ئەمە بڵاوبكەوە
FaceBook  Twitter  

ئامینێ و ئامین کیژی مام حاجی

هاتمە بەر ماڵتان من بە موحتاجی

گوتم بابڕۆین ڕۆژ گەییە زەردی

فەرمووت جوان نیە کاری نامەردی

گوتم وەرەلام دەستەکەت بێنە

گوتت دەستنوێژم توخوا مەشکێنە

خۆ ئێمەش دەرگا و حەوشەمان هەیە

بە پەنجەرەدا توخوا قەت مەیە

ئامینێ!

بە شەقاماندا هاتم

ئامینێ!

شەختەی زستانی ڕۆژگار

جەستە و هزری هەنگاوتم

ئامینێ!

سڵاوم لە دایکت کرد

سڵاوم لە باوکت کرد

تۆیان کرد بە خەڵاتم

***

خەڵاتی خودا بۆ منی ڕەبەن

ئاشتی کردمەوە

لە گەڵ ڕۆژگار و جۆگەلەی تەمەن

***

سەوزەڵێ وا هاتم

بەڕەنگە زەردەکەمەوە

لیمۆی زەردیش لە نێو گەڵای

سەوزدا دەحاوێتەوە

***

ڕاستە دڵداری لەنێوانماندا

وەك خەڵکی نیە

بەڵام دڵسۆزی و ڕەزامەندیمان

وەفا و هۆگری لەماڵی ئێمە

لەسایەی خودا

زۆر کەم وێنەیە

ئەگەر خولەکێك لەتۆ دادەبڕێم

گڕووت بۆ دەگرم هەر وەکو منداڵ

هەست بە ونبوون و پەشێوی دەکەم

سەقفی نامێنێ وەتاغ و نێوماڵ

***

چۆن تەها حوسێن

بە (سوزان)ی گوت:

هاوسەری گیانم

بێ تۆ کت و مت

دەڵێی نابینام

تاریکە ژیانم

***

کە بۆم بوویتە خاك

منش بووم بە چەم

بووینە پڕۆژە

نەمام و گوڵمان

هێنایە بەرهەم

ئەوا بیست ساڵە

حەوهەزار ڕۆژە

***

لەسایەی خواوە ئێستا بەختیارین

شوکر بێباکین لە دەرد و قەیران

شوکرانە بژێری پەروەردگارین

کامەت پێخۆشە؟ بەستە یان حەیران

***

من وەكو مرۆڤ لەبەر پێیانت

زەمین و گڵم .. ئەی تاقە گۆڵم

بەڵام وەك شاعیر....

توخوا بمبوورە خانمی ماڵەکەم...

هێشتا سینگڵم

١١-٧-٢٠٢٠