ئەم هەواڵە بڵاوبكەوە
FaceBook  Twitter  

بەشی دووەم و كۆتایی

 

كه‌ باس له‌ ساته‌کانی نێو به‌شه‌ ناوخۆیی کچان و گاڵته‌و گه‌پ و تیرو توانج و ده‌رده‌ دڵی ئه‌و قوتابیه‌ کچانه‌ ده‌کات که‌ دوور له‌ چاوی که‌س و کاریان له‌سه‌رمێزی کافتریای زانكۆ شه‌ڕ به‌ قوتابیه‌ کوڕه‌ هاوڕێکانیان ده‌فرۆشن ، ئه‌و ساتانه‌ت بیر ده‌كه‌وێته‌وه‌ كه‌ قه‌ستت ده‌كرد زانكۆ به‌ هه‌شت ساڵ ته‌واو بكه‌یت نه‌ك چوار ساڵ! كه‌ باس له‌ ئاخ و حه‌سره‌تی كوڕه‌ هه‌رزه‌كاره‌كان ده‌كات ، وه‌ك ئه‌وه‌ وایه‌ ژیانی ڕابردووی هه‌موو كوڕێكی رۆژهه‌ڵاتی بخاته‌ به‌ر چاو ،

کاتێکیش باس له‌ وه‌فاو هاوخه‌می(سه‌ردار) ده‌کات بۆ هاوڕێکانی کۆلیژو خودی نیان و سه‌روه‌ر هه‌ست به‌ پیرۆزیی و گه‌وره‌یی هاوڕێیه‌تی ده‌که‌یت و خۆزگه‌ ده‌خوازی هاوڕێیه‌کی وه‌ک سه‌رداری مارکسی و یاخی له‌ ده‌سه‌ڵاتت هه‌بێت ، كه‌ باس له‌ جێژوان و وشه‌ ڕۆمانسیه‌کانی نیان و سه‌روه‌ر ده‌كات ، ده‌مانگه‌ڕێنێته‌وه‌ ژێر سێبه‌ری دارسنۆبه‌ره‌كانی شارو ده‌یان دیمه‌نی جوانی شه‌قام و باخ و قه‌راخ روبار ده‌خاته‌ به‌ر دیده‌مان ، كه‌ باس له‌ عه‌شقی دڵ ده‌كات و چرچ و لۆچی روخسارو پێست ڕه‌شی سه‌روه‌ر په‌راوێز ده‌خات ، پێمان ده‌ڵێت دڵ چه‌نده‌ گه‌وره‌یه‌و چۆن قوربانی به‌خۆی ده‌دات !

ئه‌م ڕۆمانه‌ ده‌مانگه‌ڕێنێته‌وه‌ نێو ئه‌و چركه‌ ساتانه‌ی كه‌ تیایدا ڕه‌نگ زه‌ردو سیس و لاواز ده‌رده‌كه‌وتین له‌ تاو دووری دولبه‌ره‌كه‌مان !

سه‌رده‌می گریانی به‌ڵقیس سه‌رده‌می ئه‌وساو ئێستای پیاوسالاری كۆمه‌ڵگای كوردی و خۆرهه‌ڵاتی ده‌خاته‌ به‌ردیده‌مان ، بۆیه‌ هه‌قه‌ هه‌موو ئافره‌تێكی كورد رۆژانه‌ نزا بۆ ئه‌و نوسه‌رو ئه‌دیبه‌ گه‌وره‌یه‌ بكات كه‌ به‌ زمانی ئه‌ده‌ب باس له‌ ئێش و ئازاری ئافره‌تی كورد ده‌كات و پیاوان شه‌رمه‌زار ده‌كات ،

نایشارمه‌وه‌ وه‌ك خوێنه‌رێك تا ئێستاش دیمه‌نه‌ تراژیدیاكانی نێو ڕۆمانی( كه‌وتنی ئاسمانه‌كان ) ی ئه‌و نوسه‌ره‌ كاریگه‌ریان به‌سه‌رمه‌وه‌ ماوه‌ ! ئه‌مه‌ گریانی به‌ڵقیسیشی هاته‌ سه‌ر .

بۆ سه‌رنج راکێشانی ئێوه‌ی خوێنه‌ر ته‌نها ئه‌م دوو دیمه‌ن و گفتوگۆیه‌ی نێو ڕۆمانه‌که‌تان وه‌ک خۆی بۆ ده‌خه‌مه‌ ڕوو

* نیان به‌ دایكی گوت : منیش دڵم یاوه‌ به‌و كوڕه‌ , ته‌نها ئومێدم تۆی , دایكه‌ حه‌ز ئه‌كه‌ی كچه‌كه‌ت بمرێ‌ ئه‌مه‌ تاكه‌ داواكاری كچه‌ تاقانه‌كه‌ته‌ .

دایكێك با به‌ڵقیسی شاژنی به‌زازه‌كانی سلێمانیش بێت كه‌ شه‌ش ده‌م به‌ جارێك هاوار بكه‌ن و گیڤ ببنه‌وه‌ , كه‌ شه‌ش كه‌ڵه‌گا , كه‌مال و پێنج كوڕی مل ئه‌ستوری چوبنه‌ خوێنی به‌ڵقیسه‌وه‌ , كوا ده‌توانێ‌ ده‌نگی كچێكی سه‌رگه‌ردان و بێ‌ هێز ببیستێ‌ .

* ئەو شەوەی مەحموودیان برد ، دوا شەو بوو ، تەنها مریەمەڕەشی خێزانی دەیزانی دوا شەوە ، دەنا چەندین شەوی دیكە بردبوویان ، مەحموودیان بۆ لێدان و ئەشكەنجەو مردن برد ، ئاخر مەحموود شیوعی بوو ، نەگبەتی ئەو شیوعیانەش لەوەدا بوو ، لە كەلاوەكانی خۆیانەوە دەیانویست دنیا ئاوەدان بكەنەوە ، بۆچی شیوعییەت جگە لە مردن و وێرانكردن ، هیچی دیكەی پێ بوو بیداتە ئەندامەكانی ، جگە لە ئەشكەنجەو دابڕان دیارییەكی دیكەی پێ بوو بۆ خۆشەویستەكانی ، شیوعییەت تەنها بۆ نینۆك هەڵكەندن و هەڵواسین و هەتا خستنە حەوزی تێزابەوەی ئازیزانی هاتبوو ، سەر دەستەكەیان لە یەكەم ڕۆژەوەپێی گوتبوو ” دەتگرن ، دەتكوژن ، دەتبڕن ” مەحموودیش لە ناو خەڵك بە دەنگە گەورەكەی دەیگوت ” من سەرشۆڕ ناكەم مەڕیش بم تف لە قەسابەكەم دەكەم ” بە گاڵتەشەوە دەیگوت ” قەسابەكانی هەولێر وانین ، ئەوان لە جوانی خوێنی مەڕەكانیانەوە هەموویان بوونە شیوعی ” 

ئەوانەی بردیان مەفرەزەیەكی تەواو بوون ، دوو پیكابی پڕ سەربازو ئەمن ، تۆزێك دوور لە ماڵی مەحموود وەستابوون ، ئەوەش دواجار بوو ماڵی مەحموود بێت لەو شەوەوە بووە ماڵی مریەمەڕەش ، مەحموودیان ڕاكێشایە دەرێ و توند دەرگایان لەسەر مریەم داخست . ئەو لەودیو دەرگاوە گوێی لێ بوو ، گوێی لە دەنگی زللەو شەق و قۆنداغە تفەنگەكانیان بوو ، مەحموود نەیگوت ئاخ ، نا نەیگوت ئۆف ، تەنها گوتی ” هەی پیاو كوژینە ، هەی چەتەینە ” ئەوان عەرەب بوون ، كوردو توركمانیشیان وەگەڵ كەوتبوو ، ئەوەش سەیر نییە ، چونكە ئەگەر ئینسانیش دایە دڕندەیی سێبەری خۆشی دەسوتێنێ . مەحموود زۆری لە شیوعیەت نەدەزانی ، كە لێیان دەپرسی ” بۆچی خۆت بە كوشت دەدەی ” ئەو دەیگوت ” من تازە هیچ ، منداڵەكانم دەبێ بە ئازادی بژین ” زەحمەتی پاڵەوانیەتی مەحموود تەنها گرتن و لێدان و بێكاركردن نەبوو ، ڕۆحی مریەمیشیان ئەشكەنجە دەدا ، ئەو جارەش لە گەرماوی ئیسكان ، كە ژنەكان باسی گرتنی شیوعییەكانیان كرد ، ژنە زل و قەبەكەی خدری بەقاڵ لە كاتێكدا مەمكە گەورەكانی لە بن ژێركراسەی گیر نەدەبوو ، چاوی لە چاوی مریەم بڕی و گوتی ” با بیانگرن ، دەڵێن ئەو شیوعییانە دەچنە زگ خوشك و دایكی خۆشیان ” مریەم جارێ لە قسەكە نەگیشتبوو ، بێگەردی ئەڵماسە شروب ، بە توندی بەرەو ڕووی چوو گوتی ” چییە خۆ نەهاتوونە زگ تۆ ، جا تا تۆ لەوێ وەستابیت بۆ دەچنە لای خوشكی خۆیان ؟ 

هێواشتر گوتی ” نازانم خدرە سیسی مێردت چۆن بە تۆ ڕادەگات ( تۆزێك پێكەنی ) نا پێشت ڕاناگا ، بۆیە هەموو ڕۆژێ فەوجێك ئەمن دێنێتەوە ” 

ژنە پەشۆكاوەكەی خدری بەقاڵ گوتی ” كەس قسەی لەگەڵ تۆ نەكردووە بێچاوەڕوو ” 

خوشكەكەی خدری بەقاڵ گوتی ” براژن دەم مەخە دەمی ئەو قەحبەیە ” 

بێگەرد پێكەنی و گوتی ” ڕاست دەكات كوڕانی گەرەك لەسەر من لاقی( ئەبو سامر )یان شكاند ، دێڵە بەبا ، خۆت تێكەڵ مەكە ئەو سستەرە مەسیحییەی جیرانتان نەبا ، هەتا ئێستا گەرەكێك منداڵت فڕێ دابوو ” 

بێگەردیش گیرا نازانرێ لەسەر شەڕەكەی گەرماوی ئیسكان گیرا ، یان لەسەر ئەو بەیانانەی بە دینگەكانی تانكی گەرەكی سەیداوەیانەوەی هەڵواسیبوو ، ژنەكەی خدری بەقاڵ لای خەلكی گوتبووی ” لە زیندان حەقی منیان لەمستی ناوە ، ئێستا سكی پڕە .

ئەم ڕووداو گفتوگۆیانە ئەگەر زادەی خەیاڵیش بێت لای نوسەرو ئەدیبی گەورەی گەلەكەمان مامۆستا ( جەبار ) كە لە لاپەڕەكانی( ١٩٨ ، ١٩٩ ، ٢٠١ ، ٢٠٢ )ی ئه‌م ڕۆمانه‌دا هاتوە ، دڵنیام خودی برای نوسەرو نەوەی پێش ڕاپەڕین گه‌واهی ده‌ری دەیان ڕووداوی ڕاستەقینەی ئاوان ، بە تایبەتی خودی شیوعیەكان و بنەمالەكانیان ، چونکه‌ هەم قوربانی دەستی ڕژێمە یەك لە دوای یەكەكانی عێراق بوونه‌ ، هەم قوربانی دەستی قسەو قسەڵۆكە بێ بنەماكانی كۆمەڵایەتی بوونە .