ئەمە بڵاوبكەوە
FaceBook  Twitter  

و/ عەبدولكەریم شوانی

ئیستا نۆرەی تۆیە، 

باڵفڕێتە بەدەوری دەفتەرەكانما

وەك پەروانەی دەوری چرا

یان وەك بزمارێكی سەرگەردانی دەوری خاچ

لەوانەیە كاتەكانی

خواردن و خواردنەوەو دەرمانەكانم لەبیر بكەم

تەنانەت

نوێژو دوعاش،

بەڵام،

رێساكانی خواست و ئەلف و بای حەنینی تۆو

ئەوی بەتۆوە پەیوەستە هەرگیز لەبیر ناكەم

*** 

رەنگی سەرینەكەی لەسەری ئەخەوی چۆنە؟

ئایە ( لینا) ئەركەكەی لەسەر مێزەكە ئەنوسێتەوە؟

یا لەسەر زەوی یا لەسەر ئەژنۆكانی وەك باپیری؟

(هادی) بەچی گەمە ئەكات؟

كاتێك كە بەخەبەرەو روخۆشە

كەروێشك، پشیلە، ورچ، چۆلەكە؟

ئەوانە بەراستی گەمەی منداڵانن؟

بەڵام ئێمە زۆر پێش ئێوەین لەم بوارەدا

سادەترین گەمە لەسەر خاكی نیشتمان

نیشتمان خۆیەتی،

مێژوەكەی و ئاییندەی و چارەنوسی خەڵكەكەیەتی.

*** 

ئاخرییەكەی هەواڵی ئەحواڵم ئەپرسی

رۆژگار چۆن بەڕێ‌ ئەكەم ؟

نازانم كیژەكەم نازانم 

پێیەكانم بون بەبەشێك لە زەوی

بەلەكۆنەكەم بەشێكە لە ئاسمان

ئەوی نوسیومە وان لەبیری خەڵكیدا

ئاوها بەسەر مردندا سەركەوتم

ئەوی هەمیشە هۆشیارت ئەكردمەوە لێی

بێ‌ ئەوەی هیچ كوێیەكم بڕوشێ‌

یان نینۆك بڕەكەم بزر كەم

هەر بەم بۆنەیەوە: ئاو و هەوا لای ئێوە چۆنە ؟

ئەڵێن سەرمای زوقمە بەرگەی ناگیرێ‌

ئای خۆشەویستانم

كاشكێ‌ خۆر بومایە بەسەرتانەوە

یان گڕكانێكی بێ‌ زیان لەنێوان لێفەو قاچ و قولتانا.