ئەم هەواڵە بڵاوبكەوە
FaceBook  Twitter  

كورتە چیرۆك 

جەلیل محەمەد شەریف 

سەیری كاتژمێری سەر دیوارەكەی كردەوە بۆچەندەمین جار هەردوو كۆرپەكەی خەویان لێ كەوتبوو, شەو درەنگە هەوڵیدا ئەم شەویش ببەستێتە چەندین شەوانی پێشووەوە, نەیتوانی ئەم شەو جیاوازە رەنگ‌و بۆن‌و بەرامی لەوانی پێشوو ناچێ‌ بیری لەوەكردەوە بەتەك مناڵەكانیدا راكشێت ئەن نیازەی هەموو شەوێ‌ لەم ساتەدا دەپشكوت بەڵام ئەمشەو بێ‌ دوودڵی دواكەوتن خۆی بەنیازە كەتەسلیم بكات چووە نێو پێخەفەكەی دەستی بۆ قۆبچەكانی سەر سینگی برد كەچی هیچیان نەترازان گلەیی لەپەنجەكانی نەكرد چونكە كاری دووبارە‌و سێبارە بوونەوەیانە شەوانی پێشوو بەتانیەكەی بەتەواوی نەدەدایە بان خۆیدا نیوەی ژووری لەشی بەتاك دەهێشتەوە دوگمەكانی سینەی دەكردە‌وە‌و بەنیوە روتی بۆ ماوەیەكی درێژ چاودێری رووخساری كاتژمێرەكەی دەكرد خۆزگە خۆزگەی بوو ترپەی پێی كارزان بگاتە گوێی‌و نۆشی بكات‌و ئامێری چاوەڕوانی دەروونی دامركێنێتەوە بەڵام زۆربەی شەوان ئەوپلانەی سەری نەدەگرت بەم رستەیە دەم كوت دەكرا (خۆت داپۆشە سەرمات دەبێ‌)ئەم وشانە دەبوونە دەستاڕێك دەدرایە تەپلی سەریا ئەندێشەكان‌و حەزەكانی هەڵدەوەراند بەناكامی لەگەرماییەكی نەشئە بەخشەوە تووڕ دەدرایە نێو زوقمی هەناسە ساردیەوە‌و بەناچاری خۆی دادەپۆشییەوە‌و چاوەكانی بەڕواڵەت لێك دەنا, بەڵام خەو زەفەری پێ نەدەبەرد پاش چەند چركەیەك كارزان بەتەكیەوە خەوی دەهات ئەمەش بووە مایەی بیرۆكەی كودەتایەكی گەورە. بڕیارێك بوو پاش ژانێكی تەمەن درێژ لەدایكبوو, قەناعەتەكانی ژێر‌و ژووركرد, بەبڕنگێكی تیژ بەیەك چركە داوەكانی نێوان خۆی‌و ئەوی بڕِی یەك چركە لەوە دواتر تێگەیشت كارێكی ئاسایی كردووە دەبوایە زووتر ئەو بڕیارەی بدایە, چونكە خۆی یەكەم ژن‌و دواین ژن نییە كودەتای وای بەرپا كردبێت هیچ كاتێكیش كودەتایەك لەخۆشێدا رووی نەداوە بەڵكو هەستی نەهامەتی‌و خوولەكانی تاڵی رۆژگار هۆنیویەتیەوەە گەیاندویەتیە كاتژمێری سفر‌و بڕیاری ژمارەیەك. تەمەنی هەرچەند لەحەڤدە‌و هەژدە تێپەری نەكردبوو دایكی دوو بەچكە بوو, هاوسەرەكەی بەدرێژایی رۆژگار لەگەڵ پیشەكەیدا خەریك بوو ماوەیەك بوو كە ئێواران دەگەڕایەوە ئاوێكی بەخۆیدا دەكرد‌و بەپەلە تێكەیەك نانی دەخوارد‌و (برادەران بگرن وا هاتم)ئەم لەسەرەتادا بەكارێكی ئاسایی زانی هیچ شەوێكیش پێش بەنیوە بوونی دەرگای ماڵی نەدەكردەوە.

حەزی وابوو وەك جاری جاران دەنگی كارزان لەژوورەكەیدا بزرنگێتەوە‌و هەندێ‌ جاریش ببێتە وشەی ناسك‌و بەچرپە لەكاتی باوەش پێكردندا بچرپایە بەرگوێدا, ئەم شەو خاتێ‌ بوو لەچاوەڕوان كردن ئەم شەو وەك شەوانی پێشوو بنمیچی ژوورەكەی نەدەبووە شاشەیەك كەتێدا بەبەرچاوی گومانەكانییەوە لەشێكی رووتی دەدیت كەبەچەند پیاوێك ئەم دیوو ئەو دیو دەكرا, بەقەپ گوشتی لێدەكرایەوە, دەنگی ئۆخەی لەچێژ وەرگرتن لەولەشە لەمێشكی ئەمدا دەنگی دەدایەوە, لەشە رووتەكان لەشی ئەم نەبوو بەڵام كەرووخسارەكانی پیاوەكان برووسكە ئاس دەكەوتنە بەردیدەی یەكێكیان روخساری كارزان بوو رووداوەكانی سەر شاشەی بنمێچەكە بەرە بەرە بڕیارێكی لەلا دروست كرد بۆیە دوێنی یەكەم رۆژ بوو لەبزەیەكەوە بەچاوێكی پرشنگدارەوە وەڵامێكی ئەو لاوە عەدایەوەە كەهەموو رۆژێ‌ لەپەنجەرەیەكی هاوسێبەكی بەرانبەریانەوە لەروویا تكاو نزا‌و داوكاری گەیشتنە یەكیان باری.

بڕیارەكەی ئەم دوو دڵی‌و دوا كەوتنی نەما, بادەكە پڕبوو لێ رژا, دەبوایە بەبادەیەكی تر لەشی تینووی ئاویدا, بەدووبارە بوونەوەی نۆشكردنیشی بووە مایەی شینبوونی خوویەكی دوایی نەهاتوو لەروحیدا ئەزموونەكە رێگەی خۆشكرد بۆئەوەی گەنجانی تریش لەدەرگای بدەن, نەك هەر ئەمە بەڵكە شەپۆڵی هەواڵەكە لەلای كارزانیش دەنگی دایەوە بووە بوومەلەرزەیەك هێلانەی هاوسەریەتی ژێر‌و ژوور كرد لێكدابڕانی بوو بڕیارێكی ژمارە دوو خستییە سەر سەرهەڵگرتن‌و كۆچكردن بەرەو جیهانی هاتوو نەهات بەدرێژایی رێگا بیری لەهۆكاری هەڵەی هاوسەرەكەی دەكردەوە‌و بەو فرمێسكانە دەیشێلا كەبۆ بەچكەكانی دەبڕشێت بەڵام هاوكێشەكەی بۆچارەسەر نەدەكرا دابزانێ‌ كێ‌ تاوان بارە.