ئەمە بڵاوبكەوە
FaceBook  Twitter  

🌿 🌿 🌿 🌿🌿 

مەمبیستە 

بالەحەرفی گۆرانیەکانت کاڵ ببمەوە ! 

بەرلەوەی نەسیم لەخەو هەستێ ،

مژێک لەدوکەڵـی یەئسی بێدەنگیم بدە .

لەمێژە دەمەوێ شتێکت لا بدرکێنم 

لەمێژە دەمەوێ بڵێم : 

تۆ تا ئێستا ،

بەکۆڵانی شیعردا تێنەپەڕیوی !؟ 

تۆ نازانی ئازار ،

لەدەفتەری هیجرەتدا چۆن دەنوسرێتەوە !؟؟

لێرە هەموو گوڵەکانی ،

دەوری پەرداخێکی شەراب بەسەختی گەورە دەبن !

لێرە عیشق ،

وەک هەورێکی دڵپڕ وایە ،

لەساتی بەربونەوەی لە کۆشی مانگ 

چی جۆگەلەی ملوانکە شین هەیە ،

لەڕۆمانـی دابڕانا 

ماچەکانیان دەشۆنەوە !!

بیرم ناچــێ !

ئەو ماڵە گەورەی ئێوە 

جێگای شیعرێکی منی تێدا نەبۆوە 

شیعرێک نەکۆڵانێکی چرچ و لۆچی زەمەنی پێنەدەزانــی ،

نەباخچەیەک لە کوشتنی هەتاو !!

لەڕاستیدا ،

لێکردنەوەی ئەو هەمو هێشووە گوناهە بــۆ ؟؟

شیعری من ،

کەدەخرایە ناو رستەیەکی ساردو،

وەک پاساری دەخرایە ناو گیرفانی منداڵێکی بزێو 

ئەوکات دەستی دەبرد ،

بۆ ئەگریجەی تریفەو بۆ خەناوکەی گەردنی سێو !!

روبار دڵی منی 

لەسەر بەردێکی تەنیشت خۆی دانا ،

ئیتر کام شەپۆلە دەمکاتەوە بەبەستەیەک !؟

کام چیرۆکە ،

دەمخاتەوە بیری تاڤگەیەک لە ڕەنگ ؟!

کام دار هەنارە ،

دەمباتەوە هەیوانی ماڵی هەرمییەک ؟!

باران وافێر بووە ،

لەکۆڵانێکی ترسنۆک خۆی ڕووت دەکاتەوە و

زوو زوو مەمکەکانی پێشانی نەسیم دەدات !

ئەو وافێر بووە ،

دەچێتە خەونی هەتاوێک ،

ئەو هەتاوەی بەناچاری لای سێبەرێک پاڵکەوتووە !

ئاخۆ دەبێ ،

چەند تەمەنم لەسەر ئەو گەڵایە مابێ 

تاکو بەقەڵەمەکەم بڵێم :

قۆپچەی کراسەکەت بترازێنە 

باپوشی رستەزەردەکانـی تەمەن 

بەئاونگی ماچێک تەڕ بێتەوە !!!

ئەو هەموو رستانە لەوێ ڕژابوون 

کەچی کتێبێک ،

لەگریانی خۆیدا نەیشاردنەوە !

چیرۆکێک لەسێبەر بۆ هەتاو باسی نەکردن !!

دان بەوەدا دەنێم کەشێتم !

دان بەوەدا دەنێم عەترم بریندار کردووە !

توخوا بهێڵە تاباران مەزەیەک دەکا بۆ شەراب 

پەنجەکانی پرتەقاڵێک لەخەنەدەم !!

وەرە خۆت ئەمجارەیان 

لەرستەیەکی شیندا بمنێژە لەرستەیەک !

لەکراسی خەت خەتی ڕێحانەیەک بمشارەوە 

نەتهێشت ئێوارەیەک بەپەنجە مەستەکانی حوزنەوە ،

دامەنی شنەبایەک بگـرم !

نەتهێشت مێژووم کۆنتر بێ لەباران 

نەتهێشت لەهۆنینەوەی کەزی کتێبێک ،

بەرستەی ماچێکەوە بمرم

2020 /21/6

 

🌸 🌸 🌸 🌸 🌸 🌸 🌸 🌸 🌸 🌸 🌸 🌸