ئەمە بڵاوبكەوە
FaceBook  Twitter  

 

سەنتەری ڕۆشنبیری زوهدی دادودی بۆ؟

لە ڕۆژگاری ئەمڕۆماندا بوونی ناوەندە ڕۆشنبیرییەكان لەكۆمەڵگادا، یەكێكە لەپێداویستییە گرنگەكان و وەك زەرورەتێكی ئانییە بۆ هەمووان. لەپاڵ ناوەندە ڕۆشنبیری و مەعریفییە فەرمییەكانی وڵاتدا، بەشێكە لەپڕۆسەی بنیاتنانی سەرخانی فیكری و هەندێك جاریش وەك وێستگەیەكی یەكلاكەرەوە و سەرچاوەی ڕۆشنایی كۆمەڵ دەبیندرێت، بەتایبەت كە جیهان بەگشتی و ناوچەكەی ئێمە بەتایبەت لەبەردەم دابڕانێكی گەورەدا دەژیین لەكایە ڕۆشنبیرییەكان. تەكنەلۆژیا و تۆڕی جاڵجاڵۆكەیی لەلایەك و دۆخی گشتی و ئابووری لەلایەكی تر، جێ پەنجەی خۆیان دیاریكردووە. لەم چوارچێوەیەدا و لەبەر ڕۆشنایی ئەوەی سەرەوە، ئێمە بۆچی بیرمان لەدامەزراندنی سەنتەری ڕۆشنبیری زوهدی داودی كردەوە؟

ڕوونە بۆ هەمووان عێراق و كوردستان و كەركووك، بە بارودۆخێكی سیاسی و كۆمەڵایەتی و ئابووری هەتا بڵێی هەستیار و تایبەتدا تێدەپەڕێت و ڕۆژ بەڕۆژ بۆشایی نێوان خەڵك و كایە فیكری و ڕۆشنبیرییەكان، گەورەتر دەبێت. لەكاتێكدا بەدرێژایی مێژوو، كەركووك دەیان و بگرە سەدان گەورە ئەدیب و نووسەر و ڕۆشنبیری هەبووە و هەمیشە گرووپ و دەستەی ڕۆشنبیری تێدابووە، بەجۆرێك كە هەریەك لەوان خاوەن پێگە و ڕێچكەی تایبەت بوون، لەسەرجەم بوارە جیاوازەكاندا. یەكێك لەو گرووپانە گرووپی ئەدەبی كەركووكە، كە بووەتە یەكێك لە لاپەڕە گەشەكانی مێژووی كەركووك و د. زوهدی داودی یەكێكە لەناوە دیارەكانی ئەو گرووپە و دنیای ڕۆمان و چیرۆكنووسیی عێڕاق و جیهانی عەرەبی بەگشتی. زوهدی داودی جگە لەوەی نووسەرێكی گەورە و خاوەن قەڵەمێكی بەبڕشت بووە، خاوەن دەیان كتێبی دانسقەیە. وەك كەسایەتییش، هەر لەسەرەتایی لاوییەوە تێكەڵ بەكاری سیاسیی بووە، مرۆڤێكی ماركسی و چەپێكی نوێخواز بووە. ئەندامێكی پابەندی حزبی شیوعی عێراق و پێشمەرگەیەكی ئازا و پاڵەوانێكی گەورەی زیندانەكانی ڕژێمە یەك لەدوا یەكەكانی عێڕاق بووە.

سەنتەری ڕۆشنبیری زوهدی داودی، لەڕوانگەی هەست كردن بەزەورەتی وەها سەنتەرێك بۆ كەركووك هاتووەتە ئاراوە. سەنتەرێك بەو هیوایەی لەتەواوی بوارە ڕۆشنبیرییەكاندا بتوانێت كاری جدی بكات. سەنتەرێك، كە بتوانێت ئاوێنەی جیاوازییەكانی كەركووك بێت بێ جیاوازی ئاینی و نەتەوەیی و مەزهەبی كار بكات. بەجۆرێك تەواوی چین و توێژەكان بە بەشێك لەخۆیانی بزانن و بەپێچەوانەشەوە ئێرە دەبێتە ماڵێك بۆ تەواوی نووسەران و هونەرمەندان و خوێنەران، ئەم كارە بەرپرسیارێتییەكی هاوبەشە بۆ هەمووان، هیوادارین بە هەمووان بتوانین خزمەت بەدۆخی ڕۆشنبیری كەركووك بكەین.