ئەمە بڵاوبكەوە
FaceBook  Twitter  

هونەری شێوەكاری لەدیدی هونەرمەندان و رۆشنبیرانەوە جوانناسییەكان دەبیننەوە بۆیە لەپیشانگاكانداو لەو شوێنانەی تابلۆیەكی هونەری دەبینرێ‌ سەرنجەكان لەوێدا كۆدەبنەوەو خەیاڵ دەگاتە ترۆپك و شوێن دەست و فڵچەی هونەرمەندەكە دەكەوێ‌، ئێمەش لەوروانگەوە دەڕوانینە ئاوێتەبوونی رەنگەكانی مامۆستا رزگارو ناشێ‌ كەباس لە هونەری شێوەكاری دەكەین ئەو ناوە لەبیر بكرێ‌، لەم دیدارەمان لەگەڵ ئەو بەرێزە وێنەی نوێی شیعری و مانای نوێتری رەنگەكانمان دۆزیەوە، پانتاییەك لە داهێنان پێی گوتین ئێمەش دەتوانین تابلۆی وەك مۆنالیزامان هەبێ‌و تەواوی داهێنانەكان پیشانی ئەوانی دی دەین..

دیمانە: هێرش مەغدید

-لە نێوان قوتابخانە هونەرییەكان، قوتابخانەی تجرید و نزیك لەو قوتابخانە هونەرییەت هەڵبژارد بۆچی؟

+دیارە خۆتان دەزانن ، هونەرمەند پاش ئەوەی كەوا لە كاتی خوێندندا بە دراسەیەكی باشی ئەكادیمی تێرو تەسەل كاری هونەری دەكات، پاشان دوای كاركردنێكی باشی هونەری و بڕینی چەندان رێچكەی هونەری ، ئینجا ئەزموونێكی باش پەیدا دەكات.. ئەوە خۆی لەخۆیدا هونەرمەند پەل دەهاوێت و خۆی دەوڵەمەند دەكات بەبیرو هزرو دۆزینەوەی ستایلی تایبەت بەخۆی.. منیش پاش ئەزموونێكی زۆری هونەری و هەروەها پەیدا كردنی شارەزایەكی تەواو لە كاركردنی هونەری و ئاشنابوون بە كارە هونەریەكانی هونەرمەندانی ناوخۆ و جیهانی، هەروەها هەوڵدان بۆ دۆزینەوەی رێچكەیەكی هونەری تایبەت بەخۆم ، هەروەها خۆشەویستیەكی تەواو بۆ رەنگ و هێڵ ، بەو جۆرە لێرەدا بەو رێچكە هونەریە خۆم دۆزیەوە ، ئەویش رێچكەی هونەری (تەجریدە) یان (تەجرید تەعبیری)..واتە ئێستا كارەكانم بەو شێوەیەن ، پر رەنگن، تەقریبەن تا رادەیەك توانیومە رێچكەیەكی تایبەت بەخۆ م بدۆزمەوە .. یان هەر هیچ نەبێت بینەران بتوانن لەناو كۆمەلێك تابلۆیەك ، تابلۆیەكانی من بناسنەوە..

-هەندێك پێیان وایە هەڵبژاردنی قوتابخانەیەكی تری هونەری لە بەرامبەر قوتابخانە ریالیزمەكان، هەڵاتنە لە واقیع، یان بە دیوێكی تر نەبوونی سەلیقەی هونەرمەندە تۆ چی دەڵێی لەو بارەیەوە؟

+ بەراستی ئەو پرسیارە وایەو واش نیە .. چونكە ئەو هونەرمەندانەی كەوا دیراسەی ئەكادیمیان كردبێت، یان خوێندنی ئەكادیمیان تەواو كردبێت، هەرگیز راناكەن لە كاری ریالزمی ، چونكە ئەوانە چەند ساڵێك دیراسەیان كردوە، ئەزموونیان هەیە، پاش دیراسە كردن و پێشكەوتنێكی زۆر گەیشتوونەتە ئەو قەناعەتە كەوا هونەرمەند هەندێكجار تێر دەبێت لە كاركردنی تاكە ستایلێك كەوا تووشی مەلەل دەبێت لەبەر ئەوە پێویستی بەوە هەیە كەوا پاش ئەزموونێكی زۆری هونەری بتوانێت خۆی لەو جۆرە كاركرنە هونەریە بدۆزێتەوەو پەرەی پێ بدات. هەروەها ئەوە وا لە هونەرمەند دەكات كەوا زیاتر سەلیقەی باشترو جوانتر بێت بەرانبەر بە كارە هونەریەكەی .. پاشان هونەرمەند ئازادە لە چۆنیەتی كاركردنی هونەری بە چ ستایلێك ، واتە بەرەئی من هونەرمەند خۆی لە كوێ دەبینێتەوە بەو جۆرە كاربكات، چونكە لێرەدا دەتوانی ئیبداع بكات و داهێنان درووست بكات..

-دەكرێت باسی شێوازی كاركردنی خۆتمان پێ‌ بڵێیت، بۆ نموونە بە چ رەنگێك كاردەكەیت‌و وە بە قابارەی چەند‌و وە چ كاتێك بۆ تۆ گونجاوە بۆ دروستكردنی تابلۆ؟ 

+ من لە پێشان زیاتر بە رە‌نگی (رۆنی – زەیتی) كارم دەكرد، هەروەها پاستیل و رەنگی ئاویشم بەكار هێناوە، بەڵام ئێستا بە رەنگی (ئەكریلك) كاردەكەم، چونكە ئەكریلیك رەنگەكانی زیاتر جوانتر و گەشترن هەروەها لە رووی خاوێنیەوە زیاتر پاكترن لە رەنگەكانی تر ، چونكە بە ئاو دەگیرێتەوەو هەروەها بۆنی نیە، سیفاتێكی تری هەیە زۆر زوو وشك دەێتەوە.. بە نسبەت قەبارەكانەوە من بە هەموو جۆرە قەبارەیەك كارم كردووە، بەڵام زیاتر حەزم لە قەبارەی (100 x 70)یە ، چونكە ئەو قەبارەیە ، قەبارەیەكی ئێجگار جوانە وە لە جیهاندا بەقەبارەی زێرین ناسراوە.. من هەموو كاتێكم بۆ گونجاوە بۆ درووستكردنی تابلۆ، واتە هەر كاتێك حەزی دروستكردنی تابلۆیەكم هەبێت، هیچ كۆسپێك نایەتە رێم، چونكە من لەهەر كات و ساتێك و لە هەر شوێنێك بێت ئارەزووی كاركردنی هونەریم هەبێت ئەوا دۆخەكە دەگونجێنم بۆ كاری هونەری..

- باسی دوا پێشانگا تایبەتییەكەت بكە، ئایا كەسی وا هەبووە یارمەتیدەربێت بۆ رێكخستن‌و ئەنجامدانی ئەو پێشانگایە؟ تا چەند بە زەڕوڕی دەزانی خەڵكانێك هەبن هەم لە رووی ماددی‌و هەم لە رووی مەعنەوی لە پشت هونەرمەندەكان بن؟ 

+من لە دوا پیشانگای تایبەتی خۆمدا ، واتە دەیەمین پیشانگای تایبەتیمدا ، گۆڕاناكاریەكی تەواوم لە تابلۆیەكانم كردبوو ، چ لەرووی ئسلوبی كاركردنم چ لە رووی قەبارەی تابلۆیەكانم ، تا رادەیەك توانیبووم ئەوەی دەمویست بیكەم.. بەراستی تەسەورم نەدەكرد بەو جۆرە ئەو جەماوەرەی هەبێت ، هەروەها ئێجگار رەخنەگرو هونەردۆست و رۆشنبیران لەپیشانگایەكەم دا ئامادەبوون.. ئەوەش‌ خۆی لەخۆیدا دڵخۆشكەر بوو بۆمن. بەنسبەت پشتگیریو یارمەتی دانی ماددیم ، لەلایەن وەزارەتی رۆشنبیری پشانگایەكەم كردەوە، یارمەتیەكی رەمزیم وەرگرت، بەڵام كولفەی پیشانگایەكم زۆر زیاتر بوو لەو یارمەتیە.. هەروەها سوپاسی كاك كاك كاوە محمود سكرتێری حزبی شوعی كوردستان دەكەم بە خۆی و هاوڕێیانی لە پیشانگایەكە ئامادە بوون هەروەها ئیعلام و راگەیاندنی حزبی شوعی كوردستان زۆر یارمەتیان دام‌و سوپاسگوزاریانم.. هەروەها سوپاسی گشت راگەیاندنەكان دەكەم كەوا ئامادەباشی تەواویان هەبوو یارمەتی زۆریان دام.. من داوا لە گشت لایەنە بەرپرسەكان دەكەم كەوا زۆرترو زیاتر یارمەتی هونەرمەندە شێوەكارە‌كان بدەن، چونكە بەراستی هونەرمەندانی شێوەكار مادی و مەعنەوی زۆر مەغدوورن لە یارمەتیدانیان لە هەموو رویەكەوە فەرامۆش كراون..

 

 

ژیاننامەی هونەرمەند ( رزگار فەقێ عەوڵڵا)

لە ساڵی 1964 لە شاری رواندز لە دایك بووە .. لە خیزانێكی رۆشنبیر و هونەردۆست پەروەردە بووە، بە ئەسل خەڵكی گوندی (فەقیان)ە لە دەوروبەری دەڤەری رواندوزە ، باوكی فەقێ‌ بووە، كەسێكی خوێندەوارو ڕۆشنبیر بووە ، یەكەم كەس بووە لەو دەڤەرە منداڵەكان ناردۆتە قوتابخانە،لەبەر ئەوەی بارودۆخێكی زۆر گونجاویان هەبوو بۆ ئاشنا بوون بە ئەدەبیات و هونەر ، هونەرمەند رزگار فەقێ‌ عەوڵا هەر لە منداڵیەوە خولیایی ئەدەب و هونەر بووە، هەرزوو شارەزایی تەواوی لە هەموو هونەرەكان پەیدا كردوەە ، وێنەكێشێكی باش بوو ، شارەزای لە ئامێری عود هەبوو ، هەروەها خۆشنووسێكی باش بوو، هەموو جۆرە خەتەكانی بەباشی دەنووسی و خەتەكانی دەناسینەوە، زیاتر حەزی لە خەتی (روقعە ) بوو. هەروەها هەر لە خوێندنی سەرەتایی بوو ئەرشیفێكی باشی شاعیرانی كوردی كۆ كردبووە بە ژیان و شعرەوە ، هەندێكیان وێنەیان لەگەڵ بوو، هونەرمەند رزگار فەقێ‌ عەوڵا لە تەمەنێكی زووەوە ئاشنایەتی باشی هەبوو لەگەڵا شاعێرە كوردەكان، هەر لەو تەمەنی 10 ساڵی دابوو (بەنگینەو مەفتی پێنجوینی ) دەناسی زۆربەی شعرەكانی گۆران و پیرەمێردو بێكەسی لەبەربووە. لە ساڵی (1980) چۆتە پەیمانگای هونەرە جوانەكانی سلێمانی، بەشی شێوەكاری، ساڵی (1984-1985) پەیمانگای هونەرە جوانەكانی سلێمانی تەواوكردووە. یەكەم پیشانگای تایبەتی لە ساڵی 1981 لە شاری رواندوز كردۆتەوە. ساڵی 1982 پیشانگای هاوبەشی لە گەڵ هونەرمەند سەلام نەورۆز كردۆتەوە . ساڵی 1992 دووەم پیشانگای تایبەتی لە هەولێر كردۆتەوە. خاوەنی 10 پیشانگای تایبەتە ، بەشداری زیاتر لە (89) پیشانگای هاوبەشی كردووە لە ناوەوەو دەرەوەی ولات (هەولێر- سلێمانی – دهۆك – رواندوز – كۆیی – بەغدا – موصل – بەسرە - ئیران – توركیا – سوریا – بەریتانیا – ئەلمانیا – فەرەنسا – جۆرجیا). دیزاینی زۆربەی گۆڤارو رۆژنامە كوردیەكان كردووە، مۆنیتڤی بۆ زۆربەی شاعیرو چیرۆكنووسە كوردەكان كردووە، چەندان تابلۆی كۆمپیوتەری هەیە ، ساڵانە پیشانگای پۆستەری بۆ یادی كیمیابارانكردنی هەڵەبجەی شەهید كردۆتەوە. بەشداری یادەكانی ئەنفالی كردووە، چەندان بابەتی هونەری لە گۆڤارو رۆژنامە كوردیەكان بلاو كردۆتەوە. چەندان چاوپێكەوتنی هونەری لە میدیا ی كوردیەكان و بیانیەكان كردووە. ساڵانێكی زۆر بەرێوەبەری گۆڤاری (گەپ) ی كاریكاتێری بووە. ئیستا مامۆستایە لە پەیمانگای هونەرە جوانەكانی هەولێر ، بەشی شێوەكاری..