ئەمە بڵاوبكەوە
FaceBook  Twitter  

كامەران حاجی ئەلیاس

ئەگەر لە مانشێتی شانۆگەرییەكە دەست پێبكەین (ئافرەت لە دۆزەخ دا) سەرەتا راستەوخۆ فۆكسمان بۆ ئەو بۆ ئەو دۆزەخە و بەهشتە دەچێت ، كە خودای گەورە لە قورئانی پیرۆزدا باسی لێوەدەكات ، بەڵام دوای بینینی نمایشەكە ئەوەمان بۆ روون دەبێتەوە كە دەرهێنەر مەبەستی لەو دۆزەخەیە كە خودی مرۆڤ لەم جیهانەدا بەگشتی بەرامبەر بە مرۆڤ وەبە تایبەتیش بەرامبەر ئافرەت ئەنجام دەدات .

روداوەكانی شانۆگەرییەكە لە رێگەی گێرانەوەی روداوی راستەقینەی پێنج ئافرەتە كە لەژێر دڕندایەتی مرۆڤدا گەیشتوون بە دۆزەخ دەست پێدەكات كاتێ پیاو بەشێوەیەكی زۆر دڕندانە دژی رەگەزی مێینە هەڵس وكەوت دەكات باس لە پێنج دیاردەی قێزە وونی ناو كۆمەڵگا كەلەژێرپەردەی ئاین و كلتوور وحەز و ئارەزووەكان، ئەنجامی دەدات.

دەرهێنەر بەشێوەیەكی فیدباك روداوەكان دەگێرَتەوە ، كاتێ پێنج ئافرەتەكە لە تابوتەكان دێنەدەرەوە هەرەیەكەو باس لە چۆنیەتی كوشتنی خۆیان دەكەن ، دەرهێنەر بە نیشاندان و فۆكس كردنی لەسەر رووداوێكی وەكو كوشتنی (دوعا) بەشێوەیەكی زۆر دڕندانە بەهۆی ئەوەی ئەوینداری لەگەڵ كورە موسڵمانێك هەیە پاشان روداوی كچە كریستانەكەی بەغدا و لەگەڵ ئەو كچەئینگلیزەی تەمەن (17) ساڵان (ساراكان) كەلەلایەن باوكی دەستدرێژی سێكسی دەكرێتە سەری بۆیە (ساراكان) خۆی دەكوژێت بەهەمان شێوەش لەرێگەی كاركتەری (ڤیان) باس لە ئافرەتانی ئێزێدییەكان و كریستانیەكانی ژێر دەستی داعش دەكات كە چۆن بەناوی ئاین جینۆساید دەكرێن و دەستدرێژی سێكسیان لەگەڵ دەكرێت ،لەگەڵ بوونی چەندین فۆكسی تر وەكو كوشتنی ئافرەتێك بەهۆی بوختان هەڵبستن وكوشتنی ئافرەت لەسەر ئابروو بەڵام هەندێك لە تاوانەكان خودی ئافرەت هۆكار بوو بۆ كوشتنی ئافرەت بە تایبەتی لەدیمەنی بووختان هەڵبستن لەسەر ناپاكی و خیانەتكردن.

دەرهێنەر ئەو هەموو رووداوە تاوانكارییە نەبستۆتەوە بە شوێنێك یان كۆمەڵگایەك بۆ ئەوەی پێمان بڵێت مرۆڤ دڕندەیە لە هەر شوێنێك بێت یان لەسەر هەر ئایین و مەزهەبێك بێت بەڵام زیاتر فۆكسەكان بۆسەر نێو كۆمەڵگای خۆمان بوون.

دەرهێنەر بۆ ئەوەی هەر لەسەرەتای نمایش بینەر بخاتە نێو كەشوهەوای شانۆگەرییەكەو بەشداربووی رووداوەكان ببن لەرێگەی تونێلێكی تاریك دەچنە ناو هۆڵی نمایش كە گوزراشت لەودۆزەخە دەكات كە مرۆڤی دڕندە بەدەستی خۆی بەرامبەر بە ئافرەت ئەنجامی دەدات.

راستە پێنج ئەكتەری كچ رۆڵەكانیان بەرجەستە دەكرد بەڵام لە هەمان كاتدا جگە لە رۆڵی سەرەكی خۆیان چەندین رۆڵی تریان بەرجەستە دەكرد ئەمەش كارێكی ئاسان نیە كە لەیەك كاتدا بتوانی دوو تا سێ كاركتەر بەرجەستە بكەین بەتایبەتی لەرووی دەنگ و ئاماژەكان بەڵام پێنج ئەكتەرە كچەكە تارادەیەك سەركەوتوو بوون ئەگەرچی هەندێك جار لەرووی دەموو دوو جۆرە تێكەڵ بوونێك هەبوو بەڵام كاریگەرییەكی ئەوتۆیان لەسەر نواندنەكە نەبوو چونكە وەكو زانراوە جۆری دەنگی ئافرەت لەگەڵ دەنگی پیاو جیاوازە بەڵام ئەوان زۆر جار لەرێگەی گۆرینی بەشێك لە جل وبەرگیان كەسایەتی پیاویان بەرجەستە دەكرد گرنگ ئەوە بوو بەگشتی كاریگەری نەرێنی لەسەر نمایشەكە نەبوو ئەوەی دەرهێنەر مەبەستی بوو لەگەیاندنی پەیامەكە گەیشتە بینەران ،قوماشە سپییەكە(كفن) هاوكارێكی باش بوو هەم وەكو ئیكسسوارات هەم وەكو جل و بەرگ بە چەندین شێوە بەكاری بهێنن ئەمە جگە لە لەوەی قوماشی سپی ماناومدللولی زۆر هەڵدەگرێت وەكو پاكی و راستگۆیی...

ئەگەر باس لە سینۆگرافیای نمایشكە بكەین دیكۆر و رووناكی و میوزك لەگەڵ ئیكسسوارت هاوكارێكی باشی ئەكتەرەكان بوو بەكارهێنانی تابوتەكان گۆرینی بۆ چەندین فۆرم لای من ماییە تێرامان بوو لە هەمان كاتدا هاوكارێكی زۆری كەش گشتی نمایشەكە بوو تا ئەو رادەییەی بینەرانی بە تەواوی نقومی نمایشەكە كردبوو .

لە كۆتاییدا دەست خۆشی لە ستاڤی شانۆگەری (ئافرەت لە دۆزەخ دا) دەكەم بەهیوای كاری زیاتر .

شانۆگەری (ئافرەت لە دۆزەخ دا) لە نووسینی و دەرهێنانی هونەرمەند "هیوا سوعاد یونس" نواندنی هەریەك لە(كەژاڵ حەسەنی،شەیما فریاد ،سۆنیا هیوا، عەسەل ئەحمەد حەسەنی، ئەژین بێلاف سارمەمی) بوو لە22-24/1/2019 بۆ ماوەی سێ رۆژ لە هەولێری پایتەخت نمایش كرا لە 5/2/2019لە شاری دەربەندیخان نمایش كرا ، لە 7/2/2019 لە شاری سلێمانی پایتخەتی رۆشنبیری نمایش كرا (ئافرەت لە دۆزەخ دا) بەرهەمی بەرێوەبەرایەتی هونەری شانۆیی هەولێر بوو .