ئەمە بڵاوبكەوە
FaceBook  Twitter  

بەربونەوەی عیشق 

لەخەندەیەکی پەمەیی دا .

جاران کەلێرە بوی 

باخچــە کراسی سێوە مزرەکانی ،

لەحەوشەکەی ئێمە هەڵدەخست !!

چۆلەکەکانـی ،

لەبن ساپیتەی ئێوارەیەکی ڕوخۆشدا دەخەواندو

مانگیشی بەدیار ئێمەوە 

لای پەنجەرەکە جێدەهێشت !!

جاران ( با ) 

لەگەڕەکی ئێمەدا ،

خۆی هەڵدەکێشا لە عەتـر و

شەو دەستەکانی لای دایکم پڕدەکردن ،

لە بخوری نێرگزەکانی پێکەنین !!

بیرت چۆتەوە ؟!

مەغریبانێک گیرفانەکانم پڕ دەکردی ،

لەنۆتەکانی گۆرانی پەمەیی و

مەستیتم تەڕدەکردەوە ،

بەشەربەتی شیعر ؟

جێم نەدەهێشتی،

تا چاوڕەشکردنی شیعرێک 

بەکلچوکی نەغمەی نیشتنەوەی پەپولەیەکی شین 

لەبەردەم ئاوێنەیەکی شاد .

تامەست بونی تریفە ،

لەبەیانیەکی کراس سپی !!!!

لە هزری من 

کەروبار دەگا بەتـۆ ،

کراسە ڕونەکەی هەڵدەخا بەو دار بییەی 

دوای تەڕبونی کەزیەکانی 

لای خەیاڵێکی سپیم پاڵدەکەوێت ،

تا لەبخوری پەرچەمەکانی تێر دەبم !

زۆرجار دەمەوێ

خۆم لە کوچەکانی شیعر بشارمەوە 

قەڵەمەکەم بەڕوتـی ،

لای ماڵی ڕێواسێک دانێم !

دەمەوێ ،

هەردو دەستم 

بەچاوی کۆترێکی ترساوەوە بنێم 

تا تۆ لە تامکردنـی گوناهێک دەبیتەوە !

تا تۆ ،

لەسوتانی مێرگی سنەوبەری من وەرس دەبی !!

کەچی ئەوە لای دڵی من ،

بەربونەوەی عیشقە لەخەندەیەکی پەمەیی دا

درۆکردنە لەگەڵ شەقبونی هەنارێک !!

من ئەوکات 

لەشەرمی مەکرەکانی کانی 

هەر هێندەی هەرمێیەک دەبم !

کەچی ،

کەپاساریەکی باڵ شین ،

لەسەر لقی کوشتنم دەنیشێتەوە 

وەک یەکەم تەڕبوون بەهەتاو

لە عیشوەتدا ،

جارێکی تر نقوم دەبم !!