ئەمە بڵاوبكەوە
FaceBook  Twitter  

  خوێندنەوەی یەكەم ڕۆمانی فەرهاد پیڕباڵ و شتی تریش...

ئەحمەد كامەران

بەرواری 26|2|2020 بوو كەهاوكات كۆتا ڕۆژی دەوامی كۆلێژم بوو ئەمەش بەهۆی بڵاوبوونەوەی ڤایرۆسی كۆرۆنا بۆیە هەفتەیەك زووتر بڕیاری پشوویان دا,بۆیە منیش بڕیارم دا كە ئەم یەك مانگەی پشوو لە ماڵەوەم بۆ خۆم بەهەلێكی گرنگ بیقۆسمەوە كە بەشتی بەسوود و گرنگ بەڕێی بكەم چوونكە لە بنەڕەتدا قوتابیانی زانكۆ لە كاتی پشووەكاندا دەبێت بەشێكی كاتەكانیان بۆ خۆیان بەشتی بەسوود و گرنگ بەسەر ببەن بەتایبەتیش كاتێك تەرخان بكرێت بۆ خوێندنەوەی كتێب, نەك زۆربەی كاتەكان خۆت بەشتی بێ كەڵك زیانبەخش بەسەر ببەیت, هەربۆیە بڕیارم دا لە كۆلێژەوە بكەومە ڕێ بۆ بازاڕ بۆ كڕینی كتێب لە خانەی ئاشتی , وە بڕیارم دا ڕۆمانێكی فەرهاد پیڕباڵ بكڕم ئەویش بەناوی (مولازم تەحسین و شتی تر...) كە چاپی سێیەم بوو بەڵام ساڵەكەی ڕوون نەبوو بەس ئەوەی من بزانم لە 2001 چاپ كرابوو , ئیتر بەهەر حاڵ ئەوە بۆ من بووە یەكەم ڕۆمانی فەرهاد پیڕباڵ كە بیكڕم , بەڵام لە پێشتردا لە ساڵی 2019 لە پێشانگای نێودەوڵەتی كتێب یەك كتێبی فەرهاد پیڕباڵم كڕی بە ناونیشانی(ئەوكتێبانەی ژیانیان گۆڕیم) كە لە كۆمەڵێك وتاری ئەدەبی پێك هاتبوو , وتارەكان زۆر جوان و بەپێز بوون بۆیە ئیتر حەز م چووە خوێندنەوەی كتێبەكانی فەرهاد پیڕباڵ بۆیە ئەم جارەیان بڕیارم دا یەكەم ڕۆمانی ئەو بخوێنمەوە كە هەرچەندە چەندین ڕۆمانی دیكەی هەیە, كە لەفرسەتێكدا هەوڵبدەم ئەوانی تریش بخوێنمەوە.

خودی (د.فەرهاد پیڕباڵ) بەلامەوە گرنگ نیە كە سەر بە چ هێزێك و چ لایەنێكە ئەوەی بەلای منەوە گرنگە ئەوەیە كە نووسەرێكی كوردە و هیچی تر... ,بەڵام بەداخەوە دەبینین بەردەوام ڕووبەڕووی دژایەتی كردن و سەركوتكردن دەبێتەوە , ئەمەش ئەوە بۆمان دەردەخات كوردستان لەژێر هەژموونی دیكتاتۆری دواكەوتن دایە لەسایەی ئەم حكومەتەوە , چوونكە ئازاردانی كەسێكی وەكو فەرهاد و نمونەكانی چەندین پرسیار و بۆشایی بەدوای خۆی بەجێ دەهێلێتەوە, بۆیە فەرهاد پیڕباڵ بەشێكە لەو نموونەی جوانەی كوردستان و شاری هەولێر كە دەبێت بە هەموولایەكەوە ڕێزی لێبگرین, هەموو جارێك باسی ئەوە دەكرێت كە وڵاتانی تر كەسانی وەكو ئەفلاتۆن و ئەرستۆ و هێگل و ئەلبێرت كامۆیان هەیە لەگەل َ چەندین كەسانی تر... كەچی دەگوترێت كورد هیچ كەسێكی هاوشێوەی ئەوانی نیە, نەخێر بەپێچەوانە كوردیش بە چەندین كەسی جوان و ئەزموونداری هەیە لەبوارە جیاوازەكان دا, دیارترینیانیش فەرهاد پیڕباڵە كە وەكو سیمبولێك وایە بۆ گەلی كورد بە نووسینە جوانەكانی توانیویەتی خزمەتێكی بەرچاوی گەلەكەی بكات, یاخود لەپاڵ ئەمانەوە بەداخەوە هەندێ تاكی كوردی نەفام هەیە كە بە فەرهاد پرباڵ بەكەسێكی شێت لە قەلەم دەدەن كە ئەمە خۆی لە بنەڕەتدا هەركەسێك ئەم وشەیەی لە دەمیەوە بێتە دەرەوە لە بەرامبەر د.فەرهاد ئەوە سەرەتا خۆی كەسێكی نەخۆش و شێت و دواكەوتووە.

ڕۆمانی مولازم تەحسین و شتی تر... باس لە ڕووداوەكان و نەهامەتیەكانی گەلی كورد دەكات بەدەستی ڕژێمی بەعسەوە , ئەگەر چی ناوەكەی گۆڕدراوە بۆ مولازم تەحسین بەڵام خۆی لە ڕاستیدا لە سەردەمی بەعس لەشاری سلێمانی كەسایەتیەكی دیاری بەعسی هەبوو كە خەڵكی زۆر لێی دەترسان وە پیاوێكی زۆر مەترسیدار بوو ناوی مولازم موحسین بوو بەڵام لە ڕۆمانەكەی فەرهاد پیڕباڵ ئاماژە بەناوێكی تر دەكات كە لەبنەڕەتدا هەر ئەوكاسایەتیە بەڵام ناوەكەی گۆڕدراوە, وە لەهەمان كاتیشدا دوو كارەكتەری سەرەكی تریش لەنێو ڕۆمانەكەدا بوونی هەیە ئەویش بەناوی جوامێر و ئەختەر, كە جوامێر بەڕێوبەری كشتوكاڵی سلێمانیە بەڵام لەپاشان بەرەو شاخ دەڕوات پێش ئەوەی بڕوات بۆ شاخ ئەختەر خۆشەویستەكەی دەكاتە (ژن) و دواتر بەجێی دەهێلێت كە لەم نێوەندەدا ئەختەر دەبێتە قوربانی جوامێر و مولازم تەحسین و چالاكیەكانی حزب لەشاخ كە دواتریش سەركردایەتی شاخ ئەختەر دەكەنە بەرپرسی ڕێكخستنەكانی شار بۆ ئەوەی ڕاپۆرتیان بۆ بنوسێت و ڕەوانەی شاخی بكات, چەند جارێك جوامێر بەڵێنی پێدەدات بیخوازێت بەڵام دەڵێت سەركردایەتی حزب ڕازی نین جارێ, چوونكە ئەختەر لەناو سلێمانی ببوە بە بنێشتە خۆشەی دەمی خەڵك كە بە قەحپە ناویان دەبرد كە بەردەوام دەیان گوت: ئەم كچە جوانە جارێك لە باوەشی جوامێرەو جارێكیش لەباوەشی مولازم تەحسینە بەخوا بەجوانیەكەی دڵی هەردوكیان بۆ خۆی بردوە ئیتر لەگەڵ چەندان قسەو قسەلۆكی دیكە.

ئەگەر چی بۆ دواجار سەركردایەتی شاخ بڕیاردەدەن كە مولازم تەحسین لە بۆسەیكدا بگرن بیبەنە شاخ ئەمەش لە ڕێگای جوامێر و ئەختەرەوە ئەم كارە دەبێت ئەنجام بدرێت بەڵام جوامێر لەلایەن مولازم تەحسینەوە سەری لەلاشەی لێدەكرێتەوەو , لەپاشانیش كە مولازم تەحسین كاری بە ئەختەر تەواو دەبێت بە پاسەوانەكانی دەڵێت ئەم قەحپەیەش لێرە دووربخەنەوە, چوونكە مولازم تەحسین ئەختەری وا هەڵخەلەتاندبوو كە گوایە دەیەوێت هاوسەرگیری لەگەڵ دا بكات بەڵام تەنها بۆ ئەوە بوو كە كارەكەی خۆی پێ ئەنجام بدات و لەپاشانیس ئەختەریش لەناو ببات.....

لە دیوێكی نێو ڕۆمانەكە بەشێك لە ئازارەكانی گەلی كورد بۆمان دەخاتە ڕوو كە چەند ڕۆژگارێكی ناخۆشیان تێپەڕاندوە لەگەڵ دەسەڵاتی دیكتاتۆری بەعس, وەهەروەها بەردەوام هەوڵی سەركوتكردنی شۆڕش و خەباتی كوردانیان دەدا لە پێناو سەربەخۆیان , ئەگەرچی خوێنی دەیان ڕۆلەی كورد بەكچ و كوڕو پیاو و ژنەوە بوونە قووربانی بەڵام بۆ دواجار بەعس كەوتە مێژووی ڕەشەوە.

4|3|2020