ئەمە بڵاوبكەوە
FaceBook  Twitter  

 

ئاراس مام سەعید

 

(جەبار سابیر) ناوێكی دیار لەنێو ئەدەبدا ئەو دەمێك نییە دەنووسێ‌ بەڵام بەرهەمێكی زۆری هەیەو توانیویشیەتی جێگەی خۆی لەنێو دڵی خوێنەران بكاتەوە، چونكە جگە لەوەی وەرگێڕانەكانی بەزمانێكی كوردی پاك و بێگرێ‌ دەنووسێ‌ شاكاری ناوازەشی هەڵبژاردووە، هەروا لەسەر زۆرینەی رۆمانەكانی نووسیوەو ئەركی خوێنەری ئاسانتر كردووە بۆ خوێندنەوەی، لەلایەكی ترەوە خۆشی دەنووسێ‌ لەوێشدا بە ئەزموونێكی دەوڵەمەندا تێپەڕیوەو دەستی خستۆتە سەر زۆر برین كە كێشەی كەلتووری كۆمەڵگای كوردییە، ئەو بەرێزە لە ساڵی 1975 لە دایكبووە. لە ساڵی 1997 وە دەنووسێ‌. كۆمەڵێك بەرهەمی هەیە وەك كتێب كە هەندێكیان نووسینن و زۆربەشیان وەرگێڕانن كە زیاتر چیرۆك و رۆمانن و بە گشتی نزیكەی 50 كتێبێك دەبێ.

جەبار سابیر بەمجۆرە بۆ رێگای كوردستان دوا:

- لە نێو دەقی جواندا هەمیشە ئستاتیكا خۆی نمایش دەكات، كاتێك تەواو دەبی چی لای تۆ جێدەهێڵێ؟

* نووسین هەمیشە چێژبەخشە، لە چركەساتی نووسینی تێكستێكی جوانەوە جا شیعر یا چیرۆك یا هەر جۆرە نووسینێكی دیكە، ئەو چێژە ئامادەیە تا تەواو دەبێت، ئەوسا چێژەكە كامڵ دەبێت و ئیتر دەبێ ئەو چێژە لای خوێنەریش دروست بكات ئەوسا دەبێتە تێكستێكی سەركەوتوو. هەموو ئەو كەسانەی دەنووسن خۆیان بە نووسەری باش و تێكستەكانیان بە سەركەوتوو و چێژبەخش دەزانن، بەڵام ئەمە كاتێك تەواوە و ئەكرێ تێكیستێك سەركەوتووبێ كە خوێنەریش ئەو چێژەی لێببینێ و بە تێكستێكی سەركەوتووی بزانی. من وەك هەم ئەگەر بڕیار شتێكی باشم نووسی بێ ئەوە زۆر خۆشحاڵ دەبم و كاتێكیش خوێنەرێك كارەكانمی پێخۆشە و چێژی لێدەبینێ هەڵبەتە خۆشحاڵ تر دەبم، چونكە كاری نووسین بە نووسەر دەست پێدەكات و بە خوێنەر كۆتایی دێ و ئەوە خوێنەرە مۆری سەركەوتوویی لە كارەكە دەدات.

 - ئەدەب تۆی هەڵبژارد یان تۆ ئەدەبت دۆزییەوە؟

* مرۆڤ لە قۆناغێكدا ئیتر هەست ئەكات بۆچی باشە و ئەكرێ چی بكات. خوێندنەوە لە قۆناغێكی زووی ژیاندا منی راكێشا و هەر لە پێنج و شەشی سەرەتاییەوە من بەرەو دیوانە كلاسیكەكان چووم و ئالوودەی خوێندنەوە بووم. كاتێك خۆم بینییەوە دەمەوێ بنووسم و ئەوەی لام كەڵەكە بووە بیخەمە سەر كاغەز. بۆیە دەكرێ بڵێن هەمیشە ئوە ئەدەبیاتە مرۆڤەكان رادەكێشێ. چونكە لە دنیای ئێمەدا بەتایبەت مرۆڤ ناتوانێ هەر لە سەرەتاوە بڕیار بدات كە دەبێتە نووسەر. نووسەری پرۆسەیەكە خۆ بە خۆ و بە تێپەڕینی كات دروست دەبێ.

 هەمیشە ئەوانەی دەیخوێنییەوە كاریگەریت لا جێدەهێڵێ و بێدەنگ نابی، ئەوە جوانی بابەتەكەیە یان نانی خۆتە هەڵیدەڕێژی

* هەموو نووسەرێك سەرەتا خوێنەرە، پاش ساڵانێك دەبینێ ئەتوانێ ئەویش هەست و نەستی خۆی دەربڕێ و ئیتر كەمكەم دەنووسێ و دواجار رۆژێك پەی دەبات كە ئەتوانێ ئەویش وەك هەموو ئەو نووسەرانە گوزارشت لە خۆی و دنیاكەی بكات و ئەوە بڵێ كە لە ناخیدایە و هێندە نابات ئەویش دەتوانێ كاریگەری لەسەر خوێنەر دروست بكات و ببێتە یەكێك لەوانەی كە رۆژگارێك كارەكانیانی خوێندۆتەوە.

 

 - لەئەفسوونی گێڕانەوەدا زۆر رۆمانی جیهانیت شیكردۆتەوە، ئەوە پێمان دەڵێ دواجار لە رۆماندا گیرسایتەوە، راستە؟ باشە خۆ هەموان بە نێو شیعردا رەتبوون، دواتر ژانرەكانی دیكە، ئەدی بۆ شیعر چیت هەیە؟

* من تا ئێستا رۆمانم نەنووسیوە، بەڵام باوەڕم بەوە هەیە نووسەر كاری ئەوەیە گوزارشت لە خۆی و لە دنیا بكات، لێرە شەوە هەرچییەك بنووسێ گرنگ نییە، گرنگ ئەوەیە چی دەنووسێ و چۆن دەنووسێ. دواجار هەموو نووسینێك هەوڵێكە بۆ ئاشكراكردنی جوان و خزمەت كردن بە دنیا مرۆڤ و جوانكردنی ئەو دنیایە. نووسین ناڕەزایەتییە دژی ئەم دنیایە ئێمەی تێداین و هەموو كەسێك كە دەبێتە نووسەر لە هەوڵی ئەوە دایە قسەیەك لەسەر ئەم دنیایە بكات و بەرەو خۆشتر و جوانكردنی بەرێ. كاتێكیش رۆمانێك جوان دەخوێنمەوە پێم خۆشە خوێنەری دیكەیش بیخوێننەوە و بۆیە كەمێك قسەی لەسەر دەكەم و بە خوێنەری دەناسێنم. ئەمەیش كارێكە لە دنیادا دەكرێ و دواجار دەبێتە ریكلامێك بۆ رۆمانەكەیش.