ئەمە بڵاوبكەوە
FaceBook  Twitter  

  

بێ هارمۆنیکای عیشقی لەدەستچووت،

سەفەر ناکەم،،

جیهان با لە خەونی قەترانی خۆیدا، شەپۆلبدا..

کەشتی سەرخۆشی من..

لە ئۆقیانوسی ترا تاودراوە،،

هەر ساتێکم تەم و مژو بارانێکە،،

تۆش ڕێگە بە،،،

با ڕەوە پەپولەی ..

ئەرخەوانی کازیوەیەکا،،

بە دەربەندی تەنیاییمدا..

تێپەڕکا،،،

هەر پروشە بەفری تۆیە،،

لەسەر لێوم،،

بریسکەی دێ،،

کە ئەگەمە هەرشوێنێ ،

دارستانێ وەک چاوی تۆ،،

پڕ تەمتومان،،

هاوسەفەرمە،،،

کە ویستگە لە دوای ویستگە،،

بە نێو کەژو گژو گیای جوانیتا ،،

ئەگۆڕم، مەستر ئەبم،،

لەگەڵ زەنگی هەر ڕۆشتنێکت،،

پریاسکەم لە خەووشیعرو..

مانگە شینە بوهەیمیەکان پڕ ئەکەمەوە،،

کە ڕشتەکانی بیرەوەریش ، بە باڵای..

بریسکاوی ئەستێرەکانا هەڵئەواسم،،

ڕەزی فرمێسکی تۆیە،،

تێشووی سەفەری دوور، قەراغ ..

زەریای چاوەڕوانیتە، شەوانی مۆری…

سەرهەڵگرتنم، چەند قەشەنگ بوو،،

وەک پەنجەرەیەک،،

لە پەلکە زێڕینە،،

نیگای ئەفسونت..

بەسەر کازیوەدا ئە کرایەوە،،

کڵپەی ئاگری سپی تەمەن،،

لە کەناری دیدەنیت دائەنێم،

فانوسی دەرنەکەوتنت،،،

لە هەموو بەندەرێک..

هەڵئەگیرسێنم،،،

هەر کە کۆچێکت..

بوە یاداشتی کەلێک..

لە ئاسۆی سەفەرا،،

لە خەوی بەسەرچوو،،

پۆلە فریشتەیەک،،،

لە وشە سرک تر،ئاوی تر

بەڵکو لە چاوانتەوە، بگاتە جێ

سپیتریش، لە گوڵی نێرگز،،،

ئەو خونچانەی..

لە مەنزڵگەی چاوەڕوانی، زیاتر..

پەلەی لە ئامێزگرتنی بەهاری بوو،

تا ئەبەد ناگا،،

کڵپەی مراویەکانی حەزیش، ،،

لە نەگەیشتن بە شنەبای هەناسەت..

ڕۆحیان دەرچوو،،

کە مەرگیش ، بە پێچەوانەی..

میلۆدیای کۆچی سەر کەناری من…

تاوی ئەسپەڕەشەکانی..

قەراغ زەریای ناهۆشیاری..

مرۆڤە خەیاڵاویەکان ئەدا،،،

من لە هەورە گرمەی تۆقینەری..

ڕۆحی یاخی ئەتلامەوە،،،

بەڵام مەرگ..

شکۆی لە زۆری قوربانیەکانیدایە،،

شەختە دڵی تەنیاییش،،

هەر کاتێک،،،

تیرە ئاڵتونیەکانی عیشق،،

کەوانی ئاوازی عەشقی..

لەدەستچوو جێ دێڵن،،،

لە بەندەری چاوەڕوانیدا با بتوێتەوە،،

تەنانەت تیرێکی…

نێو تاریکی جێهێشتنت…

ئاسکێکی ناو چاوی شەوەزەنگ ناپێکێ،،

بەڵام بڕیار ئەدەم،،

گەر ئەمجارە فڕیمەوە،

بە باڵی شیعری سرک و بزێو،،

وەک هەڵۆیەکی یاخی..

لە نسکۆی شکستی زەمین،،،

باڵەکانم ناکەمەوە،،،

لە بەرزترین ئاسۆدا،،

کەوتنە خوارەوە بەهای هەیە،،،

مەرگ بە شکۆی تەنیایی و جێ هێشتن..

و ڕژانی فرمێسک و ژاکان و ئەشکەنجەوە خۆشە،،،

بە فریشتە لاسارە ..

باڵ سوتاوەکانی پەرادیس ئەڵێم،

بۆ لێرە بوین، بۆ تەنیا بوین، بۆ چاوەڕێ بوین ؟؟؟

لە ژینێک، وەک بیابان،

نە سەرەتا..

نە کۆتا،،

پەیمان بێ، ،،

کە بە زنجیری ڕەشی دۆزەخیشا..

جەستەی کڵپەو تۆفانیان هەڵکێشام،،،

هەر قاقام بە یاریە بێ هودەییەکانی خواوەندە..

دڵ مسەکان بێ،

بەڵام من بە بریسکانەوەی..

خوێنی سەر خاچی شیعری خۆمەوە جوانم،،،

هییچ ناسڵەمێمەوە،،،

واز لە خوێنی ڕژاوی..

یەک دڵۆپە شیعری یاخی و..

بەدنەفرەتی دۆزەخیشم ناهێنم،،،

من بە گڕ و کڵپەو پشکۆی جەهەنەمی خۆمەوە قەشەنگم،،

لە سوتانی سوتماکی زومردی..

رۆح و جەستە ،،

هەزاران جار،،،

وەک سیمرخی ئاگر،

ئەگەمەوە قەڵای بڵندی خۆرسوتان،،،

بەڵام لۆژیکێک هەیە،،،

مرۆڤ هەرگیز ..

نابێتە هەڵۆ، مەرگیش..

ناهێڵی شکۆی کەوتنەخوارەوەی…

فڕینێکی مەزنی شایستە بێ،،،

بۆیە ڕۆحسوتان لە کازیوەیەک..

تاکە فریادڕەسە،،

ئای چی سیحرێکە،،

چی ئەبەدیەتیەکە،

لە دەربەندی ئاڵتونی پایزێکا،..

خۆسوتانێک…

لە جوانی کازیوەیەک،،

لە ئەفسوونی…

قەراغ زەریایەکا.