ئەم هەواڵە بڵاوبكەوە
FaceBook  Twitter  

 

 

خودایە ڕەگی ئەو تاریكایە ببڕەوە

جەنگی ئاسمانەكان خەلاس بكە

فڕینی ئازاراكان بشكێنە

باڵێكی میهرەبانی دروست بكەبۆئایندە

دەی ئەو ئادەمە چیە سینگی پڕە لەژەهر

چاوی وەك تیری قودرەتە

ناخی هێندەی بۆگەنی كوشتن پیسە

خودایە ڕەگی ئەو دڵەبۆگەنانە بشكێنە

سەری ئەو ڕێژنە پیسانە ببڕە

ئەو عەدەمە چ عەدەمێكە پڕە لەتاعون

پڕە

لەبرینی نائومێدی

لێرە لەو ئەستێرەیە

میهرەبانی گەورە نابێت

خودا بۆكەس نایەتەبوون

ژیان گوڵی بەختەوەری ناگرێت

ئەو ئەستێرەیە ڕەش بكەوە

ئەوئادەمە بڕوخێنە

شاخێكی سەنگەر بكە مرۆڤ

كانیەكی میهرەبان بكە بەئاین

 

باخچەیەك بكە بەشۆڕش

دەی خودایە

ئەوهەناسانە بسوتێنە

كەژیانیان تاریككردووە

جوانی دڵی ئەومنداڵانەی بۆجێژن شەو خەویان ناچێتە چاو

ئاوێتەی ئادەمی بكەوە

ئەو مرۆڤانە تڕۆ بكە

كە ناتوانن

خودا لەخۆیاندا پەنا دەن

ئەو ئەستێرەیە چ ئەستێرەیەكە

ژنێك بەدوای كچێنی خۆیدا هەموو پرچی خۆی ڕنیوەتەوە

دایكێك بۆكوشتنی كچەكەی ژنایەتی خۆی لەبیر چۆتەوە

باوكێك بەدەر لەماڵوێرانبوونی

ماندوو ماندوو

دەیەوێت شیعرێك بۆ جوانەمەرگەكەی بهۆنێتەوە

دەی خودایە ئێرە بسڕەوە

مەملەكەتی میروستانم بۆچیە

قەبرێك لەویژدانم بۆچیە

كێ یەكەم كەس سرودی شەڕەكانی نوسی بیكوژە

كێ پەیڕەوی حزبێكی خوێڕی نوسی بیكوژە

كێ چەقۆی كردملی اسماعیل بیكوژە

كێ دڵی دایكانی سوتان بیكوژە

من

شەرم لەئادەمبوونی خۆم دەكەم

تف لەخەسڵتی پیاوەتی وئازایەتی وقوربانی بۆجەنگەكان دەكەم

دەی خودایە

ئەو كەونە هەڵوەشێنە

_____

 

  • 1