ئەمە بڵاوبكەوە
FaceBook  Twitter  

 

هونەرمەند زرار لەدایكبووی شارۆچكەی سەنگەسەرە سەر بە قەزای پشدەر، دوای گواستنەوەی پشدەر لەلایەن حكومەتی عێراق كۆچیان كرد بۆ شاری هەولێر، دواتر خۆی بۆ ماوەی چەند ساڵێك لە وڵاتی ئێران ژیانی بەسەر بردووەو ئێستاش لە وڵاتی بەریتانیا درێژە بەژیان دەدات، لەم بارەیەوە ماڵپەڕی رێگای كوردستان چاوپێكەوتنێكی لەگەڵ ئەنجامداوە.

دیمانە –هێرش مەغدید

 

-سەرەتای كاری هونەریت دەگەڕێتەوە بۆ كەی؟

+ هەر لە تەمەنی منداڵیم لە قوتابخانە لەڕۆژانی پێنج شەممە زۆر جار مامۆستاكان بانگیان دەكردم تا گۆرانی بڵێم لەبەردەم هەموو قوتابیان.

دەتوانم بڵێم لە ساڵی 1991 سەرەتایەك بوو بۆ كاری هونەریم كاتێك لە كۆڕێكی ماتەمینیدا توانیم لەگەڵ تیپێكی مۆسیقادا گۆرانی بڵێم لە بەرامبەر خەڵكێكی زۆردا وە ڕۆژی دواتریش لە یادێكدا دووبارە داوام لێ كرا كە بە گۆرانی بەژداری بكەم كە خەڵكانێكی زۆر هانیان دەدام بۆ بەردەوام بوونم، بەڵام لەبەر چەند هۆكارێك لە كاری هونەری دوركەوتمەوە.

-یەكەمین گۆرانیت بەناوی چی بوو؟

+یەكەم گۆرانی كە خۆم ئاوازم بۆ دانا گۆرانی «دڵم تەنگە» بوو كە شیعری كاك سروشت بارانیە، ئەو گۆرانییە یەكێكە لە گۆرانییەكانی ئەلبومی هەناسە كە ئەمساڵ بڵاو كرایەوە. 

-هونەر لای تۆ چی دەگەیەنێت؟

+هونەر لای من گەیاندنی پەیامە بۆ گۆمەڵگا, كە لە ڕێگەی هونەرەوە دەتوانرێت زۆر پەیامی بەهێز بگەیەندرێت كە لە مێژوشدا ئەوە سەلمێنراوە كە هونەر چەند كاریگەری هەبووە لە گۆرانكاریداو وە هونەر توانیویەتی لە زۆر كاتی دژواردا میللەت بە ئاگا بهێنێتەوە.

-تاوەكو ئێستا چەند بەرهەمت كلیپ كردووە؟

+ تاوەكو ئێستا چوار بەرهەمم كلیپ كردووەـ بەنیازیشم لەم نزیكانەیە گۆڕانیەكی دیكەم كلیپ بكەم لە كوردستان.

-بەرهەمی تازەت لەبەر دەستە؟ خۆی لەچەند تراك دەگرێ؟

+ ئەلبومێكی تازەم تۆمار كردووە كە لە 6 تراك پێك دێت و سەرجەم ئاوازەكانیش هی خۆمن و لەماوەی چەند رۆژێكی دیكە كە بەناوی ژیلەمۆیە ئەلبومە نوێیەكەم بەر گوێی گوێگرانم دەكەوێت.

-وەك دەزانین تۆ لە تاراوگە دەژیت، كارە هونەریەكانتی ئاسان كردووە؟

+لە هەندەران كاری هونەری زەحمەتی زیاترە تا كوردستان، چونكە بەهۆی سەرقاڵی بە ئیش و كارەوە كەمتر كات هەیە بۆ هونەر, وە ناسینی كەسانی موزیك ژەنی لێهاتوش هەر ئاستەمە و پەیوەندییەكان لە ئاستێكی باشدا نییە و زیاتر پەیوەندییە هونەریەكانیش پەیوەستە بە ماددەوە.

-هیچ ئامێرێكی میوزك دەژەنی، تاچەند گرنگە گۆرانی بێژ بیزانێت؟

+من خەریكی ئامێرێكی تارم لە لای مامۆستایەكی ئێرانی قوتابیم، بەڵام لەبەر زۆری كێشەو سەرقاڵی بە ئیش و كارەوە لە مەشقەكانمدا سستم بەداخەوە، بەڵام هەوڵدەدەم قەرەبووی بكەمەوە.

-كاریگەری چ هونەرمەندێكت لەسەرەو لاسایی كەسێك دەكەیتەوە یان رێچكەیەكی تایبەت بەخۆت هەیە؟

+كاریگەری هونەرمەندی گەورەی كورد مامۆستا حەسەن زیرەك زۆرە لەسەرم و بوەتە پێشەوای هونەری بۆم وە هەروەها سەید عەلی ئەسغەری كوردستانی, وە هونەرمەندی گەورەی فارس محەمەد رەزا شجریان و ئیرج كە عاشقی دەنگیانم و زۆر چێژیان لێ وەردەگرم, بەڵام هەوڵمداوە كە لاسایی كەس نەكەمەوە و تا ئەو جێگەی بتوانم گۆرانی كەس ناڵیمەوە , وە ئەگەر گۆرانی هونەرمەندێكی تر بڵێمەوە ئەوا بەدڵنیاییەوە ناوی هونەرمەندەكەو شاعیرەكە دەهێنم و ناهێڵم حەقی بخورێت و ناوی وون ببێت.

- حەز دەكەی هۆنراوەو ئاوازەكانت چۆن بێت؟

+هەوڵمداوە ئاوازەكانم كوردییەكی پاك بێت و لە فارسی و توركی و عەرەبی نەچێت، وە شیعرەكانیش كە هەڵیان دەبژێرم كوردییەكی پاراو بێت و حەزدەكەم لە شیعریك كە وشەكانی پڕ مانا بن و زۆر وشەی كوردی كە ئێستا كەم بەكاردێن بتوانم بیانگێڕمەوە ناوخەڵك تا دووبارە بەكاربهێندرێنەوە لە جیاتی وشەی زمانی بێگانە.

-ئێستا زۆربەی خەڵك لەكارەكانی ھونەرمەندە تازەكان رازی نین و بە ھونەرمەندی كاتی ئەزانن هۆكار چییە؟

+بەداخەوە لەبەر بێ بەرنامەیی لێپرسراوانی هونەری و بێ باكی و بێ غەمی لە كوردستان بەرە ڵاییەكی هونەری زۆری پێوە دیارەكە هیچ فلتەرێك نییە بۆ پاكردنەوەی گۆرانی و مۆسیقای كوردی, كە بەرپرسانی هونەری لە كوردستان پارەیەكی زۆر بە فیڕۆ دەدەن بۆ خزمەتكردنی هونەری بێگانە، هەر لە گۆرانی و مۆسیقا بگرە تا فلیم و دراماكان , وە بەداخیشەوە زۆریك لە گۆرانی بێژان گۆرانی هونەرمەندە گەورە كانیان شێواندوە و بێ تامیان كردوون, لەو رۆژگارە دا كە خەڵك زوو لە گۆرانیەكان بێزار دەبن بە بۆچونی من هۆكارەكەی دەگەڕێتەوە بۆ بێ ڕوحی ئاوازەكە و بێ قووەتی شیعرەكە واتا شیعرێكی لاواز لە وەزن و قافیەو خراپی زەوقی گۆرانی بێژ لە هەڵبژاردنی میلۆدی دا , ئێمە وەكو كورد هونەرێكی زۆر دەوڵەمەندمان هەیە و هونەرمەندانی زۆر بەتوانامان هەیە كە وا پێویست بوو وانەیان لەسەر خوێندرابا و منداڵەكانیان لەسەر ئەو هونەرە رەسەنە راهێنابا نەك ڕێگا بدرێت هەركەسێك ویستی یاری بە هونەری میللەتێك بكات.

-تا چەند لەگەڵ ئەوەیت گۆرانییە بیانییەكان بكرێنەوە كوردی بەھەمان ئاوازو ریتم؟

+من پێموایە هونەر ناسنامەی هەر میللەتێكە, ئێمە دەتوانین كەڵك لە گۆرانییە بیانیەكانیش وەربگرین بە مەرجێك بیانخەینە خزمەت هونەری خۆمانەوە, نەوەكو ئێمە بكەوینە ژێر كاریگەری ئەوان.

-لەكۆتایی ئەگەر شتێكت مابێت؟

+هیوادارم مۆسیقا ژەنەكان یارمەتی دەرێكی باشتربن لەگەڵ گۆرانی بێژەكان تا بتوانین هونەرێكی جوانترو بە چێژ تر پێشكەش بكەین.