ئەم هەواڵە بڵاوبكەوە
FaceBook  Twitter  

هاژە هاژی تاڤگەی بلورینە ، یا سیاچەمانەی دوای مەستبون

ئەوە خەونە بەم شەوە مەستانە ڕێ ئەکا

یا نەشئەیەکی دوای جوت بون

خەون خەون 

خەونیک هەیە ، خەونیک هەیە وەک بەرد

وەک لێوە پڕ لە ورتە ورتەکانی گیانەڵا

وەک پەنجە ساردەکانی ناو مت بون

دەڕۆین ، لەگەڵ تۆمە ئەی ئیبلیس ، ئەی ئومێد دەرۆین

بەیەکەوە دەڕۆین بەرەو ئەو دیو ڕۆخەکان 

ڕۆخەکانی گومان و تونێڵەکانی چاوشارکێ 

ڕۆخی ئاوا بون لە نزای

پەڕەسێلکەکانی ئەودیو دارتێلە بڵندەکانی نەفرەت 

دەڕۆین ، تا ئەبەد

تا سڕینەوەی هێڵەکانی وەهم 

تا ون بوون لە فەزا

تا گەمارۆدانی چڵێک تیشک، لەناو لەپە خوساوەکانی دوای جوت بون 

جوت بون بە وەهم 

لە وەهمێکەوە بۆ وەهمێکی تر

لە دۆڕانیکەوە بۆ دۆڕانیکی تر 

ئەڕۆین ،،، ئەرۆین

تا کەناری مێزی مەستی

تا ڕۆخی خەونە لینجەکانی کەتیرە 

تا تریقانەوەی شەبەنگ و

ڕۆخی خەونە ئیسفنجیەکانی جوت بونێکی وەهمی

ئەڕۆین ئەڕۆین پەریزادە 

بە دوو باڵی زامدارەوە

بە کۆڵێ ئێش و زارەوە

بەسەر شانی گەردەلولێکی لاسارەوە

بۆ سڕینەوەی نەفرەتەکان 

بۆ دڵداری و ئەوین

بۆ ماچی تەوێڵی ئیبلیسەکان

گڕکانێک بۆ بازنەکان

بازنە ژەهراویەکانی قەتیس بون

،،،،،،،،،،،،،،،،،،

بەیەکەوە دەڕۆین

بە جەستەیەکی سڕبوی ناو ئەفیون و

خەونێکی بە جێماو ، لەناو پێخەفی تەنیایدا 

،،،،،،،،،،،،،،،،،،،،،،

لە تونێڵە گەرمەکانی بلوێرێکی شکاودا 

سەفەرێ چێ ئەکەین 

مەتارەیەک شەڕاب و

دوو قتوە گۆشتی سەرەگا

تۆش هاوڕێی سەفەریت بۆ جوت بوون 

لەگەڵ زۆربادا بڕۆوە ناو تونێڵەکانەوە

تونێڵەکانی لەزەت

تونێڵەکانی کانزا 

چی بکەین لە دنیا،،،،،،،

با بڕۆین خانمەکەم بوخچەکان وەپێچە

نەبادا ئەم کێوی گومانە زوو بڕمێ و ، خەونەکان خامۆش کا

با بڕۆین بۆ (ئەوێ)