ئەم هەواڵە بڵاوبكەوە
FaceBook  Twitter  

  

لە دوادێڕیدا دەڵێ "وادیارە شار لە ئێمە نایە، دەبێ هۆركەینەوە بۆ ناوزەنگێ". ئاخر خۆ ئەو 27 ڕۆژ پێش ئێستا لە ناوزەنگ گەڕابۆوە، بۆ هەروا زوو جارێكی دیكە شۆڕی دەكاتەوە بۆ نێودۆڵان و ناوزەنگ و سونێ و قاسمە ڕەش و نوكان و دۆڵی حیزبان؟ چ شەیدای شاخ و دۆڵانە، لەكاتێكدا ئەوان عاشقی شار و ژیانن و تازە قژی بۆ دادەهێنن! 

بەڵام خۆ ئەوەی لە دوا دێڕدا ناوزەنگ بە پشت و پەنا دەزانێ كورد نییە، ئەوە (عادل عارەبە) و لەگەڵ كەریم كاكەی پێشمەرگەدایە و لەیەكەم هەنگاوی هەفتەی هەڵاتنی كۆڕەوەوە، ئەوان هێشتا لە هەورازە نەفتەی پشت كەسنەزانی هەولێرن، هەر لێرەشدا كتێبەكەی كەریم كاكەی نووسەر تەواو دەبێت.

كتێبی "لە ناوزەنگەوە لۆ بابە گوڕگوڕ" تازەترین كتێبی كەڵە ئەدیب و نووسەر و پێشمەرگەی كورد "كەریم كاكە"یە كە پێشووتر بەشێكی زۆری لە هەفتەنامەی ڕێگای كوردستان بە زنجیرە بڵاوببۆوە. بابەتی سەرەكی كتێبەكە بیروەرییە. وەك لە نێو خودی كتێبەكەدا هاتووە "ئێرە، هەورازە نەفتەیە، دواهەناسەی ئەو بیست و حەفت ڕۆژەیە، بیست و حەفت ڕۆژی بەربای ئازادی، دوا دێڕی كتێبی لە بەفرەوە بۆ گڕ".

+لەكورد خەنی، ڕانیە ئازادە.

- یەكی نیسان هێشتا زۆری ماوە!

-درۆ نییە.

ئیدی لەوێوە لە هەواڵی ئازادكردنی ڕانیەوە كەریم كاكەی نووسەر، بیرەوەری كەریم كاكەی پێشمەرگە و دەستە پێشمەرگەیەكی هاوڕێی لە ناوزەنگەوە دەگێڕێتەوە. نووسەر زۆر بە سەلیقە و سەرنجی جوان دیمەنی ئەو شوێن و رێگا و گوند و شاخ و كێوانە بە وشە هەڵدەچنێ. بەدەم ڕێگاوە لەهزر و تێگەیشتنی ڕوونییەوە تابلۆی ڕووداوەكان دەكێشێت. ئاخر ئەو خۆی گوتەنی تەنانەت ئەنفالیش نەیتوانیبوو كتێب و پەڕەی كاخەزی لێ جیابكاتەوە، بەڵام ئەمجارەیان بۆ گەڕانەوە بۆ ئاسۆی ئازادی و بۆ ناو شار دەست لە كاخەز هەڵدەگرێت و دیدات بە "كوردۆ"، بەڵام ئەو بە ئاسانی دەستبەرداری "ناڵەی جودایی" نابێتەوە و لە كۆڵەپشتەكەیدا قایمی دەكات و لەشاخ و شار هەر هاوڕێی گیانی بە گیانین!

لە قەڵادزێوە تا هەولێر هەرچی دیمەنی ئەو دەم هەیە، بە زمانی پاراو و وشەی پڕ بەپێست دەیگێڕێتەوە، ئاخر ئەو كاتێك كە باسی خۆی دەكات لە باخچەی گلكەند و دەڵێت ئەوەندە بە گفت نەبووم لەگەڵ باخچەوانەكەدا، بەڵام لە نووسین وا نییە ئەو وەستای وشەیە، وشەی ئەدەبی گەڕان و ئەدەبی شۆڕش و ئەدەبی گێڕانەوە. ئەو كە باسی قەڵادزێ و ڕانیە و كێوەڕەش و هەیبەت سوڵتان دەكات، كە باسی ڕووداوەكانی خۆی و خەڵك و هاوڕێیان دەكات سەرلەنوێ بەوشەكانی ڕۆح بە ڕووداوەكانی ئەو سەردەم دەداتەوە.

كەریم كاكە و هاوڕێیانی بەر لە هەولێر ڕووە و شەقڵاوە دەچن، هێشتا هەولێر ئازاد نەبووە، هێشتا 11ی ئادار نەهاتووە. لە شەقڵاوەوە بۆ كۆڕێ و لەوێوە بۆ پیرمام. ئەو لەوێ دەڵێت؛ "هێی، قەڵات، تۆ بڵێی بە تفەنگەوە بتگەمێ و وێنەی بەڵاگێڕی بە دەورتدا بسووڕێمەوە"!

نووسەر وێڕای گێڕانەوەی هەناسەكانی ئازادیش تەنانەت بەر لە ئازادكردنی هەولێریش، ئەو دەمەی كە لە پیرمامن دەگێڕێتەوە و دەڵێت؛ "بیرمان نەچێ، تا دیً هێزی پاتار بەهێزتر دەبێ".

كەریم كاكەی نووسەر وەختێك كە لە كۆڕێ بیرەوەری كەریم و پێشمەرگەكانی هاوڕێی دەگێڕێتەوە لە ماڵی "سەنگەر" كە پێشمەرگەی هاوڕێیەتی دیمەنێكی پڕاوپڕ لە واتا و پەند و وانەیەكی گەورە دەگێڕێتەوە كە بۆ ئەو كات و ئێستا و ئایندەش هەر زیندوو دەمێنێتەوە.

ئەو دیمەنی سەنگەر و دایكی دەگێڕێتەوە:

"چا نەبوو هاتنەوە، كوڕە خۆ عارەب بە پەندی بردین، بەغدا نیوەی ڕێیان بێ، بە میوانداریش نەیانبینمەوە، نەنكم لە خۆڕا نەیدەگۆ: نەشیری حووشتر نە دیداری عارەب.

كوڕەكە دەڵێ:

هۆدا، ئەوە چ دەڵێی؟ ئێمە هەموومان كورد نیین، عارەبەكیشمان دەگەڵە.

دایك مستەكی توندی لە سینگی خۆی دا:

هەیڕۆ، كوڕم وا مەڵێ!

كوڕ: دایێ، لۆ؟

دایك كەمێ داما: ئۆجا، خۆ من دەگەڵ عارەبی پێشمەرگەم نییە".

دیمەنی پێشمەرگەی عەرەب، لە گەرمەی ڕاپەڕینی كوردستان دیمەنێكە ئاوڕی لێ نەدراوەتەوە، بەڵكو گەلێك جار وێنای دیمەنەكانی ڕاپەڕینی كورد لە باشووری كوردستان وا كراوە كە پێشمەرگە دژ بە عەرەب بووە، بەڵام لە دەستە و كتێب و واقیعی كەریم كاكە ئەوە شتێكی دیكەیە و باسی شتێكی دیكەمان بۆ دەكات تەنانەت لە كۆتایی كتێبەكەشیدا كە لەگەڵ عەرەبێكدا كۆڕەو دەكەن!

نووسەر بەشێكە لە هەوڵەكانی ئازادكردنی هەولێر، ئەو دێتەوە هەولێر و لەناو جەرگەی ئازادكردنی هەولێردا ئەو دەم ئەو پێشمەرگەیە، ڕووداوەكان بە وشە دەگێڕێتەوە، وشەگەلێكی كە مەگەر هەر ئەو بتوانێت دایبتاشێت و بێهۆنێتەوە. ئەو لە پاڵ دیمەنە وردەكارییەكانی ئازادكردنی شوێنە جیاجیاكانی هەولێردا دیمەنی دیكەشمان پێ دەڵێت، بەتایبەتی ئەوانەی كە تایبەتن بە بەرەی كوردستانی و جاشەكانەوە.

"خەڵك مەستی ئازادین و گوێ بەو قسانە نادەن. ئەرێ ئێوە سەی (جاشلی)تان بیستووە؟ ئێ، لە جاشلی گەڕێ، مام خدر دەڵێ: ئەو جاشە تەرەسە، بەخۆو بە سەوە، ئێستا خۆی لە پەنای بەرپرسێكی گەمبۆری بەرە ناوە، ئەی هاوار، وانابێ.

ژنێ دەڵێ:

زمانی خۆت نەگری، سەرت لەسەر دادەنێی.

بە مام خدرم گۆت: بەرە میهرەبانە، هەر لە جاش نا، لە عەلی حەسەن مەجیدیش دەبوورێ!

مام خدر: بەرە خۆی دەبینێتەوە، بزانە كوو لە ناو جاشان بزر دەبێت"!

كەریم كاكەی شەیدای ئازادی كوردستان كە وەك خۆی دەڵیت منداڵیش دەزانێت ئازادی كوردستان بەبێ كەركووك ناتەواوە. ئەو لە ناو شار و دوای ئازادی شتی دیكەمان پێ دەڵێت بەتایبەتی كاتێك لەگەڵ شوراكان دەكەوێتە دەودەوانێ! شوراكان ئەوانەی كە پێیان وابوو دەبێت دەسەڵات بۆ خەڵك بێت و خەڵك ڕێكبخرێت و خۆی خۆی بەڕێوەببات، نەك بەرەی كوردستانی، بەڵام كەریم كاكە وەك خۆی دەڵێت تا ڕزگاركردنی كەركووك لەگەڵ بەرە دەبم و دواییش لە چ جێ، جێم نابێتەوە!

كەریم كاكەی پێشمەرگە وەختێك دیمەنی دوای ئازادكردنی هەولێر دەگێڕێتەوە جۆرێك لە ساردبوونەوە لە تێكۆشان دەخاتە ڕوو، ئەو دەڵێت؛ "لێتان ناشارمەوە، من لەو چەند ڕۆژە تەواو ساردببوومەوە، وەك بڵێی باوەڕم بە شەڕ و هێرش نەمابێ، ئاخر، دەزانی چ ڕاوڕووتێكم دی، بە چاوی خۆم دەمدی، شۆڕشگێڕ، تەلەفزیۆنی دەدزی، شۆڕشگێڕ ترۆمبێلی زبڵی دەدزی، بەزەبری دەمانچە ترۆمبێلی ئەمن و سەربازییان لە خەڵك وەردەگرتەوە، بۆخۆیان دەیانفرۆشتەوە، لەو ڕۆژانە پێشمەرگەی پاك و سادە لەناو پێشمەرگەی دز و جاش، وەها بزربوون، مەگەر تەنیا لە دەمی هێرش و تەنگانە لێكدی جودا بكرێنەوە، ئەوەی من لەو چەند ڕۆژە دیم، بەس بوو بۆ ئەوەی تف لە چەك بكەم و خۆم بدەمە پەنایێ و لەچاو بزربم".

بەڵام هەموو ئەوانەش نووسەر سارد ناكەنەوە و بێ باكی ناكەن بەرانبەر ئازادكردنی كەركووك، ئەو لەگەڵ هاوڕێیانی بەرەو پردێ دەڕۆن. ڕۆشتنێك لە هەموو لایەك پێشمەرگە و كورد بەبێ بەرنامە بەرەو كەركووك دەڕۆن و دەیانەوێت داستانی مێژوویی و بۆ یەكەم جار لەوەتەی داگیركردنی كەركووك ڕزگار بكەن.

ئەو چوو بۆ كەركووك هەر لە هەولێرەوە تا دەوروبەری كەركووك بەورد و درشت دەكاتە وشە و دەیگێڕێتەوە و ڕۆحیان پێ دەبەخشێت. ئەو تەنانەت ئەو هاوكاری نانە تیریانەی كە ڕەوانەی لای پێشمەرگە دەكرا دەیناسێتەوە كە نانی ژنە هەولێرییە، ئەو لە بۆنی ڕا دەزانێت و نانی ژنە هەولێری دەناسێتەوە.

كە بوو بە نەورۆز، لەژێر زەبی خەڵك و پێشمەرگەدا بەعس ڕووخا، بەعس هەڵات "شار هەمووی گڕی گرتووە، لەناو گڕان گڕی بابە گوڕگوڕ بزرە..... ئەم ئێوارەیە، ڕەحیماوە دەروازەی ڕوناهییە، ڕوناهی ئازادییە، دەروازەی گەیشتن بەگڕ، ئەو گڕەی لە قەندیلەوە، لەناوزەنگەوە گڕیان بۆ گرتبوو".

نووسەر ئەو جارەی كە ئازادی كەركووك دەبینێت، جێژوانی لەناو پۆلیسخانەیەك دەبێت كە لەسەر مەقەبایەك چەكوچ و داسێكی پێوە كراوە، ئیدی تا سێزدە ساڵی دیكە كەركووك نابینێتەوە، چونكە ئەفالچییەكان كەركووك دەگرنەوە و شۆڕشی كەركووك زۆر ناخایەنێت.

لە پاشەكشەی پێشمەرگە و شكان و بێ بەرنامەیی كوردیش بەوردی دەگێڕێتەوە تا ئەو شوێنەی كە "خۆیان ناوێرن، ئەمن دەنێرن"!

نەك هەر ئەوەندە، بەڵكو زۆر بە جوانی دیمەنی گەڕانەوەی بۆ ماڵ و ئەو تابلۆیە دەكێشێت كە پێشمەرگەیەكی تێكۆشەر كە خەمی ئازادی بووبێت و لە ناوزەنگەوە هاتبێتە شار و جارێكی دیكە بە مەتار و كۆڵە پشتەكەیەوە لە درۆپە ئاو لە مەتارەكەی بكات و بە ناڵەی جودایی و لەگەڵ پێشمەرگە عارەبەكەی هاوڕێیدا لەبابە گوڕگوڕەوە بەرەو ناوزەنگ ڕێگە ببڕن!

بەكورتی:

ناوی كتێب: لە ناوزەنگەوە لۆ بابە گوڕگوڕ

بابەت: بیرەوەری

نووسەر كەریم كاكە

نەخشەكار و بەرگ: سەركەوت وەلی

تابلۆی بەرگ: قەرەنی جەمیل-1976

نۆبەتی چاپ: یەكەم-2018

لە بەڕكی نووسەر چاپكراوە

لە كتێبخانەكانی كوردستان بەردەستە