ئەمە بڵاوبكەوە
FaceBook  Twitter  

دڵم تاریک بوو

بە دڵى وەک شەو پەنجەرەم بۆ هەتاو کردەوە 

تیشکى سەر چاوم کەوتە حاڵەتى فڕین

بۆ کوێ نازانم

حاڵم باش نییە هەمووان دەڵێن خوا باشیکا

زمان نەدەگەڕا لە بەر خۆ دەمگوت

ئەو هەموو تاریکییە چۆن تەسلیم دەکرێتەوە

دڵم تاریک بوو

بە بەر چاوى هەمووان

بە دڵى کوێر لە مردن رامدەکرد

بۆ کوێ نازانم

هەر ئەوەندەم بیر دێتەوە 

وەک ئەوەى شەو قەفەزى تاریکى بێ 

دەستم لە تاریکى بەردا 

خۆم تەسلیمى رۆناکى کرد

دڵم رۆناک بوو

دەستم بە گوڵى هەتاوە

تۆ بڵێ مرۆڤ ناوەستێ لە گۆڕستان نەبێ

من ئەوەتان بۆ روون ناکەمەوە

وەک ئەوەى مردن مردن بێ

هەست بە هەمان ترپەى تاریکى دەکەم 

یەکێک گوتى ئەوە تاریکییە بەردەبێتەوە یان دڵ

ژیان لە هەردوو چاوم هەتا دەهات دەشکایەوە 

سەر باڵندەى تەریوو

جەستەم گوڵى هەتاو بردى بۆ باخى تەماشا

بە دڵ دەمگوت دێمەوە

بە چاو تیشکەکانم لە گۆڕستان رزگار دەکرد

زمان نەدەگەڕا وەک ئەوەى تاریکى مردن بێ

ئەو هەموو تاریکییەم تەسلیم کردەوە

بە هەمووان دەڵێم من ئەوەتا لێرەم

وڵات تاریکە 

هەر ئەوەندەم بیر دێتەوە

دەستم لە تاریکى بەردا.

29/4/2015

موتەلیب عەبدوڵڵا