ئەمە بڵاوبكەوە
FaceBook  Twitter  

وێنەکەت 

لەڕەنگـی گۆرانی باخچەیەکی ڕووت دەچـێ

ڕووت ڕووت لە پێکەنین 

خاڵی تر لە دڵی ئەو سوێبانەی ،

لەژوانێکـا 

پەنجەی بەر ڕوومەتی تریفەیەک نەکەوتووە !

داماوتر لەو کولوە بەفرەی ،

تیسکەکانـی لە کفنـی شەختە دەئاڵێنـێ و

کزەبا یاری بەسەرو پرچــی دەکـا !! 

لە ڕەنگی ئەو سەحەرەی 

هەموو ڕۆژێک 

بەر زیکری مۆسیقایەکی شین دەکەوێ !!

وەرە لای من بنوو 

با پارچەیەک سێبەرت بۆ ڕاخەم !

کوا من لەدەستم دێ 

شوێن پێی گزنگ 

لە پەرداخی شکاوی ماچێکدا بشارمەوە ؟! 

کەشەوانە ،

بەشەرمەوە دەست دەبا بو ئەگریجەی گیـا و 

گمەی لای جوانیت لێ دەکەوێتە خوار !!

جارێکی تریش گوتوومە :

بەکۆڵانی شیعردا نایەمەوە !

ئەو دڵەی من عاقڵ نابێ ! 

ڕاهاتووە کە شیعرێ بەدزیەوە

دەخاتە ناو گیرفانی تۆزێک باران کوفردەکات ! 

کە ملوانکەی زەنگیانەی یادەکانی لەدەست دەپسێ

کوفر دەکات !!

کوا بریار بوو لای ئێمە عەتر پیر بێ ؟

بەفر پیر تر ،

باران نەیەتەوە ماڵ ؟!

تۆ جارێک ،

لە ئیمان و لە خۆت و لە (با)ت پرسیوە ؟

کە وەیشومە ،

چی لە هێشوەکانی منداڵی و

لە ئەگریجـەی قەسیدەیەکـی کۆن دەکات ؟!!