ئەم هەواڵە بڵاوبكەوە
FaceBook  Twitter  

ئامادەكردنی: گوشاد حەمەسەعید

 

زۆر لە مێژبوو لە دڵمدا بوو سەردانێكی حەیرانبێژی بەتوانا و دەنگخۆش حەسەن سیساوەیی ڕەوانشاد بكەم، ئەمە جگە لەوەی هەردەم حەیرانەكانی بەزەوق و سەلیقەی من ئاشنا بوون لەلایەك، لەلایەكی دیكەوە كۆمەڵێك پرسیاریشم هەبوو دەمویست لە نزیكەوە لەگەڵ ئەو هونەرمەندە دانیشم و پرسیارەكانی لێ بكەم، ئێستا دەبێ كەمێ لە باسەكە لابدەم و بڵێم خەڵكی وڵاتی كۆیە لە نزیكەوە بەناوی (سەعیدی مەلا ئەحمەد) ئاشنان، بەتایبەتی وەچەی (40،50،60،70)ەكان زۆربەیان لەنزیكەوە ناسیوانە، هەر لەسەرەتای چلەكانی سەدەی رابدوو لاوێكی چالاك و چاو نەترس بووە، لە ئەنجامدانی كارەكانی (سیاسی و كۆمەڵایەتی) گورج و گۆڵ بووە، ئەمە بووەتە هۆی ئەوەی لەناوەندە كۆمەڵایەتییەكانی كۆیە رێزی تایبەتی خۆی هەبێت، لەسەرەتای ژیانی دۆستی هەرە نزیكی (دڵداری شاعیر) بووە، وەك گێڕایانەوە گوتیان لەگەنجیدا وەك (جمك – دوانە) وابوون، زۆر هۆگری یەكدی بوون و هەردوكیشیان مشكی مۆریان لەسەر كردووە، جگە لە حزبی هیوا و داركەر و كۆمەنیست كە پێكەوە بوون بە ئەندامی ئەو حزبانە، بەداخەوە ئەو پیاوە هەرچەند هەموو سیاسی و كەسایەتییەكانی كۆیە وەك كەسێكی ئەدەب و هونەردۆست و خێرخواز باسی دەكەن بەڵام لەو كەسانەی كە یادەوەری خۆیان نوسیوەتەوە، بەچەند سەرەدێرێك ناوی دەهێنن، كە زانیاری لەسەر ژیانی ئەو پیاوە تێدا نییەوە، وەك مامۆستا كەریم شارەزا كە لەگەڵ ئەو پیاوە لە قوتابخانەی (ئولا)ی كۆیە قوتابی بووە و لە دواییشدا دۆستێكی نزیكی خۆی و هەموو خێزانەكەیان بووە گێڕایەوە كە (سەعیدی مەلا ئەحمەد) هەر لە چلەكانەوە هاتوچۆی ئەودیوی ئێرانی كردووە و سەردانی شاری سابڵاغی كردووە و لە نزیكەوە جموجوڵەكانی ئەو شارەی دیوە و لە هەموو سەردانێكی كۆمەڵێ گۆڤار و ڕۆژنامە و كتێبی كوردی لەگەڵ خۆی هێناوەتەوە، بە پێچەواناشەوە بەرهەمەكانی دیوی عێراقی لەگەڵ خۆیدا بۆ ئەو دیو بردووە و وەك مژدەیەك بە گەنجەكانی ئەو سەردەمی شاری كۆیەی ڕاگەیاندووە كە ڕاگەیاندنی دەوڵەتێكی كوردی بەڕێوەیە و دەبێت گەنجان خۆیان گورج بكەن بۆ بەهاناوەچوونیان و یارمەتیدانیان، دیارە ئەوساكە لەگەڵ كاك حەمەد ئەمین (حەمە شین)ی زاوای كە پیاوێكی بەدەست و برد و ئازا بووە بۆ كاسبی و هێنانی ماڵی ئێران و جەڵەب كڕین لەنێوان كۆیە و سابڵاغ هەر بە ڕێگاوە بووە، وادیارە مامۆستا كەریم شارەزا زۆر شتی دیكەی وەك هێنان و بردنی پۆست و نامەی خەڵكی لەنێوان كۆیە و سابڵاغ گێڕاوە، بەڵام پەیوەندی بەو باسەوە كەمترە، سەعیدی مەلا حەمەدی لە پەنجاكانی سەدەی ڕابردوو یەكەم جار لە كۆیە گازینۆیەك دەكاتەوە كە زیاتر وەك ناوەندێكی رۆشنبیری بووە، شاعیر و ئەدیب و هونەرمەند و سیاسەتمەداران تێیدا كۆ بوونەوەتەوە، ناوناوەش كاری شانۆیی تێدا پێشكەش كراوە و تا رۆژی ئەمڕۆش خەڵكانێك ماون بە جوانی ئەو سەردەمەیان لەبیرە و لەبارەیەوە زۆر قسە و باس دەگێڕنەوە، نموونەوەی وەك مامۆستا كەریم شارەزا زۆرن، دوای ئەوەی كە سەعیدی مەلا ئەحمەدی لەناوەڕاستی پەنجاكانی سەدەی ڕابردوو بۆ رانییە دەگوێزێتەوە ئەوە هەمان بەزمەكەی كۆیە لە ڕانییە دادەمەزریچنێ، سەرەتا لەگەڵ خوالێخۆش بوو (مەمەندی حاجی سدیق) كە تا مردیش ئەو دۆستایەتییەیان هەر بەردەوام بوو لە دواییشدا گازینۆیەك دەكاتەوە بۆ برەودان بە بیر و باوەڕی سیاسی و كۆكردنەوەی جەماوەر شانبەشانی پەیداكردنی بژێوی كاریان كردووە، بۆیە ناوەناوە حەیرانبێژێكی وەك خوالێخۆش بوو (حەسەن سیساوەییان) بانگكرتووە تا لە گازینۆكە حەیران بڵێ و هر لەوێش جێگە و رێگایان بۆ دابینكردووە و بە دەستی بەتاڵیش ڕەوانیان نەكردووەتەوە، دیارە من لە خەڵكی دیكەم بیستەوە كە (سیساوەیی) ئەوساكە گوتبووی لەو ناوچەیە بۆ (سەعید ) نەبێ، حەیران بۆ كەسی دیكە ناڵێم، دیارە دەمێك بوو حەزم دەكرد هەندێ زانیاری لەمەڕ ئەو سەردەمە لەزاری (مام حەسەن) خۆی و لەمەڕ چۆنییەتی سەردانەكانی بۆ ڕانییەی ئەو سەردەم ببیستم، بۆیە برای بەڕێز كاك شەماڵی مامۆستا عەلی حەریری گفتی دا كە ئەو ئاهەم لەدڵی دەباتە دەر و ئەو سەردانە رێك دەخا، بەهاری ساڵی 2013 من و برایان كاك شەماڵ و كاك شوان سەرابی لەسەر بانگهێشتی كاك شەماڵ بەرە و سیساوە كەوتینە رێگە و لە رێگەش كاك شەماڵ زۆری لوتفی خانەدانانەی نواند، بەهەر حاڵ ماڵی ئەو هونەرمەندەمان دیتەوە و چوینە ماڵەكەی، ئێمە لە دیوەخانی ماڵەكەی كەمێك چاوەڕێمان كرد تا مام حەسەن بە دارەدارە هات، بەڵام لەچاو ئەو تەمەنە (سەد ساڵ)ییەی وەك باسیان كرد، باش بوو، ئەو بەهۆی شەقەوە بەپێی خۆی هاتە لامان شوكرانەی دەویست، دیارە من بە دیتنی ئەو هونەرمەندە گەورەیە هیوایەكی لەمێژینەم هاتە دی و بەوەش زۆر دڵخۆش بووم، بەڵام ئەو بەبێ پسانەوە زۆر بە گەرمی و لە دڵەوە بە زمانێكی شەكر ئاسا هەر بە خێرهاتنی دەكردین، دەمێكی ویست تا تەواو هێمن بووەوە و پەیدا پەیتاش وێنەمان دەگرت و وا دەزانم بەشێكی لە دەنگەكانمان تۆمار كرد، بەو تەمەنەوە هونەرمەند سوعبەت و قسەی تەڕ و بەتامی دەكر دو دەیگوت كوڕینە پیاو دەبێ هەموو دەمێ (12) دۆست و یاری كەمتر نەبێ، چەند خۆشە لەناو كچۆڵان بێ، من نەمدەزانی سەرەداوی باس و پرسیارەكانی دەمویست لە كوێوە دەستپێبكەم، گوێی كەمێ گران بوو، سەرەئەنجام هونەرمەندی ناوبراو لە ئێمەی پرسی ئەرێ كوڕینە ئەنگۆ چ ئیش و خزمەتێكتان بە حەسەنی هەبوو، هەتا خزمەتتان بكەم، وەڵاممان دایەوە كە تەنیا بۆ خۆشی و هەواڵپرسینی هاتووین و حەزمانكرد چاومان بە دیداری ڕونبێتەوە، مام حەسەن پرسی ئەرێ ئێوە لە كوێوە هاتوون، كاك شەماڵ دەستپێشخەری كرد و گوتی لە هەولێرەوە، مام حەسەن هەولێرێ، بەڕاستی؟ كاك شەماڵ لۆ مام حەسەن هەولێری بە قەستیش هەیە؟ مام حەسەن كوڕە خۆ گەنجی ئەو زەمانە سوعبەتانیش نازانن، وردە وردە رێگە خۆش بوو بۆ پرسیاری یەكەمم و لێم پرسی ئەرێ مام حەسەن تۆ لەساڵانی پەنجاكان هاتوچۆی ڕانیەت دەكرد؟ مام حەسەن داما وەك ئەوەی بیر لە شتێكی خۆش بكاتەوە و گوتی: ئەرێوەڵڵا، سەردانی ڕانیەم دەكرد، ئەو جارەیان لێم پرسی لە ڕانیە دەچوویە لای كێ و لەلای كێ میوان دەبووی؟ دەمێك داما و بیدەنگ بوو، لەبیران راما، بەڵام نەهاتەوە بیری، بۆیە من دەستپێشخەریم كرد و پرسیم دەچوویە لای كەسێك ناوی (سەعید) بووبێ؟ ئەوجارە مام حەسەن ئاهێكی هاتەوە بەر و بە دڵنیایی و خۆشییەكەوە گوتی: ئااااااااااااااا هههه ، سەعیدی كوڕێ مەلا حەمەدی دەرێی (دەڵێی) گوتم: بەڵێ بەڵێ، دیاربوو بەو قسە شتانێكی هاتەوە بیر و دڵی خۆش بوو، دوای كەمێك پێم گوت: مام حەسەن من كوڕی ئەوم، بە بیستنی ئەم قسە دەستی لە ملم كرد و زۆر بەگەرمی ماچی كردم، ئیجا وتی: داخۆ دەبێ ئەو كو (چۆن) بێ؟ لە ڕاستیدا نەمتوانی ئەوەی لێبشارمەوە هەر بۆیە پێم گوت كە چەند ساڵێكە ئەو نەماوە و چووەتە ڕەحمەتی خوا. هەر كە گوێی لەمەرگی ئەو دۆستە كۆنەی بوو دەستی بە گریان كرد، بەڵام گریانێكی بە كوڵ و فرمێسك لە چاوانی سەرەوژێر بوون، لێرەوە گەرم و گوڕی دانیشتنەكەمان سارد بوووەوە، بۆیە بەهیوای ئەوەی جارێكی دیكە رێك و پێكتر سەردانی بكەمەوە دوعا خوازیمان لێ كرد و هەرسێكمان لەپاش نیوەڕۆی هەمان رۆژ بەرە و هەولێر گەڕاینەوە.