ئەمە بڵاوبكەوە
FaceBook  Twitter  

قوڵینگی سپیی ماناكان نوقمی زه‌مزه‌مه‌ی فڕینن

باڵ لێكئه‌ده‌ن ئه‌ڵێی ئاوازی ئه‌به‌دیی

نه‌غمه‌ی بێدادی و چڕینن

له‌ نێو ده‌ریاچه‌ی زماندا وه‌ك ئاقیق ئه‌دره‌وشێنه‌وه‌

تێكه‌ڵ ئه‌بن له‌ گه‌ڵ زیوی هه‌زار ترووسكی ته‌متومان

بڕست ئه‌به‌خشن به‌ ژیان

قوڵینگی شینی ماناكان گه‌ردوونیان له‌ ژیر باڵ ناوه‌

قه‌تاریان گرتووه‌ ریز به‌ ریز

ئه‌ڵێی رسته‌ی جاویدانین له‌ نێو كتیبی وجوود دا

بوونه‌ته‌ خوازه‌ و ده‌ربڕین

هه‌تا دێ به‌رز ئه‌بنه‌وه‌ تا ئه‌گه‌ن به‌ كانوونی خۆر

ئه‌بن به‌ ئاگری ئاماژه‌

قوڵینگی سپیی ماناكان له‌ تۆڕی زمان گیر ئه‌بن

ئه‌چنه‌وه‌ نێو كێڵگه‌ی گومان

جاویدانی له‌ په‌ڕوباڵی ره‌شباویان دائه‌گیرسێ

بۆوه‌ی بگه‌م به‌ به‌لاغه‌تی سووڕی زمان

به‌رزایی له‌ خۆم لوولئه‌ده‌م

قوڵینگی سپیی ماناكان

شین شین ئه‌چنه‌وه‌

له‌ ناو لۆكه‌ی سپیی ئاسمان