ئەمە بڵاوبكەوە
FaceBook  Twitter  

 د ناڤا گەلەک جڤاکان دە، هن تاک دهێنە پێش، زوى دبنە خوەدى هەبوون دناڤا کومەلگەهێ دە، ئێدى ئەڤ کەسە مینا سەبولێن هەرى بالکێش دناڤا جڤاکێ دە دهێنە پەژراندن، دلزارێ هەلبەستڤان مینا ئێک ژ ڤان کەسایەتیێن کاریگەرە، کو د بیاڤێن جودا جودا دە، کارى یە خزمەتەک مەزن پێشکێشى مرۆڤایەتیێ بکەت، چونکە د بەرهەمێن وى دە زێدە مرۆڤبوون یا سەرکێشە، نرخێن مرۆڤایەتیێ د کەدا وى دە گەلەک و گەلەک یێن بلندن، لەوما ژى حەژێکرن ژبوى تێکوشانا وى سنوران ناسناکەت، هەر تاکەک ژ کیژان (نەتەوە، مەزهەب، ئول، ئایدیولوژى) بیت، ب رێزەک مەزن خەبات و کارێن وى یێن (وێژەیى، سیاسى، هزرى، مرۆڤى) ب میناکەکا هەرى ب باندور د حەسبینیت.

ئەگەر مرۆڤ هن لاپەرێن مێژۆیا وى مێزەکەت، دێ گەلەک راستى ژبوى مرۆڤى روهن و خوەیا بن، دلزارێ هەلبەستڤان د کوکا خوە دە ژ نەتەوا کوردە، زێدەتر ژ هەر کەسى حەز ل کوردستانێ کریە، ئازادى یا گەلێ کورد و کوردستانێ ئێک ژ مژارێن پیرۆز بوویە لجەم وى، د هەر وارى دە وى ژبوونا ئاخا خوە تێکوشان کریە و قوربانى داینە، هەر کەسێ وى ناسدکە ئەڤێ راستیێ باش دزانە، ئەو ب هەموو واتەیەکێ کەسەکێ مرۆڤ دووست بوویە، دەما خەلکێن بیانى پەسنا وى کەن، وەکە سەمبولەکا مرۆڤایەتیێ د دەنە ناسکرن، گەرەکە ئەڤ چەندە دەهان جاران پتر د وارگەهێ وى دە بهێتە دوپاتکرن ..!

ئێک ژ ساخلەتێن هەرى بنەجه لجەم هەلبەسڤانێ هێژا (دلزارى) چ جاران کەسەکێ رەشبین نە بوویە هەر تم یێ گەشبین بوویە ژبوى هەبوونا پاشەرۆژەکا هەرى گەش، دۆزا گەلێ وى و دۆزا مرۆڤایەتیێ ئێک ژ درویشمێن هەمیشەیى یێن تێکوشانا وى یا سیاسى و کومەلایەتى بوویە، ئەوى لسەر ئەڤان سوزان د ئەوان پەرێن گەرمبوونێ دە کاروانێ ژیانا خوە دایە مەشاندن، سەرەراى هەبوونا هەژمارەک زور یا ئاستەنگ و گرفتان وى ژیان نە راوەستاندى یە، ئێش و ئازارێن زیندانێن زورداران دەرباسکرینە، هەر و هەر میناکا مرۆڤەکێ خوەدى ئیرادە و بەرخوەدێر وى سەرەدەرى دگەل زەحمەتیێن ژیانێ کریە.

هەلبەستڤان خوەدیێ گەلەک بەرهەمایە، تنێ ناڤ و نیشانێن دوو بەرهەمێن وى دخوازم بکەمە نمونە، ئەو ژى پەرتۆکا (ئاشتى و ئازادى) هەر وەسا پەرتۆکا (تێکوشان و ژیان) ێ یە، ئەڤ ناڤ و نیشانە گەلەک یێن بالکێش و واتەدارن، رەنگە د ناڤەرۆکا خوە داژى دەربرێ ژ ئارمانج و خواستیکێن وى یێن سیاسى و کومەلایەتى بکەن، د ئەڤان پەیڤان دە گەلەک تشت دهێنە دیتن ئەو ژى ئەون، کو ئازادى پڕسەکا گرنگە لهەمان دەم داژى ئاشتى ژى پڕسەکا زێدە گرنگە، واتە د چ سەردەمان دە ئالیگرێ شدەتێ نەبوویە، کەس و ئالیێن دناڤبەرا وان و توندوتیژیێ دە ڤالاهیەک مەزن هەى، ئەو زێدە یێن نێزى مرۆڤبوونێ نە،  تێکوشان و ژیان ژى پرسێن سەرەکى یێن کەسایەتیا وانن. 

  دەمێ دلزارێ هەلبەستڤان د داویێن سالێن پێنجییان بوویە ئەندامێ ئێکەتیا ئەدیب و نڤیسکارێن عیراقى و پاشان ژى ئەندامێ ئێکەتیا نڤیسکارێن کورد، وى چاخى هەبوونا شیانێن لڤى ئاستى دەستکەفتێن هەرى مەزن بوونە ژبووى دوزا رەوایا گەلێ مە، د رێکا پەیوەندى یێن وى یێن بەرفرەه دا دگەل نەتەوێن دن، شیا ب پێنوسێ خوە راستى یا گەلێ خوە ژ هەر کەسى رە بدەتە ناسکرن و بالا وان بو ئالیێ رەواتیا وى راکێشیت، مەبەست د ڤێرە دا ئەوە د هێلا دبلوماسیا خوە یا کەسى دە، دەستکەفتێن کاریگەر ژبوى پرسگرێکا گەلێ مە بدەست خستنە، ماندیبوونا وى د هەر وارى دە یا بەرهەمدار بوویە.

لداویێ دبێژم گەلێ مە ب کەدا ئەڤان تێکوشەرا پڕ سەربلندە، ئەو د وژدانا هەموو وەلاتپارێزەکێ دە خوەدى هەبوونن، ئەوى کارەکێ وەسا یێ پێشکێشى گەلێ خوە کرى چ جاران ناهێتە ژبیرکرن، کاربدەستێن گەلێ مە گەرەکە لئاستێن رێزگرتنا تێکوشانا ئەڤان قەهرەمان بن، چاوان ئەو شەیدایێن ئەڤێ ئاخێ .. ئەڤێ پڕسێ .. ئەڤێ دزێ، ئانکو دۆزا رەوایا نیشتیمانى و نەتەوى یا گەلێ کوردستانێ بوویە، مل ب ملێ ئەوێ چەندێ د بیاڤێن تێکوشانا (چینایەتى، مرۆڤى) دە ژى کەمترخەمى نەکریە، ئێدى ئەو رۆژە دەسهەلات خوە ل کەدا وى بکەتە خوەدى، ب رێکێن جودا جودا وى ژ تەخ و توێزێن جڤاکى ڕە بدەتە ناسکرن و نرخێن تێکوشانا وى ب رێزۆ تەقدیرڤە بهێنە بیرئانین.

 

ئەدەب وهونەر