژنەكان سكی هەتیوەكانیان تێر ناكات،

هەواڵە خێرایەكان دەرووی ئاسوودەی كڵۆم داوە،

لێرە دەڕۆم

لەبان كانیەكی قەوزە گرتوو

لەژێر تاشەیەكی سپی هەڵنیشتوو،

بۆفوارەی ڕەنگڕژاوی خۆر لەسەر چۆكم.

دەچم

لەوێ تاڵێ لەپرچی موغان دەخەمە ناوگۆرانیەكان.

دەچم لەوێ سروتی سروودەكانی زەردەشت دەخەمەناو چیرۆكەكان.

شنەی فڕیوی

ئاڤێستا

دەدۆزمە بۆچراكان.

ماڵم دەبەمەوە بۆ چیاكان...

  • 1