ئەمە بڵاوبكەوە
FaceBook  Twitter  

زۆر دەمێکە،

کەوتوومەسەر خولیای زمانو

گەرەکمە بۆتۆ بێتەگۆ

بەڵام ئەفسووس، 

زمان کۆتکراوەو 

بەستەرەکانی، سڕ بوون

لەو ڕۆژەوەی بێ بەهانە

ڕووت وەرگێڕاو 

چویە باوەشی، ئەهریمەن

جۆگەلەکانی عاتیفە،

لەزەمەندی ڕق پڕ بوون

من تاقەتی نووسینەوەی

ئەو سەربردەو 

ئەو دیرۆکە پڕلەککەیەم 

لەکوێ ماوە ؟

وەکو جاران سێبەر ئاسا

لەدووت بخشێم

یان بۆت ببمە

قەفی گۆچانی چەماوە !!

کاتێک ئەو ڕۆژە دێتەوە،

کەبەسەر سەکۆی شکۆوە

لەناو گەرمەی بانگەوازدا،

قوڕگم بە دوکەڵ گیرابوو

لەو ساوە ژێی دەنگم کپەو

پڕ بەقوڕگم هێڵنج ئەدەم

کێ ئەو ڕۆژەی 

هەر لە خەیاڵو بیرا بوو ؟

چەندە ئەستەمو دژوارە

دەستێک چەقۆ، 

بنێتە ناو برینی خۆی !!

لەناو مۆزەو لە شوانەوارێکی

ژەنگ گرتوو، 

بە شمشێرێکی ژەنگاوی

وا شانازو شاگەشکە بێ

بەمەرگو سەر بڕینی خۆی؟!!

خدر گوڵانی

ئەیلوولی ٢٠٢٠