ئەمە بڵاوبكەوە
FaceBook  Twitter  

دیمانە: هێرش مەغدید

هەمیشەو لە هەموو سەردەمەكاندا هونەری شێوەكاری گرنگی خۆی هەبووە، مرۆڤە كۆنەكان لەسەر دیواری ئەشكەوتەكان و دواتر بە چەندین قۆناغی جیاجیادا تێپەڕیوە تا گەیشتۆتە ئەمڕۆ، ئێستا ئەم هونەرە لەگەڵ پێشكەوتنەكانی تەكنەلۆژی لەبرەو دایە بەڵام فڵچەی دەستی هونەرمەندەكان هەروەك خۆیەتی و تابلۆكانیان تام و چێژی خۆی دەدا، (رێگای كوردستان) ئەمجارەیان خاتوونێكی بەسەلیقەی دواند، ئەویش(سۆنیا رزگار فەقێ‌ عەوڵا)یە، ئەم خاتوونە جگە لەوەی باوكی هونەرمەندە خۆشی هەمان رێچكەی گرتووە.

-بۆچی بەشی شێوەكاری‌و دواتریش لقی وێنەكێشانت هەڵبژارد؟ 

+لەبەر ئەوەی خولیای منداڵیم بوو وە ئەو بەهرەی كە خودا پێمی بەخشیوبوو هونەرێكی چێژبەخشەو وە بۆیە بە ڕای باوكیشم هەر ئەومان هەڵبژارد.. چونكە بۆ زیاتر چونە ناو هونەرەكەو زیاتر ئاشنای هونەری شێوەكاری ببم وە لێرەوە ڕێزوو سڵاوم بۆ مامۆستای ئازیزم (م.خومار ڕەشید) هەیە كەوا زۆر سوودم لـێ‌ وەرگرتووە ..هەروەها مامۆستا خومار هانی دام لقی وێنە كێشان هەڵبژێرم و هەموو كارەكانم ئاماژەیان بۆ ئەم لقە دەداو وە قۆناغی ئەمساڵیش كە قۆناغی سێیەم بووم توانیم بە نمرەیەكی زۆر باش لەو بەشە دەربچم.

-لە داهاتوو خۆت وەك هونەرمەندێك دەبینی یاخود تەنها وەك مامۆستایەكی هونەری لە قوتابخانەكان؟ 

+بە دڵنیایەوە وەك هونەرمەندێك لەبەر ئەوەی ئامانجی من بوون بە هونەرمەندێكی لێهتوو و ناودارە.زۆر حەز دەكەم كەوا بتوانم لە رێی هونەرەكەمەوە خزمەتی میلەتەكەم بكەم .

-دوای تەواوبوونی پەیمانگای هونەرە جوانەكان، بەشێكی زۆری قوتابیان بەتایبەتیش كچان لە بواری هونەریدا دوور دەكەونەوە، ئەی تۆ چی دەڵێی لەم بارەیەوە؟

+بەڵێ زۆرینەی ئەوقوتابیانەی لە دوای دەرچوون و بەدەستهێنانی بڕوانامەكەیان لەبەر هەر هۆیەك بێت واز لەكاری هونەری دەهێنن .. دیارە واز لەهونەر هێنانیان پێ‌ باشترە نەك بە دوای هونەر و خوێندنی پێنج ساڵەیان بكەون و هەر كچانیش تووشی ئەم حاڵەتە نابنەوە بەڵكو كوڕەكانیش هەمان كێشەیان هەیە.. ئەوان وا تێگەیشتوون كە بڕوانامەكەیان هەبوو ئەوەندەیان بەسە .

-وەك ئاگادارین لە پاركی شانەدەر خەریكی وێنەكردنی راستەوخۆی ئەو كەسانەی كە نیازیانە وێنەكانی خۆیان لە رێگەی دەستڕەنگینی تۆوە گەورەبكەن، ئایا ئەو كارە بۆ پەیداكردنی بژێوی ژیانە، یاخود چێژی هونەری‌و شكاندنی رێچكەیەكی تری ژیانە؟

+بەڵـێ‌ وایە ماوەیەكە لە گەلەری شانەدەر وێنەی ڕاستەوخۆ دەكێشم و وە ئامانجی من لەم كارە تەنیا بۆ بژێوی ژیان نیە زیاتر چونە نێو دونیای هونەرە و وە زیاتر ئاشناكردنی هونەری شێوەكاری بە خەڵكەكەمان و و گەلانی دیكە كە ڕوو لەم شوێنە دەكەن..

(سۆنیا ڕزگار فەقێ عەوڵا، تەمەن 18 ساڵە و كچی هونەرمەندی شێوەكار مامۆستا (رزگار فەقێ‌ عەولا)یە، كچی ناو بنەماڵەیەكی هونەری وقوتابی پۆلی چوارەمی پەیمانگای هونەرە جوانەكانی هەولێر.. بەشی شێوەكاری لقی وێنەكیشانە . لەسەرەتای رێگەكە دایەو بەلام توانایەكی هونەری بێوێنەی هەیە.)