ئەمە بڵاوبكەوە
FaceBook  Twitter  

نووسینی: د. چواس حسن

ئێمە بەردەوام،

لەسەر شەقام و چێشتخانە و فەرمانگەکان،

لەبەردەمی مێزی نانەواخانە و میوەفرۆشەکان،

لەلای چایچی و لەفە فرۆشەکان،

لەناو مۆڵ و بازاڕ و دوکانەکان،

لە سەیرانگا و مەلەوانگەکان،

لە نەخۆشخانە و ژووری پزیشکەکان،

لەناو پاس و تەکسی،

تەنانەت لەدەشت و دەریش،

بگرە لەماڵەکانیشمان،

ئۆتۆمۆبێلەکانیشماندا،

تێکخزاوین.

........

لەکاتی قژ بڕین و دان کێشاندا،

لەکڕینی شیرینی جەژن و

هەواڵ پرسینی نەخۆشدا،

تەنانەت لەناشتن و قەبریشدا،

مرۆڤەکان

هەمیشە تێکخزاون،

تا ئەوەی گەر شارەزای زەوی نەبین،

وا دەزانین،

ئێمە لەسەردەمێکدا دەژین،

کە دوا دەنکی گەنم و قومی چا و پارچە کێک و بزماری کەوش و کەوچکی چێشت و سەمونی حەجەری ماون و بەس،

سەردەمێک دوا بستی زەوی و سێبەری دار و قەراغی رووبار و کورسیی پاس ماون و بەس،

سەردەمێک دوا چرپای نەخۆشخانە و دوا پزیشک و دوا دەرمان و دوا گۆڕ مابن و بەس.

مرۆڤ بوونەوەرێکی ترساوی تێکخزاوە.