ئەمە بڵاوبكەوە
FaceBook  Twitter  

سەدیق سەعید ڕواندزی

 بەدرێژایی مێژوو، مرۆڤ لەململانێدا بووە چ لەسەرەتاكانی قۆناغی سەرەتایی ژیانیدا لە هەمبەر سرووشت و بوونەوەرەكاندا، چ لە سەردەمی ئێستا و كۆمەڵگادا. هەژموونی مرۆڤ بۆ ویستی پاوانخوازیی و دەسەڵاتخوازی، هیچ نییە جگە لە ململانێكردن بەئامانجی ویستخوازیدا. شەڕو ئاشووبەكان، بەشێكن لەو ململانێیانەی كە ناتوانرێت بەئامرازی دیكە یەكلاییبكرێنەوە و سەرەنجام بەهێز و كوشتن و سڕینەوەی جەستەیی، هەوڵی یەكلاییكردنەوەی ئەو ململانێیە دەدرێت. كە دەرگای ململانێ كرایەوە، ئیدی تەنیا و تەنیا بەداخستنی كۆتایی دێت. بێگومان هەمیشەش مرۆڤ وەك بوونەوەرێكی كۆمەڵایەتی لەململانێدا بووە لەگەڵ دەوروبەریدا. ململانێ لە كۆمەڵگاكاندا، زۆرجار دەبێتە بەشێك لەپەروەردەی دەروونی و جەستەیی، كە لەپێناو بردنەوەیدا هەموو ڕێگەیەك دەگرینە بەر. ئەمەش بەشێكە لەویستی پاوانحوازانەی مرۆڤ. هەمیشەش سرووشی بەشێكی زۆر لە مرۆڤەكان وایە كە دەكەونە ململانێی یەكتری، ئیدی هەوڵی سڕینەوە، یانیش نەمانی شوناسی یەكتری دەدەن، كاتێكیش ململانێ دروست دەبێت، ئیدی كەس نازانێت سەرەنجام چارەنووسی ئەو ململانێكردنەی یەكتری بەچی تەواو دەبێت. بردنەوە یان دۆڕان؟ بەختەوەری یان غەمگینی.

كامیل بەهای پاڵەوانی ڕۆمانی (كاتێ مەمك مرد) دەكەوێتە ململانێ لە گەڵ سەلیمای هاوسەری و ژنیش، ئیدی دەزانێت تازە دەرگای ململانێ كراوەتەوە و بەو ئاسانییەش داناخرێت. تەنیا بەبردنەوە و سەركەوتنی یەكێكیان نەبێت. بەڵام كامیل بەها، نەدەیەوێت سەربكەوێت، نەدۆڕانیش، بەڵكو ڕێگەیەكی دیكە دەگرێتە بەر. ئەویش هەڵاتنە لە ژن و ئیدی بڕیار دەدات بیر لەو ڕەگەزە نەكاتەوە، بەڵكو تەنیا بۆخۆی بژیت. بۆیەشە ماڵ جێدێڵێت و بەمەبەستی پشوودان دەچێتە دارستانێك و ئەوێ دەكا بەلانەی خۆی. كاتێ لەناو دارستانەكە دەبێت، واهەست دەكات ئیدی دووركەوتۆتەوە لە سەلیما و لە ململانێكانی ژن، بەڵام ڕۆژێكیان لە دارسنەوبەرەكانی ناو دارستانەكە، چەندین ژن بەشێوەی وەهمی دەردەكەون و لەگەڵ كامیل بەها دەكەونە گفتوگۆ. كامیل لەماڵەوە لە سەلیما هەڵهات و چووە دارستان، وەلێ لەوێش ژن وازی لێ ناهێنێت. بۆیە لەدارسنەوبەرەكانەوە ژنەكان جارێكی دیكە بەكۆمەڵ دەگەنەوە كامیل بەها و بەوەهم لەگەڵیان دەكەوێتە گفتوگۆ. سەرەتا هەموویان دەیانەوێت بەیەكەوە قسە بكەن، بەڵام ئەو پێیان دەڵێت: بەنۆرە قسە بكەن. سەرەتا هودا دەست بەقسە دەكات لەپەیوەندی سۆزداری و خۆشەویستی دەدوێت و بەپیرۆزییەوە باسی دەكات. كامیل وەڵامی دەداتەوە و دەڵێت: ئەو خۆشەویستییەی تۆ پێت وایە پاكە، شتێك لەپیسی هەر تێدایە. ئەوەی ئەمڕۆ پاكە ڕۆژگار بەڕێڕەوی زەمەن پیسی دەكات. ئەوەی ئەمڕۆ پاكە لە ڕۆژانی داهاتوودا پیس دەبێت. ئەمەش وەك ئاماژەیەك بۆ خۆشەویستی و پەیوەندی نێوان هاوسەران كە سەرەتا چ پیرۆزە لایان، دواتریش هەمان ئەو خۆشەویستییە، بە چارەنووسێكی تراژیدی كۆتایی دێت. هودا دەگەڕێتەوە ناو دارسنەوبەرەكە. ئەمجارەیان ژنێكی دیكە دێت كە ناوی (ڕایا)یە. كامیل بڕیاریداوە كە ئیدی بیر لە ژن نەكاتەوە. بۆیە ڕایا پێی دەڵێت: كە ئەو بەنرخە ئاخۆ بیر لەویش ناكاتەوە؟ كامیل وەڵامی دەداتەوە كە هەموو شتێكیش لەگەڵ تۆدا كۆتایی هاتووە، چونكە تۆ دەتویست من ببمە خاوەنداری تۆ. منیش خاوەنداریەتی قبول ناكەم. ڕایا وەڵامی دەداتەوە و پێی دەڵێت: هیچ پیاوێك وەفادار نییە. كامیل وەڵامی دەداتەوە، بەڵام تۆ منت بە جێهێشت و پشتت كردە خۆشەویستی و چوویە باوەشی پیاوێكی دیكە. ڕەنگە بەیانی بچیتە باوەشی پیاوێكی دیكەش. لەدوای ئەو نابیغە دێت. ئەویش بەكامیل بەها دەڵێت: چۆن دەتوانی لە ژن ڕابكەی، مەگەر نازانی ژن ڕۆژە، شەوە، ئایا شەووڕۆژ لە یەكتری جیادەبنەوە؟ بەم شێوەیە یەك لە دوای یەك ئافرەتەكان لە دارسنەوبەرەكان دێنە دەرەوە لەگەڵ كامیل دەكەونە ململانێ. تا ناچار دەبێت بگوازێتەوە دارستانێكی دیكە، چونكە ئەو دەیەوێت بەهەر شێوەیەك بێت، دەسبەرداری ئافرەت بێت. كامیل لەدارستانێكی دیكە، هەوڵدەدات بەتەنیا بژیت، بەڵام دەزانێت پێویستی بەوەیە كەسێك هەبێت خزمەتی بكات، هەروەها بۆ دڵنەوایی خۆشی لەدارستان باكیر دەكات بە هاوڕێ و هاوەڵی خۆی. باكیر پێی دەڵێت: كە واز لە ئافرت بێنێت و چاوەڕوانی پەری دارستان بكات. كە لەهەموو ئافرەتانی سەرزەمین پاكتر و جوانترە. كامیل بەها بەو خەیاڵە لەگەڵ باكیر لە دارستان چاوەڕوانی پەری دەكات. ڕۆژەكان بە شەو دەسپێرێت. هەموو كات و ساتێك لە چاوەڕوانی دایە، وەلێ پەری دارستان هەرنایەت. كامیل بەها كە بەدەست سەلیمای ژنی كەوتۆتە ململانێ، ئیدی هەموو ژنەكانی دنیا لەو سۆنگەیەوە دەبینێت. بۆیە بڕوای وایە پەری دارستان، ژنێكی دیكەی جیاوازە لەوانی تر، لە كاتێكدا هەر لەبنەڕەتەوە ئەوە بوونی نییە، بەڵكو باكیری هاوڕێی دەیەوێت بەو شێوەیە فریوی بدات. لەو دارستانەدا لەگەڵ باكیر دەمێنێتەوە هاوشێوەی گۆدۆ چاوەڕوانییەكی بێهوودە دەكات، بەڵام پەری دارستان جگە لەوەهم و گاڵتەیەكی باكیری هاوڕێی هیچی تر نییە. كامیل بەها وادەزانێت ئیدی ئەو كە لە ئافرەت دووركەوتەوە و دەستبەرداری ژیانی هاوسەریەتی بووە، ئەوا دەتوانێ بە تەنیا بژیت و پێویستی بەكەس نەبێت، بەڵام دوای ماوەیەك ژیان بەتەنیا و لەدارستاندا، ئیدی كامیل بەهای پاڵەوانی ڕۆمانی كاتێ مەمك مرد، نائومێد دەبێت و تەنیایی تەنگی پێ هەڵدەچنێت. تا سەلیما دێت و جارێكی دیكە بەیەكتری شاد دەبنەوە و كامیلیش دارستان جێدێڵێت و دەگەڕێتەوە ماڵ و درێژە بەژیانی پێشووی خۆی دەدات. بەمەش لەو ململانێیەدا، سەرەنجام كامیل بەها شكستی هێنا و نەیتوانی بە تەنیا بژیت و واز لە ئافرەت بێنێت. چونكە كەس ناتوانێت ئەو كارە بكات و بەردەوامی ژیان، پەیوەستە بەئافرەت و هیچ كەس ناتوانێ بە تەنیا بژیت. سەرەنجامیش كۆتایی بە ڕووداوەكانی ڕۆمانەكە دێت. پەیامی پشت ئەو ڕۆمانە ئەمەیە، كە هەرچەندە ژن و پیاو ململانێی یەكتری بكەن و لەچوارچێوەی ماڵێكدا بژین و نەیاری یەكتریش بن، بەڵام دواجار كەس ناتوانێ بێ ئەوی تریان بژیت و هەر پێویستییان بە یەكترییە.

*پەراوێز/ ناوی ڕۆمان(كاتێ مەمك مرد) نووسینی(حەننا مینا)/ وەرگێڕانی(عیماد حەسەن)، بڵاوكراوەی دەزگای ڕۆسا 2016...