ئەمە بڵاوبكەوە
FaceBook  Twitter  

كتێبی ژانرە ئەدەبییەكانی سمكۆ محەمەد كە بریتیە لە 104 لاپەڕەو بە قەبارە مام ناوەندی لەسەر ئەركی خۆی بەچاپی گەیاندووە كەوتە بەردەستی خوێنەران. نووسەر لەم كتێبەیەدا باس لەو چەمكانە دەكات كە پەیوەندی بە ئەدەب و فكرەوە هەیە و لە ساڵانی هەشتاكانەوە هاتووتە نێو دونیای ئەدەبی كوردی، بەڵام وەكو نووسەر لە پێشەكی كتێبەكەیدا نووسیویەتی ( بەهۆی ئەوەی ئەو چەمكانە درووستكراوی ئێمە نیین و كارمان پێیان نەكردووە وەكو بەشێك لە شۆڕشی فەرهەنگی، بۆیە بەهەڵە كاریان پێكراوە و بەهەڵە لەنێو توێژینەوەی ئەدەبیدا كاریان پێكراوە، بۆیە منیش جارێكی تر بەپێی ئەو لۆژیكەی كە نوێخوازی بە گرینگی دەزانێ‌ جارێكی تر پێناسە و شیكردنەوەم بۆ كردووە، یان باشتر بڵێم لەسەریانم نووسیوە). 

نووسەر لە پێشەكی كتێبەكەیدا دەڵێ‌ "قسەكردن لەسەر دەقی دەربار و دەقنووسی كورد، وەكو جۆرێك لەتابۆ دیاریكراوە و بووەتە هێڵی سوور، ئەوەش كەجار بەجار رچەشكێنی كردووە و لەسەر شاعیری دەربار شتی نوسیووە، هێندەی لەژێر كاریگەری سیاسەت و ئیدیۆلۆژی بووە، یان سەرچاوەكەی لەكۆنە قینەوە بووە، هێندە مەبەستی خزمەتكردن نەبووە بەئەدەبیات و دەرهاویشتەكانی دیكەی، ئەمە لەحاڵێكدا شاعیری دەربار لەدەروەی دونیای ئەدەبی كوردی، مێژوویەكی هەیە و لەوانەش نمونەی بەشێك لەشاعیرەكانمان هێناوەتەوە". 

هەروەها كە باس لەو چەمكانە دەكات ئاماژە بۆ ئەوە دەكات كە "بەشێكی دیكەی ئەو چەمك و دەستەواژانەی كەلەدونیای فكری ئەدەبیدا بەكاردێت، لێرەدا تێشكمان خستۆتە سەری، لەوانەش (دەقاوێزان و دەقی فۆرمالیستی و هایكۆیی و هتد بوو، مەبەستەكەش ئەوەیە كەهەریەك لەو چەمكە فكریانە لەفۆرَمی دەقەكاندا بەكارهاتووە، بەڵام پێناسە نەكراوە تاكو خوێنەر بتوانێ‌ پۆلێنیان بكات و مەعریفەیەكی لەبارەوە بزانێ‌. 

ئەخلاقیاتی خوێندنەوە، یەكێك لەو وتارانەیە كە قسەی زۆری لەسەر كراوە، بەتایبەت بۆئەو كەسانەی بەناوی خوێندنەوەی دەقەوە، بەستایلێكی كلاسیكیانە مامەڵە لەتەك دەقدا دەكات، بۆنمونە ئێستاش هەندێ‌ خوێنەر هەن كەهێندەی باس لەدەقنووس و ژیانی تایبەتی و مەبەستگەرایی دەنووسن، هێندە باس لەجەوهەری دەقەكە و تەكنیك و نوسین ناكەن، لەحاڵێكدا ئەم ستایلە لەدونیادا نەماوە و ناخوێنرێتەوە، تائەو رادەیەی وەكو كۆمیدیایەك تەماشا دەكرێت".

لەكۆتاییدا دەبێ‌ با لەوە بكەین كە نووسەر سمكۆ محەمەد ئەمە 18 هەمین كتێبیەتی و 3 كتێبی دیكەی لەبارەی سیاسەت و رەخنەی ئەدەبی و چاوپێكەوتنەكانی لەژێر چاپدان و لەماوەیەكی كورتدا دەكەونە بەردەستی خوێنەران.