ئەمە بڵاوبكەوە
FaceBook  Twitter  

 

پەرلەمانێ‌ مشكان نە چیرۆكەكە بۆ زارۆكان هاتبیتە نڤیسین و نە ژی ژوان چیرۆكانە، ئەڤێن چیرۆك نڤیس ژ دورهێلی درەڤن و نەشێن راستەوخو كارێكتەرێن خوە ب مرۆڤان ب شوبهینن.. راشكاوانەتر بێژم، پەرلەمانێ‌ مشكان دەركەفتنەكا دییە ژ تێكستی و ئەڤە ئێكم جار ژی نینە وەك چیرۆك نڤیس، من تێكست بجهـ هێلابیت و ئەگەر راستگوتر ژی بێژم، من مشكینی پێخوشترە، ژ ئەوا نوكە ئەز تێدا مرۆڤ!

سەرسورمان نەمینە خواندەڤایێ‌ هێژا، ژبەركو ئەزێ‌ چیرۆك نڤیس بخوە ژی ئێك ژوان كەسان بووم، یێن من قەستا سندوقێن دەنگدانێ‌ كری و من دەنگێ‌ خوە دایە دەركەفتنا مشكەكی و سەدا سەد ژی من دزانی، مشك بتنێ‌ یێن بەروكێن خوە نە و هەر تشتێ‌ ئەو بچنە دناڤدا، ئەو تشت ژ خێرێ‌ دكەڤیت و ئەگەر تو هەڤتەمەنێ‌ من ژی بی، دێ‌ بیرا تە ل شەرێ‌ گێسكی و ستێركی هێت، چەند جارەكێ‌ ژنكان قیژی ڤەدابانە و گوتبانە ئەڤە مشكە! مە هندی ئێك د مالێڤە هەی، ئەم لدوور دەرئێخستنا وی مشكی دئێك دەنگ بووین، ئەڤە دیتنا من بوو، ژ بۆ (مەحشەرێ‌) مشكان، دەما داخواز ژ من هاتیە كرن، كو ئەز ژی بدەنگێ‌ خوە، بەشداریێ‌ د پروسێسا هەلبژارتنا پەرلەمانێ‌ مشكاندا بكەم و من مافێ‌ دەنگدانێ‌ ژی هەبیت.

كاندیدكرنا بەربژێران ل سەر بنەمایێ‌ سەنگا عەشیرێ‌ و پلا وی د پارتێدا و (واستە و واستەكاریێ‌) نەبوو، ببورن ئەگەر شروڤەكرنەكا زێدەتر بدەمە سەر شێوازێ‌ دەست نیشانكرنا كاندیدان.. ل بەراهیێ‌، مشكێن گەور هەبوون و مشكێن گوهـبەل و مشكێن رەنگ خولیكی، هەلسەنگاندنا هەر جورەكی ژی رێكارێن خوە هەبوون، ئەڤ رێكارێن هەنێ‌ ژی دبن چەندین فلتەران را دەرباز دبوون، بۆ نمونە، مشكێن گوهـبەل، سالوخەتێن وان چاڤێن وان د بلوق و دفنێن وان درێژ و كوریا وان یا كورت بوو، ئەزموونەكا درێژ دگەل لێنانگەهێ‌ هەیە و ئەوان كێمترین قوربانی د دەستێن كابانیێن مالێدا هەنە و ب دروستكرنا كونێن رەڤێ‌ و خوە تێدا ڤەشارتنێ‌، د پێگوتینە.. مشكێن مەزن و گەور، سالوخەتێن وان ژی د قوت و قەلەون و ب ژیری و پلاندانانێن خوە، هەر جهێ‌ د لێنانگەهێڤە وان بڤێت ئەو قەست دكەنێ‌ و ئەو تشتێ‌ وان دڤێت، دزانن ل كیرێ‌ دێ‌ بدەست كەڤیت.. مشكێن خولیكی، سالوخەتێن وان ژی د كوری درێژ و ناڤ تەنگ زراڤ و سڤیلانكن، هەر جهێ‌ وان بڤێت دگەهنێ‌ و بۆ رەڤێ‌ ل سەرێ‌ رێزێنە و ئەگەر پێدڤی بكەت، ب دیواران ژیڤە هەلدچن.. نە بتنێ‌ ئەڤ فلتەرە هەبوون، فلتەرێن مەهـ و سالان و ئەڤە ژی ب وەرزێن سالێڤە گرێدایی بوون و ئەو دەمێ‌ هەلبژارتن تێدا دهێنە كرنێ‌، فلتەرێن ناوچەیی و مەرجێن دەست نیشانكرنا كاندیدەكی ل گوندان جوداهیا خوە دگەل دەست نیشانكرنا كاندیدەكێ‌ دی ل باژێری هەیە و دەست نیشانكرنا كاندیدەكێ‌ دناڤ خانیێ‌ هەژارەكیدا دژیت، جوداهیا خوە هەیە دگەل دەست نیشانكرنا كاندیدەكێ‌ دی د خانیێ‌ زەنگینەكیڤە بژیت. 

دا كو گەلەك ل سەر دەست نیشانكرنا كاندیدی نە راوەستم، دێ‌ زڤرمە سەر ژمارا كورسیێن پەرلەمانی و جوداهیا دناڤبەرا مشكان و مرۆڤاندا، ئەو هەڤركیا دناڤبەرا پارتێن مە یێن سیاسیدا هەین، سالوخەتێن هەر پارتەكێ‌َ و ئامانجا هەر پارتەكێ‌، ئەگەر پرانیا دەنگان بدەستڤە ئینان و دێ‌ شێت چ خزمەتێ‌ كەت، هەمان ئامانج و هەڤركی دناڤبەرا مشكان ژیدا هەیە و كێبركیێ‌ ل سەر دەستهەلاتێ‌ دكەن و ئەو ژی ل سەر ڤی بنەمایی كاندیدێن خوە دەست نیشان دكەن.. لێ‌ تشتێ‌ من حساب بۆ نەكرین، دڤێ‌ بگرە و بكێشا بەربژێراندا و كی ژوان بهێتە كاندیدكرن و كی بهێتە دوور خستن، كی دێ‌ شێت زێدەتر دەنگان خرڤەكەت و كی دێ‌ دەنگێ‌ خوە دەت و كی دەنگی نادەت، كی نیاسێ‌ كێیە و كی دێ‌ پارەی زێدەتر دەت، كی دێ‌ زێدەتر ریكلاما خوە كەت و وێنێن كێ‌ دێ‌ مەزنتر بن و كی دێ‌ زێدەتر سەرەدانان كەت، هەمیان دڤیان برییا دەنگدانا من، ئاشتیەكێ‌ دناڤبەرا مەحشەرێ‌ مرۆڤ و مشكاندا دروست بكەن، ل سەر حسابا منێ‌ مرۆڤ، بۆ خوە كونجەكێ‌، ئێكسەر بۆ ناڤ لێنانگەها مالێ‌ پەیدا بكەن و ب ئازادانە، هەر گاڤا ڤیا بچنە د سەتلا برنجی و تیركێ‌ شەكرێدا وووووو.. 

دەما هەلبژارتن بدوماهی هاتین و باشترین مشكێن سەربور د هەڤركیا دگەل مرۆڤاندا هەی و دێ‌ چاوان شێن خوە ژ دربێن وان پارێزن، پرانیا دەنگان بدەست خو ڤە ئیناین.. هینگێ‌ شنوی من زانی، جوداهیا دناڤبەرا دەنگدانا مرۆڤ و مشكاندا چی یە و ئەو لدویڤ سەربورێن ویێن لێنانگەهێ‌، بۆ تبلا خوە دحبری دهەلینن و دەنگێ‌ خوە ددەن، ئەمێن مرۆڤ لدویڤ بەرژەوەندا پارتا خوە، تبلا خوە د حبری دهەلینن و دەنگێ‌ خوە ددەین و ئەم قازین.