ئەمە بڵاوبكەوە
FaceBook  Twitter  

من کۆڵبەرێکی کوردم

لۆفەکانی ڕێگەی سەخت 

هەڵدەوێزنم

تەقە لەتارماییم دەکەن

ڕۆژێک سێبەرم دەکوژرێ

ڕۆژێک خۆم

ڕۆژێک

سەرکەوتنم خوێنی لەبەر دەڕوا

.............

لەکەمیندا

وادەزانن هەموو ئێرانم

لەکۆڵناوە

ئاگر بارانم دەکەن

وادەزانن خودا لەشەڵتەکەی مندا

گەڕانەوەم بەگوللە دادەبێژن

ئێرانی چی و خودای چی

خۆمن

تەنها نانی شەوێک

هەڵیگرتووم

منداڵەکانیشم

لەسەرتاتەشۆری مزگەوت

تنۆک تنۆک فرمێسک دەخۆنەوە!

...............

کۆڵبەرێکم

دینم دینی

دارو درەختی دەورو بەرە

بەفاتیحەو قولهو وەڵڵا

کورسیم

ئایەتەل کورسیە

پشووم ناوی موحەممەدە

هەستانەوەشم 

هاواری عەرشی عەزیمە

هەنگاو دەنێم

پیتەکانی قوڕئان دەجووم

خودا بەگەورەیی خۆی

لەباوەشمدایە

توند بەخۆمەوە گوشیوە

کاتیک

لەچوار لاوە

لێم ڕادەکێشن

تەنیام

تەنها خومم!

.............

کۆڵبەرێکی کوردم

بەچەکی ئایندارەکانی

وڵاتی خۆم

کۆتایی بەژیانم هاتوووە

نانی شەوێک هەڵیگرتووم

جەنازەکەم بدەنەوە بەخۆم

هیچ کەسم نیە

خۆم خۆم دەنێژم

گوێ لەتەڵقینی ئێوە ناگرم

مادام لەنەوەی ئاگرم!