ئەمە بڵاوبكەوە
FaceBook  Twitter  

کاتێ شەوان دەردەکەوی

تاریکی ڕەنگی دەگۆڕێ

ئەستێرە بەغیڵی دەبا

زەنگوڵ زەنگوڵ لە چاوی

ئەسمانەوە دەڕژێ

دڵیش ترپەی سەما دەکا

باڵی خۆشنودی دەگرێ

بەنێو باغی عەشقت

گوزەر دەکا

تا هەناسەی شەکەت دەبێ

بۆ وچانێ چەشنی هەنگە

تا هەڵالەی ماچێکت هەڵمژێ

لەسەر خۆنچەی لێوەکانت

ئۆقرە دەگرێ

ــــــــــــ

چاوە زار

تاڵێک لە قژی هەور و 

دڵۆپێک لە نیگای ئاسمان

لەسەر گۆنای نێرگزێکی

تازە بەهار 

بۆتیدەکەم بە چاوەزار 

لە گەردەنما دەئاڵێنم

تا لە سەر سینەم ببێ بە قەتار 

بۆنی تۆی پێوە دەکەم

ترسی خۆشەویستیتم لە تۆ هەیە

نەبا کەسێک

لە چاوانما دەرت بێنی و

لەژووری دڵی بتکا بە شاکار 

ئەوە ناشێ 

تۆ هەتوانی منیش دلێکی

بریندار