ئەمە بڵاوبكەوە
FaceBook  Twitter  

بەیار بڵێن :

لەزۆر گەڕەکی کتێبا 

نوێژم لەسەر کفنی خۆم کردووە !

لەپەنا بەردی زۆر ڕستەدا شەهید بووم ! 

هەمو جارێ پایز ،

نامەکانی تەڕ دەکردم 

زۆر کەڕەت فانۆسی گریان ،

بەگەڕەکی ئێوەیدا دەهێنام !!

لەکۆڵانەکانی ئیماندا ،

دەرگای زۆر ترسم کوتا !

کەچی هەمو جارێ منی ڕوبار 

لەدڵی باخچەیەکدا نقوم دەبوم !!!

وەرەو ،

بەقەراغی داڵغەی ئێوارەیەکەوە بمبینە 

ئەو کاتەی گۆرانی ،

لەدەمی مزری هەنارێکەوە دەڕژێ !

ئەوکاتەی مانگ سەرمەستەو 

لەکۆڵانێکی تۆزاویدا کەوتووە ..

من لەپەنا زەنگیانەکانی ئازاردا شین دەچمەوە 

ئەوکاتەی گیا کفت دەبێ ،

لەمەڵۆی ماچی پەنجەکانی ڕەشەبـا !!!

کەم شەو هەبو ،

تەنیاییم بۆ دڵدانەوەی خۆی ،

نیشتیمان هەڵنەستێنێ لـە خــەو 

کۆتایی شیعرێک دانەپۆشێ بەدەریـا !!!

من بەو درەنگی شەوە 

لای ڕێحانەکانی بیرەوەری تۆ دێمەوە 

هەر خوا خوامە ،

گوێم لە خرینگەی بازنەکانی مانگەشەوو

لە چرپەی ماچی دوو ماسی بێت ،

کەبەتەنکایەکی ڕووتدا ڕادەکەن !!

هەر خوا خوامە ،

دەستە تەڕەکانی باران ڕوبار هەڵنەستێنێ لە خەو 

زەمەن گیرفانەکانی بـا ،

پڕ نەکا لەشیعرە فڕێدراوەکانی من !!

تێناگەم !!

ئەو عیشقەی من 

بۆبەدەمی سێبەرێک پڕ دەکرێ لە جنێو ؟! 

پەرداخەکانی پڕدەکرێن لەشیلەی وەرین ؟!

خوایە تۆبۆ جارێک ،

خۆت نیشانی دیوانێکی شیعرم نادەی ؟!

تاکو چاوت ،

لەو هەمو پیربونە بێت !

تاکو گوێت ،

لە کوشتنی قافیەکانی باران و سوتانی پەنجەکانی ئاوو 

هەتیو بونی هێلانەکانی باخچە بێت !!

خوایە ئەو سێوی ئازارەی من ،

کەی لەدەست پایزێکی ڕوت و قوتا 

لەکۆشی چاوەڕوانی بەردەبێتەوە .؟!

تۆ کەی من دەخوێنیتەوە ؟!

لە نێوانی پەنجە قرتاوەکانی کتێبێک و

نوسینی ئەلف وبێکانی هەتاوو 

لە حەوشەی پەمەیی وەفـا ،

هەموو ڕۆژێک شوشەیەک عەتـرو

شیعرێکی من بە برینداری دێتەوە !!!

خوایە تۆ کەی من دەخوێنیتەوە ؟؟!