ئەمە بڵاوبكەوە
FaceBook  Twitter  

 

 (ئەو دیوی ئەڤین)

 بەیانیان زوو خەونەكانم لە مردن دەگەڕێنمەوە

ساڵەكان بەبێ پرس بە مندا تێدەپەڕن

شەوەكانیش درێژن وەك چیڕۆكی ناو ڕۆژەكان

تۆش شەوڕاكشانت لێ دزیم و

خەونەكانت پارچە پارچە كردم

لە هەینێوە.. نەمتوانیوە ئازارەكان لە تاریكیدا بشارمەوە

هەندێك شەوان قەرەباڵغیم دەڕژێتە تەنیایی خۆمەوە

كە تۆش بێ مانگم بكەیت وەكوو شەو نەخۆش دەبم، تاریك!

هەندێك عەسرانیش كە خەیاڵی پیاسەكانت دەكەم،

لەناو باغچەكاندا دڵخۆشیم لێدەڕژێت

بەناو بازاڕی شاردا خۆم لە سێبەرێكیش لادەدام و

لەبەر ئەڤینی تۆ، خۆمم خۆشدەوێت

لەبەر ئەڤینی تۆ، گوێیەكانم دەكەمە تۆڕی ڕاوەماسی و

فڕێیان دەدەمە ناو قووڵایی ترپەی دڵتەوە.

 

لەبەر ئەڤینی تۆ،

ئاسمانێكم نەویستووە یەك پەنجەرەی هەبێ و

ماڵێكم نەویستووە تۆ لە ژوورەكاندا تاریكی بە ڕوخسارت ڕاو نەكەیت.

 

لەو دیوی جامخانەكەوە..

دیسان تڕۆمبێلەكان و مرۆڤەكان و چركەكان و هەموو شتێك تێدەپەڕێت

تەنیا تۆ بەم هەموو بیرەوەییەوە لە دڵمدا تێناپەڕی

وەك ڕستەیەكی تێنەپەڕی و

 بەردەوام دەمنووسیتەوە.

 

تاسەی زمانم لەناو پەپڤەكانی ئەو شیعرەدا خەریكە باڵدەگرێ، كۆتریش نییە!

بدوێ! بانگكردنت ناوم دەنووسێتەوە

پێكەنینت لە ڕوخسارمدا بچێنە

قاقاكانت ئاوی ئاوەدانیی دەروونمن

دەنگت لەناو گوێچكەمدا بە پەیڤی ئەڤین ئاو بدە

بەر لەوەی زستان بێت

خەفەت لە خەمساردی دەستەكانت دەخۆم

خەفەت لە ئەستێرەكانیش دەخۆم كە ناڕژێنە ناو لەپتەوە

وەكوو ئاسمانێك ئەوەندە عاشقت بوومە

كۆلارە لە سینگمدا هەڵدەفڕێت.

 

(ئەو دیوی مەرگ)

هێشتا بەیانییە و

كازیوە ئاوی بە دەموچاویدا نەكردووە

شار ئەوەندە هەواڵی ناخۆشی بیستووە

دڵی شەقامەكان ڕەش و پڕ تاسە بوونە

كۆڵانەكان نێوچاوانیان بۆ جەنگێكی دیكە گەرم بووە

هەڵمی تراژیدیایەكی بێمانا لەسەر پێستم هەڵدەستێت

دەترسێم گوللەیەكى نەخۆش،

پیاڵەیەك تاریكیم پێ فڕ بكات

ئەوەتە هەموو شەوێك تەقە لە ڕووناكایی مانگەشەو دەكەن

بینیومە سێبەری ڕەشی ئەو زەمەنەیان بۆ ڕاخستووم

دەیانەوێت لەسەر دەستی ڕاستم بە خواری بمرم

چیرۆكەكان لەسەر زماندا بنێژم

پەیڤەكانی ئەو شیعرەیش قووت بدەمەوە.

 

ئەو شۆستەیەیش كە ساڵەهای ساڵە بۆ پێیەكانم تەنگن

ئەو تراژیدیا بێمانایەش پڕە لە دەنگی پێكەنین

من وەكوو مرۆڤێكی بێماڵ مەترێك زەوی پاك شك نابەم

مردنێكی بێڕەنگی خۆمی تێدا بنێژم

ئەو ڕۆژگارە بەكەڵكی شەوەكانیش نایەت

جیهان وەكو پارچەیەك گۆشتی پڕ كرمی لێهاتووە

پەیڤەكانی ناو ئەو شیعرەيش بزنن!

لە بیرەوەرییمدا دەلەوەڕێن.

 

ئەوەتە شاعیرێك لە بن سێبەری زمانم دانیشتووە

ئەوەتە لە ژێر پێستی مندا، مرۆڤێك برسییە

ئەوەتە نیشتمان تەنیا لە فۆتۆیەكاندا جوانە

نابێت نیشتمان بخرێتە جانتای جعێڵێكی تووڕەوە

نابێت ئەم خاكە بەس لە شیعردا بۆ هەموان بێت

نابێت چیا و گردەكان بخرێتە گیرفانەوە

نابێت بەردەكان دڵی ئاو بشكێنن

مەرگێك لە بۆشایی پەراسووەكانماندا خەوتووە

هەموومان بە یەك زمان قەرزداری مردنین                                       

ببوورن!

ویژدان لە دەرەوەی ئەم پەیڤانەدا جوانترە !

 

 

بە گومان بووم ژیانی خۆم بكوژم و

درۆی ڕەنگاوڕەنگی سەر زەوی بن چیڕۆكە ئاسمانییەكان

دەبێت ئەوكاتە لە ناو ئەو پەیڤانەدا بەڕاستی بمرم!

ئەوەتە هەموو شتێكم ئامادە كردووە

پێڵاوەكانیشم تەنانەت بۆیاغكردوون

دڵم نایەت مەرگ بە دوای خۆم ئەزیەت بدەم

گوللەیەك بە ئاوی چاو لە سینگم دەچەقێنم.

 

 

تارمایییەك نازانم كێیە وەكوو كوژراوێك لە مندا هاوار دەكات

دەنگی لەناو خوێنی ساردم دەیبەستێت

هەوای نوێ لەناو دەستەكانم ون دەبێت

تاریكایی ئەو تارمایییە هەتا سینگم دێت

ڕۆژانە بە دەستێكی سپی وەك شەكری ڕووی ئەڤینداران

وەڵامی سڵاوە ڕەشەكان دەداتەوە.

 

هەر گوتم نایڵێم و نووسیم:

زمان بەدفەڕترین ئەندامی ناو كەللەسەرمە

هەر زمانمە بەڵاكانم بۆ ئەرشیف دەكات

دەیان گۆڕ هەر لەسەر زمان هەڵدەگرم.

 

تازە تەواو،

وەكوو باوكم دونیا لە دڵمدا ناشۆمەوە

ناهێڵم ئەژنۆكانم بە ڕەشەبای جەنگەكان تەڕ ببێت

تازە پێكەنینی سەر شاشەكان لێوەكانم پڕ لە چرۆی خۆشنودی ناكەن

ئێستا كە دەمەوێت ڕوخسارم لە نیگامدا هەڵبفڕێت

دڵۆپە فرمێسكی ئاسودەیی

بەسەر ئاوێنەی تەك دەرگەكەمەوە جێدەمێنێت

تازە تەواو، دەڕۆم و دەڕۆم...

 ڕوخساری ساڵەهای ساڵم بەسەر ئاوێنەكەوە بەجێ دەمێنێت.

 

كە دەنگم لەناو هاواری بریندارەكان خنكا

كە ڕوخسارم بەسەر ئاوێنەكەوە بەجێما

كە كەس نەیزانی مردوومە

بە تەپاشیر لەسەر دیواری ماڵەكەماندا

وێنەی گۆڕێكی ڕاستەقینەم دروستكرد

ناوی خۆم بە پەرۆشییەوە لەسەر كێلەكەدا نووسی.

 

* ئەم شیعرە (تەرمێك لەسەر زمان دەنێژم) لە بیستودووهەمین فێستیڤاڵی نێودەوڵەتیی گەلاوێژدا، خەڵاتی یەكەمی پیبەخشراوە.

لە ئایندەیەكی نزیكدا دیدارێك لەگەڵ غەمگین بۆڵی بڵاودەكەینەوە