ئەمە بڵاوبكەوە
FaceBook  Twitter  

 

دیسـان دەرێم،

ئەوڕۆکر بەرێ سـبیانێ، وا زەینی خۆتانی بدەنێ

وەک بە پێش دەرکی مارێ هاوڕێ حەیرانێ دادەهات

بەرێ سـبیانێ،

دەرێم ڕاوەستابوو

لە دەرکی خۆشـناوان گەلەک گەلەک بە سەربڵندی

دەرێم بە پۆتینەکی چەکمە کۆییانی

بە چارۆگەکی پەنجەی عیفەتێ

هەڵڵا هەڵڵا گەرەک شیریینە لەبەر عایشەگورێ

خودا دەیزانێ.

 

+ +

دەوجا گوتم عەیشـەگورێ

گۆبەندی کۆییان گەلەک خۆشـە

ئەوەلی مانگی دەرێ بوهاران

لە دەشـتی کاولە هاموونێ

لە ناو مێرگ و ڕەشمار و حاجیلە و بەیبوونێ

زاڵـم، تۆ چاوێ گوڕێ، با غائینی دەست ڕەش پێ نەزانێ.

+ +

حـەیـران دەرێـم … بابـە، دەرێـم حـەیـران،

گازدەکەم، دەرێم لەسیلەی دروێش خدری

ئەمن لۆیە گەلەک سەردارێ وا گورج و گۆر و چاو بە کلی گەردن کۆییمە

دەریم لە سیلەی دەروێش خدری

ئەمن دەچمە سەر گردی میرسەیدی حاجی تۆفیقی

دەڕۆمەوە ئەشکەوتی ئاوەگردی خۆمان

ئەوا لە گێی منی خانەوێرانێ

گەلەک گەلەک خۆش دێ

دەنگی قازو قورینگان

لەگەڵ لاوکی هاوڕێیان

بۆیە عەیشـەگور دەرێ

بریا من باجگر و خەنجەرچینەی سەنگەران بوومایە

هەموو فەسلێ دەری بوهاران

برام لە دەرکی قیسەری

لە پانکی سەر سەرایە

لە کلکەی چنارۆکی بڵباسان

لە جووتە مەرقەدی

باپیر فەقێ ئەحمەدی و

شێخی جامی

برا ئەمن دەرێم لە پیرە هەولێرێم.

+ +

حـەیـران دەرێـم … بابـە، دەرێـم حـەیـران

چەندی گازدەکەم و گازدەکەم

دەرێم گورێ، شـۆڕەگورێ

دەتۆ سەری خۆتم لۆ برندکە گەردەنێ

خەریتە و فیشەکدان دێنەدەرێ

ئەمن سوندەکم خواردیە

لەپاش بەژنی گەڵەگەت و

قەدو دەمانچەی کاکە محەمەدی

لەدنیایە چیدی ناکەم سەفەرێ.

+ +

حـەیـران دەرێـم … بابـە، دەرێـم حـەیـران

سەرێ من چەند دێشـی

دری منی بەخانەوێرانێ بە لێوەلێوە

ئەمن هەموو فەسڵی بوهاران

بۆخۆم دێمە دەوری تۆپزاوا و هەرمۆتەی خارە سـێوە

چیبکەم گروکە و حاجیلە و بەیبوون

هەمووی هەستاینە پێوە

جانگۆ نازانن سـەبارەت بە چاوێ بەژنی بڵند و

قەد ودەمانچەی محەمەدی

در منی خانەوێرانێ گەلەک گەلەک پەشـێوە.

+ +

حـەیـران دەرێـم … بابـە، دەرێـم حـەیـران

دەوڕۆکە بەری ئێوارێ عایشەگور دەرێتە

هاوڕێ حەمەلاوە

ئەتو سەرێ چەند سارانە شاری قۆچە شامێت

کووتاوە

مارت وێران بی

خەناوکەی بە مۆری و مەرجانت لەمن چاوە

حەمەلاو دەڵێ

توخوا دایە

سەبرم لێبگرە تا جارێ دەچمە وراتی قۆچە شامێ

دەمانچەی لە قەدان دەفرۆشم لۆت

دەدەم بە سوورە مەرجانێ

قیرسی خەنجەری دەبانیم دەفرۆشم

لۆت دەدەم بە قەنەفرێ

عەیشەگور دەرێ

وەی چاوی دایکت کۆربی، ئەمن نامەوێ

ڕەبی لێم بەمیرات بی مۆری و مەرجان

قەنەفر بە کفنم داکرێ.

+ +

حـەیـران دەرێـم … بابـە، دەرێـم حـەیـران

حەمەلاو دەرێ

گەر سەر سەفینی بەسەر مارە دیاناندا دەڕوانێ

دەمگۆتە بەژنێ شینبۆوەی بەدارو شوولکی جەلادانی

دائیرەی ئەمنی هەولێرێ

دەبێ قەفی زنجیران بپچڕینم

لە زیندانێ بەعسیان وەدەرێنم دایە عەیشـەگورێ

دەتۆ وەرە ئەوجا هاوین گەلەک گەلەک گەرمایە

لەبۆ خۆمان ئەمن کەپرەکی

لۆتو دەکەم لەسەری کۆسارێ.

+ +

حـەیـران دەرێـم … بابـە، دەرێـم حـەیـران

حەمەلاو دەرێ

بناغەی کەپرێ دادەنێم لە سۆتکەی

دیواری دەکەم بە قەنەفرێ

کاریتەی داوێمی لە باسکی خۆم و ڕۆستەم و بەشدارێ

سەری دەگرم بە چەکووشی خۆم و داسی سەپانێ

خۆرەئاوی دەکەم بە سوورمەی بن پێی کاوێسی

مارنجی دەکەم بەخاسە ڕەنگی سۆڕاوێ

دەیرشێنم بە گوروای بن بسکی فریشتە نازدارێ

ئەوجا شەوێ

لە سێ بارێ نیوەشەوێ

دەستی بەژنی ئەوی شـۆڕە شەهیدی دەگرم

دەیبەمە ناو کەپرە سوورێ، شەوبای شەوانی لێدا

چاوەکەم بۆنی بڕوا

بەسەر وراتی کۆیە و هەولێرێ

حەیران،

لە خۆم در کزێ

بەژن برینداری سەرە نێزێ

ئەمن هەموو فەسڵی بوهاران

لەبۆخۆم ببام ئێشکچی

مارەکەی عەێشەگرۆکێ

لە پێش و پشتی سەر تەمتومانێ

لە زارکی باواجی

نەوەڵڵا لە سەر هەیبە سوڵتانێ

حەیران دەرێم

لە لوانی کانی سۆرکێ

لە سپیلکی گردە سپیانێ

هەروا دێنە خوار

بسکشۆری کۆییان و

چاوبەڵەکی کافرۆشیان

فەسلەکی دەرێم هاوینە لەسەری کۆساری

لەسەر کانی کانیە قەرە و ئۆمەرخوچانی

بە دەستەکی تارای سوور هەڵدەدەن و

بە دەستەکی ئاڵای کوردستانێ

لەسەر گڵکۆلەی عەیشەگروکەی

شـێرەژنێ

شـۆڕەژنێ

کۆییەژنێ

خانزادی شەڵال خوێنی زیندانێ.

٦ / ٢ / ٢٠٢١ دوبلن