ئەمە بڵاوبكەوە
FaceBook  Twitter  

 

زۆر دەمێكە نیازت ھەبوو ، 

گوایە شتێکم پێ بڵێی ؛

دە پێم بڵێ ؛ بۆ دوودڵی !

هەرچەندە ئەوەی دەیبیستم 

هەر درۆیە

وەلێ بێدەنگیەکەت ئازیز

سامناکترە لەم درۆیە 

با من بڵێم نهێنی و 

گلەیی دڵەی خۆم

کوا پەیمانت کە دابووت پێم ؛

" لە هەر وەرزێک گوڵێک بێنی،

بۆ ڤژی درێژی پەخشانم ،

بیهۆنمەوە کەزی ......کەزی و ،

بەگوڵ ئارایشتی بکەم "

چاوەڕوانیم زۆری خایاند 

نازانم چەند .... !

نە وەرز هات .... نە گوڵ ڕوا 

بوو بە نەهات ،

ژیان سەرتاپە وەستا بوو

لەو دیوی کات ،

ڕۆژمێریش فێڵی کرد و

ڕێچکەی ڕۆژانی تێکەڵ کرد

بە ناچاری چاوەروانی ، 

پۆڕم هۆنیەوە بێ دیاری

لەو پەڕی چێژی دڵداری 

کەوتمە ناو شەوگاری تاری

کپی خشا بە جەستەما

کەوتمە گومان ؛ 

بوون یان نەمان ،

بۆچی چراکان تاریکن ؟

بۆ ڕۆژمێر درۆ دەکا ؟

وەرزەکانی گوڵ و پەیمان 

کەی ڕاست دەکەن ؟

کەی دێنە کا ؟ 

دڵگران مەبە ئازیزم ،

نامەوێ چیتر گوڵی سوور

من لە داخی پەیمانەکەت 

قژم دا بەر تاشین وەک کوڕ .