ئەمە بڵاوبكەوە
FaceBook  Twitter  

(1)

خۆری ژنێک پیاسە دەکا،

شەونمی سەر پەلکەگیاکان،

ڕۆدەچن لەتابوتی هەڵما !

(2)

تاریکی گرمۆڵە دەبێ،

تک تک ڕووناکی دەکێشێ،

لەتەجەللای ژنێکا

لەتێک چرپە چاوەکا!!

(3)

ڕێگاکان لەنجەولاری ژنێک دەپۆشن،

قاپقاپەکان دەچنە،

پرسەی شوشە عەترێک !

(4)

دواجار مەشخەڵەکانی ئاگر دەخەون،

لەئاستانەی ژنێکا،

جلی خۆڵەمێش لەبەر‌دەکەن!!

(5)

زریانێک سەرهەڵئەدا،

پیاوێک کاتژمێرەکەی میقات،

دەکا لەڕەشەبا..

بارانە ژنێک دەکۆکێ و

فرسەخێک فیراق لەبەر دەکا!!!

(6)

پیاوێک لەڕووبار دەچێ،

شەپۆلەکان پێڵاوییەتی،

کافی کفر لەچاوەکانییا..

من لەچڵی پەنجەکانم دەترسم،

قەفەسی لێ بچنێ!!!

(7)

بانەچینە ڕستەی عیشقەوە،

ژنی تیا نییە..

ئێمە ناتوانین لەتەرمی دارستان بگەین،

ماڵی مەلەکان دادەخەین...

پیاوترین کەس

ئێمە کەناتوانین لەباڵندە خۆمان هەڵکێشین،

عیشق یانی چی؟؟

ئاخر لەقومێک ژیانا،

مردن سەفەر دەکاو

دەبینە چۆڵترین کەس!!!!

ڕۆژ هەڵەبجەیی

سلێمانی..10/7/2020