ئەمە بڵاوبكەوە
FaceBook  Twitter  

 

نەمدەزانی وا پیر دەبم

بەناو لیتەی تەمەنێکی

ئاوا لیخندا گیر دەبم

٭٭٭

نەمدەزانی پەنگری کوانووی ئەوینم

خۆڵەمێشی دامرانەوەی لێ دەنیشێ

نەمامی شلکی ئارەزوم

کوندە پەپووی نائومێدی

بەسەرەوە هەڵدەنیشێ

٭٭٭

نەمدەزانی دیاریی خەزانی ئەوینم

گەڵای وەریوی حەسرەت و

دڵۆپە فرمێسکی غەمە

دوندی دەماوەندی هیوام

لووزەوی باران و تەمە

٭٭٭

نەمدەزانی شەوی یەڵدا

لەدواوەیە و هێندە تووشە

تروسکایی تێدا نیە و

شەوی کوند و بایەقووشە

٭٭٭

نەمدەزانی چرکە ساتی سەردەمی گەڵا وەرینە

وەیشوومە و تۆفە و زریانی

دوا ڕۆژانی پێکەنینە

٭٭٭

نەمدەزانی تەمەن هێندە ....

بێ بەزەیی و نا هەمووارە

هێندە بەلەز

هەنگاو بەرە و زۆزانی

دوا قۆناغ و دوا هەوارە

٭٭٭

وامدەزانی ژیان هەمووی لاوێێتییە

پێکەنین و زەردەخەنە و

خۆبادان و پیاوەتییە

‌ ٭٭٭

وامدەزانی بەیانیان کاتێ خۆر هەڵدێ

تەنیا بۆ من دەخنێتەوە

لەبەر بەژن و باڵای منە

ئاوا شەنگوڵ دەشنێتەوە

٭٭٭

وامدەزانی هەر چوار وەرز

بوونەتە وەرزێک بەهاری

ئاسمانی شین خۆری قەت لێ ئاوا نابێ

لەبەر ئەوین و دڵداری

٭٭٭

وامدەزانی ئەوانەی بە گۆچان دەڕۆن

هەر بۆ جوانی و بۆ ویقاڕە

دەست لە خۆشی ژیان دەشۆن

٭٭٭

وامدەزانی ژیان تاسەر

هەروا گەش و بەردەوامە

نەک وەک ئێستا دەست و پەنجەی

لەرزۆکم بۆ تەنیا شیعرێک ناگرێ خامە

٭٭٭

بەخێرچی ڕۆژانی جوانی و

خورپەی دڵی بێ وچانم

بەخێر بێیی وەرز و سەردەمی

لەرزۆکی دەست و گۆچانم

 

‌ 17/5/2019 هەولێر